އޮސްޓްރިއާ އުނދަގުލުން ބަލިކޮށް އިޓަލީ ކުއާޓާއަށް

ލަންޑަން (ޖޫން 26) - އެކްސްޓްރާ ޓައިމްގައި ޖެހި ދެ ލަނޑާއެކު 2-1 އިން އޮސްޓްރިއާ ބަލިކޮށް، ޔޫރޫ ފުޓްބޯޅަ މުބާރާތުގެ ކުއާޓާ ފައިނަލަށް އިޓަލީ ދަތުރު ކޮށްފި އެވެ.

ކުއާޓާގައި އިޓަލީ ވާދަކުރާނީ، ބެލްޖިއަމް އާއި ޕޯޗްގަލް ކުޅޭ މެޗުން މޮޅުވާ ޓީމަކާ ދެކޮޅަށެވެ.

ގުރޫޕް ސްޓޭޖުގައި، ބައިކޮޅަށް ގޯލެއް ނުވަދެ ތިން މެޗުންވެސް މޮޅުވި އިޓަލީއަށް، ދެ ވަނަ ބުރުގައި އެ ޖާދޫއެއް އޮސްޓްރިއާގެ ކުރިމަތީގައި އިޓަލީއަކަށް ނުދެއްކުނެވެ. މެޗުގެ ފުރިހަމަ ވަގުތުގެ ތެރޭގައި އޮސްޓްރިއާގެ ގޯލް ފޫއަޅުވާލުމުގައި އިޓަލީއަކަށް ކާމިޔާބެއް ނުހޯދުނެވެ.

މެޗުގެ ފުރިހަމަ ވަގުތުގައި ނަތީޖާ ނުނެރެވުމުން، ނަތީޖާ ނެރުމަށްޓަކައި ކުޅުނު އިތުރު ވަގުތުގެ ދެ ހާފުގެ ތެރެއިން ފުރަތަމާ ހާފު ފަށައިގެން ހަތަރު ވަނަ މިނެޓްގައި ފްޑްރީކޯ ކިއޭޒާ އިޓަލީއަށް ލަނޑު ޖަހައިދިނެވެ. ލިއޮނާޑޯ ސްޕިނަޒޯލާ އޭރިއާ ތެރެއަށް ބޯޅަ ނަގައިދިނީ އޭރިއާގެ އަރިމަތިން ކިއޭޒާ ހުސްކޮށް އެރުމުންނެވެ. ސްޕިނަޒޯލާ ނަގައިދިން ބޯޅަ ބޮލުން ކޮންޓްރޯލް ކުރުމަށް ފަހު ކިއޭޒާ ވަނީ ގޯލްގެ ތެރެއަށް ވައްދާލައިފަ އެވެ.

އިތުރު ވަގުތުގެ ފުރަތަމަ ހާފުގެ އެންމެ ފަހު މިނެޓްގައި މަޓޭއޯ ޕެސީނޯ ވަނީ އިޓަލީގެ ދެ ވަނަ ލަނޑު ކާމިޔާބު ކޮށްފަ އެވެ.

ދެ ވަނަ ބުރުގެ މެޗާ ހަމައަށް އިޓަލީ އައިރު، ކުރިން ކުޅުނު 11 މެޗުގައިވެސް އެ ޓީމު ކޮޅަށް ލަނޑެއް ވަދެފައެއް ނުވެ އެވެ. ނަމަވެސް މެޗުގެ 114 ވަނަ މިނެޓްގައި އޮސްޓްރިއާއިން ނެގި ކޯނަރަކުން ސާސާ ކަލަޗިކް އިޓަލީގެ ގޯލް ހުޅުވި އެވެ.

މެޗުގެ 66 ވަނަ މިނެޓްގައި، އޮސްޓްރިއާއިން ލީޑު ނެގުނު ކަމަށް ހީކޮށް އުފާފާޅުވެސް ކުރި އެވެ. އޮސްޓްރިއާއިން ނެގި ހުރަސް، ކެޕްޓަން ޑޭވިޑް އަލަބާ ބޮލުން ފޮނުވާލުމުން، މަތީގައި އޮތް ބޯޅަ ބޮލުން ޖަހަން ލިބުނީ މާކޯ އަނާޓޮވިޗް އަށެވެ. އޭނާ ބޮލުން ފޮނުވާލި ބޯޅަ ގޯލްގެ ތެރެއަށް ވައްދާލައި އުފާފާޅުވެސް ކުރި އެވެ.

ލަނޑާ މެދު ކޮންފޮމޭޝަން ހޯދަން ވީއޭއާރް އެސިސްޓެންޓުންގެ ރެފްރީ އެންތޮނީ ޓޭލާ ވާހަކަ ދެއްކި އެވެ. ލަނޑު ވީއޭއާރުން ބަލާކަން އެނގުމުން އޮސްޓްރިއާގެ ކުޅުންތެރިންނާއި ކޯޗުގެ މޫނު މަތިން މާޔޫސްކަން ފެނުނެވެ. ވީއޭއާރު މެދުވެރިކޮށް ބެލުމުން އެނގުނީ ލަނޑު ޖެހުމުގެ ކުރިން އާނޮޓޮވިޗް އޮފްސައިޑް ވެފައިވާ ކަމަށެވެ.

ފުރަތަމަ ހާފުގައި އިޓަލީގެ ޗީރޯ އިމްބިލޭ އާއި ނިކޮލާ ބަރޭލާއަށް ލަނޑު ޖަހާނެ ރަނގަޅު ފުރުސަތެއް ލިބުނެވެ. އިމްމޯބިލޭ ފޮނުވާލި ބޯޅަ އަމާޒުވީ ގޯލްގެ ދަނޑިއަށެވެ. ބަރޭލާ ފޮނުވާލި ބޯޅަ އޮސްޓްރިއާގެ ކީޕަރު ބާކްމަން ދިފާއު ކުރީ ފައިން ޖަހަ އެވެ.