ކުޅިވަރު / ޔޫރޯ 2020

ޔޫރޯގެ ޓީމުގެ އަދަދު 32 އަށް ބަދަލު ކުރުމުގެ ވިސްނުން

ޔޫރޯގެ އެންމެ ފަހުގެ ޗެމްޕިއަން އިޓަލީ މުބާރާތުގެ ތަށި އުފުލަލަނީ --- ފޮޓޯ: އޭއެފްޕީ

ހުސެއިން ހަބީބް، މިހާރު

13 ޖުލައި 2021 - 10:44

ނަޔޯން (ޖުލައި 13) - ޔޫރޯ ފުޓްބޯޅަ މުބާރާތުގައި ވާދަކުރާ ޓީމުގެ އަދަދު 32 އަށް އިތުރު ކުރުމަށް ޔޫއެފާ އިން ވިސްނަން ފަށައިފި އެވެ.

ޔޫރޯގައި މިހާރު ވާދަކުރަނީ 24 ޓީމެވެ. ޓީމުތަކުގެ އަދަދު އިތުރު ކުރުމަށް ޔޫއެފާ އިން ވިސްނަނީ 2028 ގެ ޔޫރޯގެ ބިޑިން ޕްރޮސަސްގެ މަރުހަލާގެ ތެރެއިންނެވެ. ޔޫރޯ 2028 ބާއްވާނެ ގައުމެއް ޔޫއެފާ އިން އިއުލާން ކުރާނީ 2023 ގަ އެވެ. ޔޫރޯ 2024 ބާއްވާނީ ޖަރުމަންގަ އެވެ.

ޔޫރޯ 2024 ގެ ބިޑުގައި ޖަރުމަނާ ވާދަކުރި ތުރުކީން ވަނީ 2028 ގެ ޔޫރޯ އަށް ވެސް ބިޑު ކުރާނެ ކަމަށް އިއުލާން ކޮށްފަ އެވެ. ޔޫރޯގެ އަދަދު 32 ޓީމަށް އިތުރު ކުރުމާ މެދު ފަހުގެ ނިންމުން ޔޫއެފާ އިން ނިންމާނީ 2023 ގަ އެވެ. އަދި ޓީމުތަކުގެ އަދަދު އިތުރު ކުރަން ފާސްކޮށްފި ނަމަ އެ ބަދަލަށް އަމަލު ކުރާނީ 2028 ގެ ޔޫރޯގަ އެވެ.

ޔޫރޯގައި ކުރިން އޮންނަނީ 16 ޓީމެވެ. މިހާރު އޮތް ގޮތަށް 24 ޓީމު ވާދަކުރަން ފެށީ 2016 އިން ފެށިގެންނެވެ.

މިފަހަރުގެ ޔޫރޯ އަކީ ޔޫރަޕުގެ 11 ގައުމެއްގެ 11 ސިޓީގައި ކުޅުނު މުބާރާތެވެ. މުބާރާތް އެގޮތަށް ކުޅުނީ ޔޫރޯ ބާއްވަން ފެށިތާ 60 އަހަރު ފުރުން ފާހަގަކުރުމުގެ ގޮތުންނެވެ. ޔޫއެފާގެ ރައީސް އެލެގްޒެންޑާ ކެފެރިން ވިދާޅުވީ އެގޮތަށް ޔޫރޯ ބޭއްވުމަކީ ޓީމުތަކުގެ މެދުގައި ވެވޭ ބޭއިންސާފެއް ކަމަށެވެ.