މާ އަވަހަށް ގެއްލުނީ ކޮން ތަރިންނެއް؟

ރާއްޖޭގެ ފިލްމް އިންޑަސްޓްރީއަކީ ކުޑަކުޑަ ދާއިރާއެކޭ ބުނަން ޖެހެނީ މި ދާއިރާގައި މަސައްކަތްކުރާ މީހުންގެ އަދަދު މަދުކަމުންނެވެ. އެއީ ފިލްމް އުފެއްދުމާ ގުޅުން ހުރި ކޮންމެ ދިމާއަކަށް ބެލިޔަސް ކަން އޮތް ގޮތެވެ.

ވަކިން ހާއްސަކޮށް ކެމެރާގެ ކުރިމައްޗަށް އަރައި އެކްޓްކޮށްލަން އުޅޭ މީހުން ނިސްބަތުން އަދި މާ މަދެވެ. އެހެންވެ ބެލުންތެރިން އަބަދު ވެސް ކުރާ ޝަކުވާއެއް އޮވެ އެވެ. އެއީ އަބަދު އެއް ބަޔަކު ފެންނަ ވާހަކަ އެވެ. އެކަން އެހެން ދިމާވަނީ ސަބަބުތަކެއް ހުރެގެންނެވެ.

ރާއްޖޭގައި ފިލްމް ކުޅޭ މީހުން މަދުވިޔަސް، ފިލްމީ ތަރިންނަށް އޮތް ލޯތްބާއި ތަރުހީބު ވަކިން ކުޑައެއް ނޫނެވެ. ވަރަށް މަޝްހޫރު ތަރިންތަކެއް ރާއްޖޭގައި ވެސް އެބަ ތިއްބެވެ.

ފިލްމީ ދާއިރާ އަށް ނިކުމެ އާންމުންގެ ވަރަށް ބޮޑު މަގުބޫލު ކަމެއް ހޯދުމަށް ފަހު، މާ އަވަހަށް ގެއްލުނު ތަރިންތަކެއް ވެސް އެބަ ތިއްބެވެ. ބެލުންތެރިންނަށް އެ ތަރިންގެ ފަރާތުން އުންމީދު ކުރި ވަރުގެ އުފެއްދުންތަކެއް ނާންނަނީސް ގެއްލުނު ތަރިންތައް ތިބިކަން އެއީ ހަގީގަތެކެވެ. އޭގެ ތެރޭގައި ދެތިން ފިލްމެއް ނުވަތަ ދެ ތިން ލަވައެއް ކުޅެފައި ގެއްލުނު ތަރިން ވެސް އެބަ ތިއްބެވެ.

އިސްމާއީލް ހިލްމީ

މިއީ އަމްޖަދު އިބްރާހީމް (އަމްޖޭ) ގެ "ހިނިތުން" އިން ފިލްމީ ދާއިރާ އަށް ނިކުތް ތަރިއެކެވެ. ވަރުގަދަ ހަށިގަނޑެއްގެ ވެރި ހިލްމީ އެންމެ ބޮޑަށް މަޝްހޫރުވެގެން ދިޔައީ އަބްދުލް ފައްތާހު ޑައިރެކްޓް ކުރި ޑްރާމާ ސިލްސިލާ "އައިޝާ" އިންނެވެ.

ކަސްޓަމްސްގައި މިހާރު ވަޒީފާ އަދާ ކުރަމުން އަންނަ ހިލްމީގެ ފުރަތަމަ ފިލްމް "ހިނިތުން" ގެ ބަތަލާ ޖަމްޝީދާ އަހުމަދާ އެކު، "އައިޝާ" ގައި މުހިއްމު ރޯލެއް ކުޅުނު ހިލްމީއަކީ މާ ގިނަ އުފެއްދުންތަކުން ފެނުނު ތަރިއެއް ނޫނެވެ. އެކަމަކު އޭނާއަކީ ބެލުންތެރިން ވަރަށް ބޮޑަށް ބަލައިގަތް އެކްޓަރެވެ.

"ހިނިތުން" ގެ އިތުރުން ހިލްމީ ކުޅުނު އަނެއް ފިލްމަކީ މުހައްމަދު ރަޝީދު (ދޮން އަންނާރު) ޑައިރެކްޓް ކުރި "ކުށްވެރިޔާ" އެވެ. ގަޖުރާ އައިސްތު އާ އެކު އޭނާ ފެނިގެން ދިޔަ މި ފިލްމުގެ އިތުރުން ހިލްމީ ބައެއް ވީޑިއޯ ލަވަތަކުން ވެސް ފެނިފައިވެ އެވެ.

ފާތުމަތު ޒުހުރާ

މި ބަތަލާއަކީ އަބްދުލް ފައްތާހުގެ "ހުރީމޭ އިންތިޒާރުގައި" އިން ފިލްމީ ދާއިރާ އަށް ނިކުތް ބަތަލާއެކެވެ. ކ. ދިއްފުއްޓަށް އަށް އުފަން ޒުހުރާ ވަނީ އޭނާގެ ފުރަތަމަ ފިލްމުން ވެސް ބެލުންތެރިންނަށް އޭނާގެ ޖާދޫ ދައްކުވާލައިފަ އެވެ.

ރަވީ ފާރޫގާ އެކު 2005 ގައި "ހުރިމޭ އިންތިޒާރުގައި" އިން ނިކުތް، ޒުހުރާ ބޮޑަށް މަޝްހޫރުވެގެން ދިޔައީ އޭނާ ކުޅުނު ޑްރާމާތަކުންނެވެ. އޭގެ އިތުރަށް ވީޑީއޯ ލަވަތަކުން ވެސް ބެލުންތެރިންނަށް އޭނާގެ ފަރި ހަރަކާތްތައް ދައްކާލަ ދިނެވެ. އެކަމަކު ފިލްމީ ދާއިރާ އިން ޒުހުރާ ފެނުނީ ވަރަށް ކުޑަ ދުވަސްކޮޅަކަށެވެ.

އަލީ އަހުމަދު (ހަތަރު އުދަރެސް އައްޔަ)

ށ. ކޮމަންޑު އަށް އުފަން މި އެކްޓަރަކީ އާންމުންގެ މެދުގައި ވަރަށް ބޮޑަަށް މަޝްހޫރުވެގެން ދިޔަ ތަރިއެކެވެ، އީޝާ ޝަރީފް ޑައިރެކްޓް ކުރި "ހަތަރު އުދަރެސް" އިން ފިލްމީ ދާއިރާ އަށް ނިކުތަސް އައްޔަ ބޮޑަށް މަޝްހޫރުވެގެން ދިޔައީ ފާތުމަތު ނަހުލާގެ ޑްރާމާ ސިލްސިލާތަކެއްގައި ކުޅުނު "ލަވަ ބޯއި" އެއްގެ ކެރެކްޓާތަކުންނެވެ.

އޭގެ ތެރޭގައި "ކަލާގެ ހައްގުގައި" އާއި "ސޫރަ" ފާހަގަކޮށްލެވެ އެވެ. މީގެ އިތުރުން އައްޔަ ކުޅުނު ބައެއް ފިލްމުތަކުގެ ތެރޭގައި "އެ ދަތުރު" އަދި "ހިތޭދޭމީ" ފާހަގަކޮށްލެވެ އެވެ.

އޭނާއަކީ ފިލްމީ ދާއިރާގެ ބޮންތި އަށް އަރާނެ ކަމަށް ބެލެވުނު އެކްޓަރަކަށް ވިޔަސް، މާ ގިނަ ދުވަސްތަކެއް ނުވެ ގެއްލުނު އެކްޓަރެކެވެ. އައްޔަގެ މިހާރުގެ މައިގަނޑު މަސައްކަތަކީ ވަޑާމެވެ.

ނީލަމް ޝާހް

މިއީ 2000 ގެ އަހަރުތައް ފެށިގެން އައި އިރު ފިލްމީ ދާއިރާގައި ބޮޑު ނަމެކެވެ. މަޝްހޫރު އެކްޓަރު ޔޫސުފް ޝަފީއު (ޔޫއްޕެ) އާ އެކު "ހިތާހިތާ" ލަވައިން ފިލްމީ ދާއިރާ އަށް ތައާރަފުވެގެން ދިޔަ ނީލަމަކީ އެތައް ބައެއްގެ ސަމާލުކަން ހުއްޓި، ގިނަ ހުށަހެޅުންތަކެއް ލިބުނު ބަތަލާއެކެވެ.

އެކަމަކު އައްޑު އަށް ނިސްބަތްވާ މި ބަތަލާ ފެނިގެން ދިޔައީ އެންމެ ފީޗާ ފިލްމަކުންނެވެ. އެއީ ޔޫއްޕެ ޑައިރެކްޓް ކުރި "އެ ދަތުރު" އިންނެވެ. އެހެން ނަމަވެސް ދެކެދެކެ ވެސް ޕްރޮޑަކްޝަންގެ ބައެއް ކުރު ފިލްމުތަކާއި ވީޑިއޯ ލަވަތަކުން ނީލަމް ފެނިފައިވެ އެވެ.

ނީލަމް ފެންނާނެ ކަމަށް ބެލެވުނު ފިލްމުތަކުގެ ތެރޭގައި ހިންދީ ފިލްމް "ޗަލްތޭ ޗަލްތޭ" އަސްލަކަށް ބަލައިގެން އަލީ ރަޝީދު (ގޮޅާއައްޔަ) ހަދަން އުޅުނު ފިލްމް "ބީހުން" ފާހަގަކޮށްލެވެ އެވެ. އެކަމަކު އެއީ މިހާތަނަށް ވެސް ވުޖޫދަށް ނާންނަ ފިލްމެކެވެ.

ނީލަމްގެ ވީޑިއޯ ލަވަތަކުގެ ތެރެއިން އެންމެ ވަރުގަދަ އެއް ލަވައަކީ ޔާރާ ޕްރޮޑަކްޝަންގެ ވީސީޑީއަކަށް ކުޅުނު "އައިސް ބަލާ" ލަވަ އެވެ.

އެތައް ބަޔަކު ނީލަމްގެ ފަރި ހަރަކާތްތަކަށް އިންރިޒާރު ކުރަމުން ދަނިކޮށް، އޭނާއަކީ އެރި ތަރިއާ އެކު ގެއްލުނު ތަރިއެކެވެ. ނީލަމަކީ މިހާރު ފިޓްނަސް ޓްރެއިނަރެކެވެ.

އަލީ ހާލިދު

މުހައްމަދު ނިޔާޒް (ޓެޑްރީ) ގެ "ދެރިޔާ" ގައި އަލީ ހާލިދު ފެނިގެން ދިޔައީ އޭނާގެ އޭރުގެ އަންހެނުން ހައްވާ ޒާހިރާ އާ އެކުގަ އެވެ. "ދެރިޔާ" އަށް ފަހު، ހައްވަ ގެއްލުނަސް، އަލީ ހާލިދަކީ ނުގެއްލި ފިލްމީ ދާއިރާ އިން ފެނުނު އެކްޓަރެކެވެ.

އައްޑު އަށް ނިސްބަތްވާ އަލީ ހާލިދު ކުޅުނު ތިން ފިލްމަކީ ވެސް އާންމުންގެ މެދުގައި ވަރަށް މަގުބޫލު ފިލްމުތަކެވެ. އެއީ ޓެޑް ޕްރޮޑިއުސްކޮށް، މަހުދީ އަހުމަދު ޑައިރެކްޓް ކުރި "އަމާނާތް" އާއި ފައްތާހު ޑައިރެކްޓް ކުރި "ހިމޭން ދުނިޔެ" އެވެ.

ގިނަ ބަޔަކު އުންމީދުކޮށްގެން ތިބީ އަލީ ހާލިދުގެ ގިނަ ފިލްމްތަކެއް ބަލާލަން ލިބޭނެ ކަމަށެވެ. އެކަމަކު ކުޅުނު ތިން ފިލްމާއި މަދު ވީޑިއޯ ލަވަތަކެއް ފިޔަވައި، އޭނާގެ ފޭނުން ހިތްހަމަޖައްސައި ދޭން ކުރެވުނު މާ ގިނަ މަަސައްކަތެއް ނެތެވެ.

މަރިޔަމް ނާޒިމާ

ނާޒިމާއަކީ ޝިރާނީ އާއި މަރިޔަމް ނިޝާ، ޖަމްޝީދާ އަދި ނިއުމާމެން ފަދަ ބަތަލާއިން ދިވެހި ފިލްމީ ދާއިރާގައި އެންމެ ގަދަ އަށް ރަނިކަން ކުރަމުން ދިޔަ ދުވަސްވަރު، މި ދާއިރާ އަށް ނިކުތް ވަރަށް އުންމީދީ ބަތަލާއެކެވެ.

އެކަމަކު މިއީ ކެރިއާ މާ އަވަހަށް ނިންމާލި ތަން ފެނުނު ބަތަލާއެކެވެ. މާ ގިނަ މަސައްކަތްތަކެއް ކުރެވިފައެއް ނެތެވެ. ބޮޑަށް ހުރީ ވީޑީއޯ ލަވަތަކާއި ޑްރާމާތަކެވެ. މިހާރު ސްރީ ލަންކާގައި ދިރިއުޅެމުން އަންނަ ނާޒިމާ ކުޅުނު ފިލްމުތަކުގެ ތެރޭގައި "ސާހިބާ" ފާހަގަކޮށްލެވެ އެވެ.

މޫސާ ޒަކަރިއްޔާ

މިއީ އިސްމާއީލް ވަޖީހާއި ރީކޯ މޫސާ މަނިކުމެން ފަދަ އެކްޓަރުން ހޯދި ވަރުގެ މަޝްހޫރު ކަމެއް ހޯދާނެ ކަމަށް ބެލެވުނު އެކްޓަރެކެވެ. ފިލްމް "ލައިލާ" އިން އައިޝަތު ޝިރާނީ އާ އެކު، ފެނިގެން ދިޔަ މޫސާ ޒަކަރިއްޔާ ވަނީ އެ ފިލްމުން ބެލުންތެރިންގެ ހިތްތައް އަތުލައިފަ އެވެ.

އޭގެ ފަހުން އޭނާ ކުޅުނު ފިލްމުތަކުގެ ތެރޭގައި "ކުށްވެރިޔާ"، "ލޭކޮކާ" އަދި "ހިމޭން ދުނިޔެ" ފާހަގަކޮށްލެވެ އެވެ. މީގެ އިތުރުން މޫސަ ޒަކަރިއްޔާ ލީޑް ރޯލް ކުޅުނު ޑްރާމާ ސިލްސިލާ "މައާފުކުރާށޭ" އަކީ ބެލުންތެރިން އެ ޑްރާމާއެއްގެ މަތިން މިހާރު ވެސް ހަނދާން ހުންނާނެ ޑްރާމާއެއްކަމާ ދޭތެރޭ ޝައްކެއް ނެތެވެ.

ބައެއް ވީޑީއޯ ލަވަތައް ވެސް ކުޅުނު އަދި ޓީވީއެމްގައި މަސައްކަތް ކުރަމުން އަންނަ މޫސަ ޒަކަރިއްޔާއަކީ އުންމީދު ކުރި ވަރަށް ވުރެ މާ އަވަހަށް އޮއްސުނު ތަރިއެކެވެ.

ސޯނިއާ

އީސާ ޝަރީފް ޑައިރެކްޓް ކުރި ވީޑީއޯ ލަވަޔަކުން ފިލްމީ ދާއިރާ އަށް ނިކުތް ސޯނިޔާއަކީ ވެސް އާންމުން ވަރަށް ބޮޑަށް ބަލައިގަތް ބަތަލާއެކެވެ. ހާއްސަކޮށް އޭނާ ކުޅުނު ވީޑިއޯ ލަވަތަކުންނެވެ.

ފިލްމަކުން އޭނާ ފެންނާނެ ކަމަށް ކުރަން ޖެހުނު އިންތިޒާރު ދިޔައީ ފެނަށެވެ. ގިނަ ހުށަހެޅުންތަކެއް ލިބުނު ނަމަވެސް، ކެރިއާ ނިންމައިލި އިރު، ސޯނިޔާ އެއްވެސް ފިލްމެއް ކުޅެފައެއް ނެތެވެ.

އޭނާ ފެނިގެން ދާނެ ކަމަށް އެންމެ ބޮޑަށް ބެލެވުނު އެންމެ ވަރުގަދަ ފިލްމަކީ އަބްދުލް ފައްތާހު ހަދަން އުޅުނު "ވިރެމުންދާ ހިތް" އެވެ. ފަހުން އެ ފިލްމް ބެލުންތެރިންނާ ހަމައަށް އައީ މުޅިން އެހެން ކާސްޓަކާ އެކު، އެހެން ނަމެއްގަ އެވެ.

ޑޭޝް ސްޓޫޑީއޯގެ "ފަރި" ވީޑިއޯ ސީޑީ ސިލްސިލާގެ ލަވަތަކުން ސޯނިޔާ ވަރަށް ބޮޑަށް ފެނިފައިވެ އެވެ.

މުހައްމަދު ޝާވިން

ޝާވިންއަކީ ވެސް ބެލުންތެރިންގެ ތަރުހީބު ވަރަށް ބޮޑަށް ލިބުނު އެކްޓަރެކެވެ. އޭނާ ކުޅުނު ފާހަގަކޮށްލެވޭ ބައެއް ފިލްމުތަކުގެ ތެރޭގައި "ވެހޭ ވާރޭތެރެއިން"، "ކަށްވަޅަށްދާންދެން" އަދި "އެ ދަތުރު" ފާހަގަކޮށްލެވެ އެވެ.

ގިނަ އަދަދެއްގެ ވީޑިއޯ ލަވަތައް ވެސް ކުޅުނު ޝާވިންގެ ޑްރާމާތަކުގެ ތެރެއިން "ދޯޕައްޓާ" އަކީ އާންމުންގެ ތެރޭގައި ވަރަށް މަގުބޫލުވެގެން ދިޔަ ޑްރާމާއެކެވެ.

އެހެން ނަމަވެސް ޝާވިންއަކީ ޔޫއްޕެ އާއި އަލީ ސީޒަން ފަދަ އެކްޓަރުންނާ ދާދި އެއް ދުވަސްވަރެއްގައި ފިލްމީ ދާއިރާ އަށް ނިކުމެ، މާ ގިނަ ގިނަ ދުވަހަކަށް ހިފަހައްޓައި ލެވުނު އެކްޓަރެއް ނޫނެވެ. އޭނާ އާމްދަނީ ހޯދަން މިހާރު ކުރާ މައިގަނޑު މަސައްކަތަކީ ޕެއިންޓިން އެވެ.

މަރިޔަމް އަފީފާ

މިއީ އެންމެ ފަހުން ބޭއްވި ގައުމީ ފެސްޓިވަލްގައި "ލޫދިފާ" އިން އެންމެ މޮޅު ބަތަލާގެ އެވޯޑް ގެންދިޔަ ތަރި އެވެ. ފުވައްމުކަށް އުފަން އަފީއަކީ ފިލްމީ ދާއިރާ އަށް ނިކުތްތާ ކުޑަ ދުވަސްކޮޅެއްގެ ތެރޭގައި އާންމުންގެ ލޯބި ވަރަށް ބޮޑަށް ހޯދި ބަތަލާއެކެވެ.

ހާއްސަކޮށް އޭނާ ކުޅުނު ޑްރާމާ ސިލްސިލާ "ހިނިތުންވެލާށޭ ކަލާ" ވަރަށް މަޝްހޫރެވެ. އަދި ޔޫއްޕެއާ އެކު ކުޅުނު ފިލްމް "ވާ ލޯބި އެނގޭ" ނަމަ އަކީ އަފީގެ އެންމެ ފާހަގަކޮށްލެވޭ އެއް ފިލްމެވެ.

އަފީގެ އިތުރު ފިލްމުތަކުގެ ތެރޭގައި ސީޒަން އާ އެކު ކުޅުނު "ހަލާސް" އާއި "ޖިންނި" ހިމެނެ އެވެ. އޭނާގެ ވަރަށް އުންމީދީ ފިލްމެއް އަދި ރިލީޒް ނުވެ އެބަ އޮތެވެ. އެއީ ޔޫއްޕެ ޑައިރެކްޓްކޮށްފައިވާ "އިންތިހާ" އެވެ. މި ފިލްމަކީ މި އަހަރު ރިލީޒް ވާނެ ކަމަށް ބެލެވޭ ފިލްމެކެވެ.

މީގެ އިތުރުން އަފީ ޑަބަލް ރޯލް ކުޅެފައި އޮޓް ޑްރާމާ ސިލްސިލާއެއް ވެސް އާންމުންނާ ހަމައަށް އަދި ނައިސް އޮތެވެ.

މިހާރު ފިލްމީ ދާއިރާއާ ދުރުގައި ހުރި އަފީ ދާދި ފަހުން ޓީވީއަކަށް ދިން އިންޓަވިއުއެއްގައި ބުނީ ވަރުގަދަ ފިލްމަކުން އެނބުރި އަންނަން ވިސްނަމުންދާ ކަމަށެވެ. މިއީ އަފީގެ ފޭނުންނަށް އުފާވެރި ހަބަރަކަށް ވާނެ އެވެ.