ޖަޕާނުގެ "އީ.10" ޝިންކަންސެން ސީރީޒްގެ ބުލެޓް ޓްރެއިންތަކާ ވާދަކުރެވޭ ފަދަ، އަމިއްލަ ޓެކްނޮލޮޖީގައި އުފައްދާ އެންމެ ހަލުވި ބުލެޓް ޓްރެއިން "ބީ.35" ގެ މަސައްކަތް އިންޑިއާ ސަރުކާރުން ރަސްމީކޮށް ފަށައިފި އެވެ.
މި ޓްރެއިން ފަރުމާކޮށްފައިވަނީ ގަޑިއަކު 350 ކިލޯމީޓަރުގެ ބާރުމިނުގައި ދަތުރުކުރެވޭ ގޮތަށެވެ. އަދި 2030 ވަނަ އަހަރުގެ ނިޔަލަށް މި ޓްރެއިން ދަތުރުތަކަށް ނެރެން ވަނީ އަމާޒު ހިފައިފަ އެވެ.
މި ބޮޑު މަޝްރޫއު ކުރިއަށްދަނީ މުމްބާއީ-އަހުމަދުއާބާދު ހައި-ސްޕީޑް ރެއިލް ކޮރިޑޯގެ ދަށުންނެވެ. މި މަޝްރޫއުގެ ބަޖެޓު މިހާރު ވަނީ 2 ލައްކަ ކްރޯޑް ރުޕީސްއަށްވުރެ މައްޗަށް އަރައިފަ އެވެ.
އިންޑިއާއިން އަމިއްލައަށް މިފަދަ ހައި-ސްޕީޑް ޓްރެއިނެއް އުފައްދަން ނިންމީ ޖަޕާނުން ކުރިން ދޭން އެއްބަސްވި "އީ.5" ސީރީޒްގެ ޓްރެއިންތައް އުފެއްދުން ހުއްޓާލަން ނިންމުމާ ގުޅިގެންނެވެ. އަދި ޖަޕާނުގެ އާ އީ.10 ޓްރެއިންތައް ބާޒާރަށް ނެރެން 2030 ގެ ފަހުގެ އަހަރުތަކަށް ފަސްކޮށްފައި ވާތީ، އިންޑިއާގެ މަޝްރޫއު ލަސްވިޔަނުދިނުމުގެ ގޮތުންނެވެ.
މި މަޝްރޫއުގެ ދަށުން އެންމެ ފުރަތަމަ ޓެސްޓުކުރާނީ ގަޑިއަކު 280 ކިލޯމީޓަރުގެ ބާރުމިނުގެ "ބީ.28" މޮޑެލްގެ ޓްރެއިނެކެވެ. ބެމްލް އަދި އިންޓަގްރަލް ކޯޗް ފެކްޓަރީ އިން އުފައްދާ މި ޓްރެއިންގެ ޓްރަޔަލް ދަތުރުތައް 2027 ވަނަ އަހަރު މުމްބާއީ-އަހުމަދުއާބާދު ޓްރެކްގައި ފެށުމަށް ވަނީ ހަމަޖެހިފަ އެވެ.
މީގެ އިތުރުން، މި ޓްރެއިންތަކުގައި ބޭނުންކުރުމަށް ހަމަޖެހިފައިވަނީ އިންޑިއާގެ އަމިއްލަ ސިގްނަލިންގް ނިޒާމެއް ކަމަށްވާ "ބާރަތު ޓްރެއިން ކޮންޓްރޯލް ސިސްޓަމް" އެވެ. މިއީ ރެއިލްވޭ ޓެކްނޮލޮޖީގެ ދާއިރާއިން އިންޑިއާ އަމިއްލަ ފައިމައްޗަށް ތެދުވުމަށް އެޅުނު ވަރަށް މުހިންމު ފިޔަވަޅެކެވެ.