މޮރޮކޯ އާއި އިޒްރޭލާ ދެމެދު އޮތް ހާރިޖީ ގުޅުން އެންމެ މަތީ ފަންތިއަށް ބަދަލުކޮށް، އިޒްރޭލާއި މޮރޮކޯއިން އެއްބަޔަކު އަނެއް ބަޔަކަށް ސަފީރުން ކަނޑައަޅަން ރަސްމީކޮށް އެއްބަސްވެއްޖެ އެވެ.
މިކަން ހާމަކޮށްފައިވަނީ އެމެރިކާ، މޮރޮކޯ އަދި އިޒްރޭލު ގުޅިގެން އިއްޔެ ނެރުނު ބަޔާނެއްގަ އެވެ. މިއީ 2020 ވަނަ އަހަރުގެ ޑިސެމްބަރު މަހު އެމެރިކާ މެދުވެރިވެގެން ސޮއިކުރި "އަބްރަހަމް އެކޯޑްސް" ގެ ދަށުން އިޒްރާއި މޮރޮކޯއިން ގުޅުން އިއާދަކުރި ފަހުން، ހާރިޖީ ގުޅުމަށް އައި އެންމެ ބޮޑު ކުރިއެރުމެވެ.
ނިއު ޔޯކްގައި ބޭއްވި މި ބައްދަލުވުމުގައި ވީ އެއްބަސްވުމުގެ ދަށުން، މިހާރު ރަބާތާއި ތެލް އަވީވްގައި ގާއިމުކޮށްފައިވާ ލިއޭޒަން އޮފީސްތައް ފުރިހަމަ އެމްބަސީތަކަށް ބަދަލުކުރާނެ އެވެ. މީގެ އިތުރުން، މި އަހަރު ނިމުމުގެ ކުރިން ވިޔަފާރި އާއި އިންވެސްޓްމަންޓްތައް ހިމާޔަތްކުރުމުގެ މުހިންމު އެއްބަސްވުންތަކެއްގައި ސޮއިކުރުމަށް އިޒްރޭލުގެ ފޮރިން ވަޒީރު ގިޑިއޮން ސާރް އާއި މޮރޮކޯގެ ފޮރިން މިނިސްޓަރު ނާސިރު ބޫރީތާ ވަނީ އެއްބަސްވެވަޑައިގެންފަ އެވެ.
މި އެއްބަސްވުމާ އެކު، އިޒްރޭލާއި މޮރޮކޯއާ ދެމެދު ދެމެދުގައި ސީދާ ދަތުރުތައް އަލުން ފަށައި، މޮރޮކޯގެ އެއާލައިންތަކުން ކުރިއަށް އޮތް ހަފުތާތަކުގައި އިޒްރޭލަށް ދަތުރުތައް ފެށުމަށް ވެސް ވަނީ ނިންމައިފަ އެވެ.
އެމެރިކާ އިން އދ. އަށް ކަނޑައަޅާފައި ހުންނަވާ ސަފީރު މައިކް ވޯލްޓްޒް ބައިވެރިވެވަޑައިގެންނެވި މި ބައްދަލުވުމުގައި، ވެސްޓަން ސަހާރާގެ މައްޗަށް އޮތް މޮރޮކޯގެ ސިޔާދަތީ ބާރު ގަބޫލުކުރާ ކަން އެމެރިކާ އާއި އިޒްރޭލުން ވަނީ އަލުން ތަކުރާރުކޮށްފަ އެވެ.