ވިޓަމިން ޑީގެ ސަބަބުން ކޮވިޑް-19ގެ ނުރައްކާ ކުޑަވެދާނެ ކަމަށް ބުނާ ހޯދުމެއް

ހަށިގަނޑުގައި އެކަށީގެންވާ ވަރަށް ވިޓަމިން ޑީ ހުންނަ ނަމަ ކޮވިޑް-19 ޖެހުމުން ބޮޑުވަރު ނުވެ ފަސޭހައިން ރަނގަޅުވުމުގެ ފުރުސަތު ބޮޑު ކަމަށް އަޔަލެންޑްގެ ޓްރިނިޓީ ކޮލެޖްގެ ދިރާސާއަކަށް ފަހު ބުނެފި އެވެ.

މި ދިރާސާގައި މިގޮތަށް ލަފާކޮށްފައިވަނީ ކޮރޯނާވައިރަހުން ޖެހޭ ކޮވިޑް-19 ގައި ދުނިޔޭގެ އެކި ގައުމުތަކުން މީހުން މަރުވާ ރޭޓް ވަޒަންކޮށް އެކި ގޮތްގޮތަށް ބެލުމަށް ފަހުގަ އެވެ.

މި ދިރާސާގައި ބުނެފައިވަނީ ދުނިޔޭގެ ނޮދަން ހެމިސްފެއާގައި ދިރިއުޅޭ ގިނަ މީހުންނަކީ އަވި ލިބޭ މިންވަރު މަދުވުމުން ވިޓަމިން ޑީ މަދު މީހުން ކަމަށެވެ. މި ސަރަހައްދުގެ ގައުމުތަކުގައި ހާލު ބޮޑުވި އަދި މަރުވި ކޮވިޑް-19ގެ ބަލި މީހުންނަށް އެހެން ދިމާވުމާ ވިޓަމިން ޑީ މަދުވުމާ ގުޅުމެއް ހުރެދާނެ ކަމަށް ވެސް މި ދިރާސާގައި ފާހަގަކޮށްފައިވެ އެވެ.

ޖާނަލް އޮފް އެލިމެންޓްރީ ފާމަކޮލޮޖީ އެންޑް ތެރަޕިއުޓިކްސްގެ އެޑިޓޯރިއަލްއެއްގެ ގޮތުގައި ޝާއިއުކޮށްފައިވާ މި ދިރާސާގައި ބުނެފައިވާ ގޮތުގައި ރަނގަޅަށް އަވި ލިބޭ، ސަދަން ހެމިސްފެއާގެ ގައުމުތަކުގެ ތެރޭގައި ހިމެނޭ އޮސްޓްރޭލިއާ ފަދަ ގައުމުތަކުގައި ކޮވިޑް-19 ގެ ސަބަބުން މަރުވާ މީހުންގެ ރޭޓް ވަރަށް ބޮޑަށް ދަށް ކަމަށެވެ. މިގޮތުން 35 ޑިގްރީ އުތުރު ލެޓިޓިއުޑަށް ވުރެ ފަހަތުގައި ހުރި ގައުމުތަކުގައި ކޮވިޑް-19 ޖެހިގެން މީހުން މަރުވާ ރޭޓް، 35 ޑިގްރީ އުތުރު ލެޓިޓިއުޑަށް ވުރެ ކުރީގައި ހުރި ގައުމުތަކުގައި މަތިކަން ވަނީ ދިރާސާ އަށް ފާހަގަވެފަ އެވެ. މިއީ ސްޕްރިންގާއި ވިންޓާ ބޮޑަށް ތަޖުރިބާކުރަން ޖެހޭ، ހަށިގަނޑުގައި އެކަށީގެންވާ ވަރަށް ވިޓަމިން ޑީ އުފެއްދުމަށް ބޭނުންވާ ވަރަށް އަވި ނުލިބޭ ގައުމުތަކެވެ. މި ގައުމުތަކުގެ ތެރޭގައި ކޮވިޑް-19 ގައި އެންމެ ގިނައިން މީހުން މަރުވި ގައުމުތަކުގެ ތެޜޭގައި ހިމެނޭ އިޓަލީ އާއި ސްޕެއިން ހިމެނެ އެވެ.

އެކަމަކު މި ސަރަހައްދުން ވެސް، ވިޓަމިން ޑީ ސަޕްލިމެންޓް ބޭނުންކުރުން އާންމު ނޯޑިކް ގައުމުތަކުގައި ކޮވިޑް-19 އިން މަރުވާ ރޭޓް މި ސަރަހައްދުގެ އެހެން ގައުމުތަކަށް ވުރެ ދަށެވެ.

ވިޓަމިން ޑީ އަކީ އިންފްލެމޭޝަންތައް ހުއްޓުވައި މެނޭޖްކުރުމުގައި މުހިންމު ދައުރެއް އަދާކުރާ މާއްދާއެކެވެ. އެހެންވެ ކޮވިޑް-19 ގައި ނޭވާލާ ނިޒާމަށް މައްސަލަތައް ދިމާވެ ވެންޓިލޭޓަރުގައި ބާއްވަން ޖެހުމާއި މަރުވުމާ ވިޓަމިން ޑީ އާ ބޮޑު ގުޅުމެއް ހުރެދާނެ ކަމަށް ދިރާސާ ޓީމުން ގަބޫލުކުރެ އެވެ.

އެކަމަކު މި ދިރާސާގައި ބުނެފައި ވަނީ ވިޓަމިން ޑީ އާއި ކޮވިޑް-19 ގެ ނުރައްކާ ބޮޑުވާ މިންވަރާ ހުރި ގުޅުން ދެނެގަނެތުމަށް އިތުރު ދިރާސާތައް ކުރަންޖެހޭ ކަމަށެވެ. ނަމަވެސް ވިޓަމިން އެކަށީގެންވާ ވަރަށް ނުހުންނަ ގައުމުތަކުގައި ސަޕްލިމެންޓް ބޭނުންކުރުމަށް ސަރުކާރުތަކުން މިހާރުވެސް ބާރުއެޅުން މުހިންމު ކަމަށް ވަނީ ބުނެފަ އެވެ.

މިދިޔަ އަހަރު ޗައިނާގައި ފެތުރެން ފެށި ކޮރޯނާވައިރަހުގެ ސަބަބުން ޖެހޭ ކޮވިޑް-19 އިން އެކި ގައުމުތަކުގައި އެކި މިންވަރަށް ނުރައްކާވާ ގޮތް އަދިވެސް އޮތީ ނޭނގުމެއްގެ ތެރޭގަ އެވެ. ބީސީޖީ ވެކްސިން ގަވައިދުން ދޭ ގައުމުތަކުގައި ކޮވިޑް-19 ގައި މީހުންނަށް ބޮޑުވަރުވުމާއި މަރުވުން މަދު ކަމަށް ވެސް ބައެއް ދިރާސާތަކުގައި ބުނެފައިވެ އެވެ.

މުޅި ދުނިޔެ އިން މިހާތަނަށް ތިން މިލިއަނަށް ވުރެ ގިނަ މީހުންނަށް ކޮވިޑް-19 ޖެހިފައި ވާއިރު ދެ ލައްކަ އަށް ވުރެ ގިނަ މީހުން ވަނީ މަރުވެފަ އެވެ. މި ބަލި ޖެހުނު މީހުންގެ ތެރެއިން ނުވަ ލައްކަ އަށް ވުރެ ގިނަ މީހުން ވަނީ ރަނގަޅުވެފަ އެވެ.