އެމެރިކާގެ ރައީސް ޑޮނަލްޑް ޓްރަމްޕް ކުރެއްވި ޓްވީޓްތަކެއްގައި އޭގެ ސައްހަކަން ބަލަންޖެހޭ ކަމަށް ބުނެ ޓްވިޓާ އިން ޓެގްކުރި މައްސަލަ ހޫނުވެ، ސޯޝަލް މީޑިއާ ކުންފުނިތަކަށް ލިބޭ ގާނޫނީ ބައެއް ހިމާޔަތްތައް ކުޑަކުރަން ރިއާސީ އަމުރެއް ނެރުއްވާފައި ވަނިކޮށް ޓްވިޓާ އިން ޓްރަމްޕުގެ ދެ ޓްވީޓެއް ނުފެންނަ ގޮތަށް ފޮރުވައިފި އެވެ.
ޓްރަމްޕް ކުރެއްވި ޓްވީޓްތައް ޑިލީޑްކޮށްލުމުގެ ބަދަލުގައި ޓްވިޓާ އިން ވަނީ ޓްވީޓް ނުފެންނަ ގޮތް ހަދައި ނޯޓިސްއެއް ދީފަ އެވެ. ނަމަވެސް ބޭނުން ނަމަ އެ ޓްވީޓް ހުޅުވައި ބެލިދާނެ އެވެ. އެކަމަކު އިތުރު ކޮމެންޓަކާ އެކުގައި ނޫނީ އެގޮތަށް ހުންނަ ޓްވީޓް ރީޓްވީޓެއް ނުކުރެވޭނެ އެވެ. އަދި އެ ޓްވީޓަށް ރިޕްލައިއެއް ވެސް ނުކުރެވޭނެ އެވެ.
ޓްވިޓާ އިން ޓްރަމްޕުގެ ޓްވީޓް ފޮރުވުމަށް ފަހު ފެންނަ ގޮތަށް ހަދާފައިވާ ނޯޓިސްގައި އޮންނަނީ ޓްވީޓް އާންމުކޮށް ނުފެންނަ ގޮތަށް ހަދާފައިވަނީ ޓްވިޓާގެ އުސޫލުތަކާ ހިލާފުވެފައި ވާތީ އާއި ހަމަނުޖެހުންތަކަށް ހިތްވަރު ދީފައިވާތީ ކަމަށެވެ. ނަމަވެސް ޓްވީޓްގައި އޮތް ވާހަކަ އަކީ ރައްޔިތުންގެ މަސްލަހަތާ ގުޅުން ހުރި ވާހަކައެއް ކަމަށް ވެދާނެތީ، ބޭނުން ނަމަ ޓްވީޓް ބަލައިލެވޭނެ ކަމަށް ބުނެފައިވެ އެވެ.
ޓްވިޓާ އާއި ވައިޓް ހައުސްގެ ހަނގުރާމަ ހޫނުވެފައި ވަނިކޮށް ޓްވިޓާ އިން އެޅި މި ފިޔަވަޅާ އެކު މައްސަލަ އިތުރަށް ގޯސްވާނެ ކަމަށް ބެލެވެ އެވެ.
ނުފެންނަ ގޮތަށް ޓްވިޓާ އިން ހެދީ، އެމެރިކާގައި ފުލުހުންގެ އަތުން، ކަޅު ނަސްލުގެ މީހަކު މަރުވި މައްސަލާގައި މުޒާހަރާކޮށް ހަމަނުޖެހުން ހިންގައި ފުލުހުންގެ އިމާރާތެއްގައި ހުޅުޖެހުމުން އެކަމާ ބެހޭ ގޮތުން ކުރައްވާފައިވާ ޓްވީޓްތަކެކެވެ. އޭގައި ޓްރަމްޕް ވިދާޅުވެފައިވަނީ ހަމަނުޖެހުންތައް ހުއްޓުވަން ނެޝަނަލް ގާޑުން ފޮނުއްވާނެ ކަމަށެވެ. އަދި ހަމަ އެއާ އެކު އިންޒާރުގެ ގޮތުން ވިދާޅުވެފައިވަނީ ހަމަނުޖެހުން ހިންގާ މީހުން ތަންތަން ލޫޓުވާން ފަށައިފި ނަމަ ގާޑުން ބަޑި ޖަހަން ވެސް ފަށާނެ ކަމަށެވެ.
އާންމުންގެ ތެރޭގައި މަޝްހޫރު އަދި ނުފޫޒު ގަދަ މީސްމީހުންގެ ޓްވީޓްތަކުގައި ވެސް ޓްވިޓާ އިން އެ ކުންފުނީގެ އުސޫލުތަކާ ހިލާފުވުމުން އިންޒާރުގެ މެސެޖު ދޭން ފެށީ މިދިޔަ އަހަރުގެ މެދުތެރޭގަ އެވެ. ނަމަވެސް މީގެ ކުރިން ޓްރަމްޕްގެ ޓްވީޓަކަށް އެގޮތަށް އަމަލުކޮށްފައެއް ނުވެ އެވެ.