ގޫގުލް ފޮޓޯސްގައި ޕްރައިވެޓް ފޮޓޯތައް ރައްކާކުރަން "ލޮކްޑް ފޯލްޑާ" އެއް

އަހުމަދު އަދްޝަން، މިހާރު

20 މެއި 2021 - 07:32

އަންނަ މަހުން ފެށިގެން ގޫގުލް ފޮޓޯސްގައި ހިލޭ ފޮޓޯ ރައްކާކުރެވޭ ލިމިޓް 15 ޖީބީ އަށް ހަދަން ނިންމާފައިވާ އިރު، ފޮޓޯތައް އާންމުކޮށް ނުފެންނަ ގޮތަށް ރައްކާކުރެވޭ ގޮތަށް އާ ފީޗާއެއް ތައާރަފުކޮށްފި އެވެ.

މިހާރު ކުރިއަށްދާ މި އަހަރުގެ ޑިވެލޮޕާޒް ކޮންފަރެންސް "Google I/O" ގައި ލޯންޗްކުރި ފީޗާގެ ނަމަކީ "ލޮކްޑް ފޯލްޑާ" އެވެ. ގޫގުލް އިން ބުނި ގޮތުގައި ފޮޓޯ ފީޑާއި އެހެން އެޕްތައް މެދުވެރިކޮށް ފެންނަން ބޭނުން ނުވާ ފޮޓޯތައް ނުފެންނަ ގޮތަށް ޕާސްވޯޑެއް ޖަހައިގެން ފޯލްޑާއެއްގައި މި ފީޗާގެ ސަބަބުން ރައްކާކުރެވޭނެ އެވެ.

With Locked Folder in @googlephotos, you can add photos to a passcode protected space and they won’t show up as you scroll through Photos or other apps on your phone. Locked Folder is launching first on Google Pixel, and more Android devices throughout the year. #GoogleIO pic.twitter.com/yGNoQ8vLdq
— Google (@Google) May 18, 2021

ގޫގުލް އިން ބުނީ "ލޮކްޑް ފޯލްޑާ" އެންމެ ފުރަތަމަ ލިބޭނީ ޕިކްސެލް ފޯނުތަކަށް ކަމަށެވެ. އެކަމަކު މި އަހަރުގެ ތެރޭގައި އެންޑްރޮއިޑްގެ އެހެން ޑިވައިސްތަކަށް ވެސް ލިބެން ފަށާނެ ކަމަށް ބުންޏެވެ.

އަންނަ މަހުގެ 1 އިން ފެށިގެން ގޫގުލް ފޮޓޯސްގައި 15 ޖީބީ އަށް ވުރެ އިތުރަށް ފޮޓޯ/ވީޑިއޯ ރައްކާކުރެވޭނީ ފީ ދައްކައިގެންނެވެ. އެގޮތުން ތިން ޕްލޭނެއްގެ ދަށުން އަގު ނަގާނެ އެވެ. އެއީ 200 ޖީބީ އަށް މަހަކު 2.99 ޑޮލަރު، 2ޓީބީ އަށް މަހަކު 9.99 ޑޮލަރު އަދި 30 ޓީބީ އަށް 149.99 ޑޮލަރެވެ.