ކްލަބްހައުސް އަށް ޑީއެމް؟

އެންޑްރޮއިޑަށް ކްލަބްހައުސް އައުމާ އެކު ރާއްޖޭގައި ވެސް މިހާރު މިއީ ވަރަށް މަގުބޫލު އެޕެކެވެ. މި ބޭނުންކުރާ މީހުންގެ އަދަދު މުޅި ދުނިޔޭގައި ވެސް އެއް ދުވަހުން އަނެއް ދުވަހަށް އިތުރުވަމުން އަންނަ އިރު، އެހެން އެޕްތަކާ އެއްގޮތަށް ކްލަބްހައުސް އިން ވެސް ބޭނުން ވަނީ ބޭނުންކުރާ މީހުން އެދޭ ފީޗާތައް މީގެ ތެރެއަށް ގެންނާވެ.

މީގެ ދޮޅު އަހަރެއްހާ ދުވަސްކުރިން އުފަންވި ކްލަބްހައުސް އަކީ އޯޑިއޯ ޗެޓް އެޕެކެވެ. މިހާރު އިވޭ އަޑުތަކާއި ސޯޝަލް މީޑިއާގައި ފެތުރެމުން އަންނަ ވާހަކަތަކަށް ބަލާ އިރު، ވަރަށް އަވަހަށް މި އެޕަށް ޑައިރެކްޓް މެސެޖް (ޑީއެމް) ފީޗާ ވެސް ތައާރަފުކޮށްފާނެ އެވެ. އެކަހަލަ ވާހަކަތަކެއް މިހާރު ވަރަށް ބޮޑަށް ދެކެވުނަސް ކްލަބްހައުސް އަދި އޮތީ އެކަމާ ބެހޭ ގޮތުން ވާހަކަ ދައްކަން ތައްޔާރަކަށް ނޫނެވެ.

މި އެޕަށް ޑީއެމް ފީޗާ އަންނަން އުޅޭ ކަމަށް ބެލެވެން ފެށީ މިދިޔަ ހަފްތާގައި ބެކްޗެނަލް ކިޔާ އާ ޔޫއައިއަކާ ގުޅިގެންނެވެ. އެކަމަކު އެ ތިލަވިތާ މާ ގިނަ އިރުތަކެއް ނުވަނިސް ނިޒާމުން ގެއްލިފައިވެ އެވެ.

ފާހަގަކޮށްލެވޭ ކަމަކީ ކްލަބްހައުސްގެ ސީއީއޯ ޕޯލް ޑޭވިސަން މިދިޔަ އަހަރުގެ ބައްދަލުވުމެއްގެ ތެރޭގައި އެ އެޕަށް ޑީއެމް އަތުވެދާނެ ފަދަ މޭރުމަކުން ވާހަކަ ދައްކަވާފައިވުމެވެ. އޭނާ ވިދާޅުވި ގޮތުގައި ވަރަށް ގިނަ ބަޔަކު ޑީއެމް ބެކްޗެނެލްތައް ބޭނުން ކުރާތީ ކްލަބްހައުސް އަށް ވެސް އެ ފީޗާ އައުމަކީ މުހިއްމު ކަމަށް ވެދާނެ އެވެ. އެކަމަކު އެ ވާހަކަ އެ ހިސާބުން ޕޯލް ކުރުކޮށްލެއްވީ އެވެ.

ކްލަބްހައުސްގެ ތަރުޖަމާނު ޓެކް ކްރަންޗަށް މިދިޔަ ހަފުތާގައި ވިދާޅުވެފައިވާ ގޮތުގައި އެތަނުން އަންނަނީ އެކި ފީޗާތައް މިހާރު ވެސް ޓެސްޓްކުރަމުންނެވެ. އަދި އެފަދަ މަސައްކަތްތައް އަބަދު ވެސް ހިނގާނެ ކަމަށާއި އެކަން ގުޅެނީ އެޕަށް އަންނަ ކުރިއެރުންތަކާ ކަމަށް ވިދާޅުވި އެވެ.

"އެހެންވީމަ މި ބުނާހެން ޓެސްޓްކުރެވޭ ބައެއް ފީޗާތަކަކީ ހަމަ މައި އެޕަށް އައުން އެކަށީގެންޗާ ފީޗާތަކެއް." ތަފުސީލަކަށް ވަޑައިގެން ތަރުޖަމާނު ވިދާޅުވި އެވެ.

ކުރު މުއްދަތެއްގެ ތެރޭގައި ކްލަބްހައުސް މިހާރު ސޯޝަލް މީޑިއާގެ މައިދާނުގައި ބޮޑު ކުރިއެރުންތަކެއް ހޯދާފައިވާ އިރު، ފާހަގަކޮށްލެވޭ ކަމަކީ މި އެޕް ކޮޕީކުރަން ފޭސްބުކާއި ޓްވިޓާ އާއި ޑިސްކޯޑާއި ސްޕޮޓިފައި ކަހަލަ ޕްލެޓްފޯމްތަކުން ލަދަކުން ވެސް ނޫޅޭކަމެވެ.