ކްލަބަށް އިސްކަންނުދޭ ތިން ކުޅުންތެރިއަކަށް ސާންތީ ފިޔަވަޅު އަޅައިފި

ކްލަބަށް ވުރެ ފުޓްސަލް މުބާރާތްތަކަށް އިސްކަންދިން އީގަލްސްގެ ޒުވާން ތިން ކުޅުންތެރިން ކަމަށްވާ އިބްރާހިމް މުބީން (މުއްކި) އާއި ރިހާމް އަބްދުލްގަނީ (ބޮބީ) އަދި ހަސަން ރާއިފް (ހަންނަ) އަށް އެސްޓީއޯ މާލޭ ލީގުގެ ދެ ވަނަ ބުރުގައި ދެން ފުރުސަތު ނުދޭން އެ ޓީމުގެ ކޯޗު އިހުސާން އަބްދުލްގަނީ (ސާންތީ) ނިންމައިފި އެވެ.

ސާންތީ ބުނީ ތިން ކުޅުންތެރިންނަކީ ވެސް ޓީމަށް ވަރަށް މުހިއްމު ކުޅުންތެރިން ކަމަށާއި އެކަމަކު އޭނާ އަށް ފުޓްބޯޅައިގައި ފުރަތަމަ އަންނާނީ ޑިސިޕްލިން ކަމަށާއި ނަތީޖާ އަކީ ފަހުގެ ކަމެއް ކަމަށެވެ.

އަޅުގަނޑަކީ ކުޅުންތެރިން އުފައްދަން މަސައްކަތްކުރާ މީހެއް. އަޅުގަނޑަކީ އިމީޑިއޭޓް ރިޒަލްޓް ނެރެވޭ ވަރުގެ ކޯޗެއް ނޫން އެކަން އަޅުގަނޑު ގަބޫލުކުރަން. އަޅުގަނޑު ކުޅުންތެރިންނަށް ފުރުސަތު ދީގެން ކަންތައްތަކެއް ކުރާ މީހެއް. ހަގީގަތުގައި ބޮބީ އަކީ ވެސް އަޅުގަނޑު އެގޮތަށް ފުރުސަތު ދީގެން މިތަނުގެ މީޑިއާގައި މި މޭޒު ދޮށުގައި އިދެގެން (ވާހަކަ ދެއްކި ކުޅުންތެރިއެއް). ފަހުން ނެޝަނަލް ޓީމުން ވެސް ފުރުސަތު ލިބުނީ އަދި މިހާރު އެވޯޑްސްގެ ޔޫތު ފަސް ޕްލެޔަރުންގެ ފަސް ޕްލެޔަރުންގެ ތެރޭގައި ވެސް ހިމެނިފައިވަނީ،" ސާންތީ ބުންޏެވެ.

އޭނާ ބުނީ ކިތަންމެ މޮޅު ކުޅުންތެރިއަކަށް ވިޔަސް، އޭނާ އީގަލްސްގައި ހުރިހާ ހިނދެއްގައި އޭނާގެ ކްރައިޓީރިއާއަށް ނުފެތެންޏާ ނުބަހައްޓާނެ ކަމަށެވެ.

"އަޅުގަނޑު ކުޅުންތެރިއަކާ މެދު ޑިސިޕްލިނާ ގުޅޭ ޑިޒިޝަނެއް ނަގަން މެނޭޖްމަންޓަށް މަޖުބޫރުކުރާނީ އަޅުގަނޑަށް އެކަން ނުވީމާ. ތަކުރާރުކޮށް ކުޅުންތެރިންނަށް އެންގިން. ޓީމު މެނޭޖަރާއި އަޅުގަނޑާއި ކޯޗުން ސްޓާފުން ނުވީމާ ދެން ހިސާބުން ޑިޒިޝަން ނަގާނީ،" ސާންތީ ބުންޏެވެ.

ސާންތީ ބުނީ މުއްކި އާއި ބޮބީ އަކީ ވަރަށް މުހިއްމު ދެ ކުޅުންތެރިން ކަމަށާއި އަދި ހަންނަ އަކީ ވެސް އެހާ މުހިއްމު ކުޅުންތެރިއެއް ކަމަށެވެ. އެކަމަކު އެ ތިން ކުޅުންތެރިން ވެސް އީގަލްސް އަށް ވުރެ އިސްކަންދިނީ "އައްޑޫގައި އޮތް މުބާރާތަށް، ވިލިނގިލީގައި އޮތް މުބާރާތަކަށް އަދި ބީޖީ ދަނޑުގައި ބާއްވާ މުބާރާތަކަށް" ކަމަށެވެ.

ދެން އަދި ކުރިއަށް އޮތްތަނުގައި އީދުގެ ތެރޭގައި އެބަ ބާއްވާ މުބާރާތްތަކެއް. އަދި ރެޑްބުލް އިން ބާއްވާ ބޭރުގެ މުބާރާތެއް. ދެން މި ހުރިހާ ކަމަކަށް އިސްކަންދީފައި އެ ކުޅުންތެރިންގެ މުސްތަގުބަލަށް ބަލާފައި އަޅުގަނޑު މި ނިންމީ އެ ކުޅުންތެރިން އެއްކޮށް އެކަންތައްތަކަށް (އެއްކޮށް ދޫކޮށްލީ). އެ ކުޅުންތެރިންނަށް ކޮންސެންޓްރޭޓް ނުކުރާނަން މި ބުރުގައި ދެން. އެ ކުޅުންތެރިން ނުލާ ދެން ތިބި ކުޅުންތެރިން ގޮވައިގެން އަޅުގަނޑު އުޅޭނީ،" ސާންތީ ބުންޏެވެ.

ސާންތީ ބުނީ މީގެ ކުރިން ބައެއް ކުޅުންތެރިން ފުޓްސަލް މުބާރާތްތަކަށް ދޫކުރި ކަމަށާއި އެކަމަކު އެއީ އޮފީސް ޓީމަށް ކުޅެން ކަމަށެވެ. އެކަމަކު ދެ މީހަކު އެއްވެލާފައި ބާއްވާ މުބާރާތްތަކަށް، އީގަލްސް އިން ލައްކައިން ހަރަދުކޮށްފައި ތިބި ކުޅުންތެރިން ދޫކުރަން ބޭނުންނުވާ ކަމަށެވެ. އެ ކުޅުންތެރިންނަށް ފުޓްސަލް ޓީމުތަކަށް ފެންނަނީ ވެސް އީގަލްސްގައި ނުވަތަ ފުރަތަމަ ޑިވިޝަނުގައި ކުޅެނިކޮށްކަން ވެސް ސާންތީ ފާހަގަކުރި އެވެ.

"ދެން އަޅުގަނޑުމެން ކޯޗުންނަކީ އަބަދުވެސް މިހެން ބާއްވާ ފުޓްސަލް މުބާރާތްތަކަށް ކުޅުންތެރިން ފިޓްކޮށް ތައްޔާރުކުރަން ތިބޭ ބަޔަކަށް ވެގެން މިކަންތައްތަކެއް ނުވާނެ،" ސާންތީ ބުންޏެވެ.

ސާންތީ ބުނީ މިކަމުގައި ކުޅުންތެރިން އެއްކޮށް ގޯސް ނުކުރާނެ ކަމަށާއި ކްލަބްތަކާއި އެފްއޭއެމާއި މުބާރާތްތައް ބާއްވާ މުބާރާތްތަކުން އިށީނދެ ހަރަދުނާ ގަވާއިދުތަކެއް ހެދިއްޖެ ނަމަ އެންމެންނަށް ވެސް ފައިދާވާނެ ކަމަށެވެ.

އޭނާ ފާހަގަކުރި ގޮތުގައި ބޮޑެތި ޓީމުތަކުގައި ތިބޭ މަޝްހޫރު ކުޅުންތެރިން ވެސް ފުޓްސަލް ކުޅޭތަން ފެންނަ ކަމަށައި ކްލަބްތަކުން ކުޅުންތެރިން އުފައްދައި ފިޓްކުރުމުން އެހެން ބަޔަކު އޭގެ އެޑްވާންޓޭޖް ނަގާ ކަމަށެވެ.

"ހަގީގަތުގައި ފުޓްބޯޅަ އާއި ފުޓްސަލް ވަކިވާ ހިސާބުން މިކަން ހައްލުވާނެ. އެފްއޭއެމްގެ މިހާރުގެ މެނޭޖްމަންޓުން އަންނަނީ މިކަމަށް މަސައްކަތްކުރަމުން. އެފްއޭއެމްގެ ރައީސް ބައްސާމް ވެސް ވަރަށް ފަހުން ޔަގީންކަން ދެއްވާފައި އޮތީ. ކްލަބް ލައިސަންސިން ސިސްޓަމް އަންނަ އަހަރު ހިނގަން ފެށީމާ މިކަންކަން ހައްލުވެގެންދާނެ،" ސާންތީ ބުންޏެވެ.

އީގަލްސްގެ މެދުތެރޭގައި މިދިޔަ ދެ އަހަރު ވެސް މުއްކި މޮޅު ކުޅުމެއް ދެއްކިއިރު ބޮބީ އަކީ މި އަހަރު ފާހަގަވި ކުޅުންތެރިއެކެވެ. ގައުމީ ސްކޮޑުން ޖާގަ ހޯދުމުގެ އިތުރުން އޭނާ ވަނީ މިހާރު އެވޯޑްސްގެ ޒުވާން ކުޅުންތެރިއާގެ އެވޯޑަށް ލީގުގެ ފުރަތަމަ ބުރުން ނޮމިނޭޓްވެފަ އެވެ. ހަންނަ އަކީ މިދިޔަ އަހަރު ވިދާލި އުއްމީދީ ކުޅުންތެރިއެކެވެ.