ޖޫނިއާ ޓެނިސް ކުރިއެރުވުމަށް ބޮޑު އެހީތެރިކަމެއް

ރާއްޖޭގެ ޖޫނިއާ ފެންވަރުގެ ޓެނިސް ކުރިއެރުވުމަށް، ރާއްޖޭގައި ރިޒޯޓް ތަރައްގީކުރާ ތުރުކީ ކުންފުންޏެއް ކަމަށްވާ އަލީބޭ މޯލްޑިވްސް ޕްރައިވެޓް ލިމިޓެޑުން ޓެނިސް އެސޯސިއޭޝަނާ އެކު އެމްއޯޔޫއެއްގައި ސޮއިކޮށްފި އެވެ.

މި އެއްބަސްވުމުގެ ދަށުން ތުރުކީގައި ދިވެހި ކުޅުންތެރިން ތަމްރީން ކުރުމަށް އަލީބޭ އިން އެހީތެރިވާނެ އެވެ. އެގޮތުން ތުރުކީގެ އަނަޓޯލިއާގައި ހުންނަ ޔޫރަޕުގެ އެންމެ ބޮޑު ޓެނިސް ސްކޫލުގައި ކޮންމެ އަހަރަކު 15 ކުޅުންތެރިންނާއި އޮފިޝަލުން ތަމްރީން ކުރާނެ އެވެ. ހުރިހާ ހަރަދެއް ކުރާނީ އަލީބޭ އިންނެވެ. މި ޕްރޮގްރާމް ތިން އަހަރު ވަންދެއް ހިންގާނެ އެވެ.

ސޯލްޓް ކެފޭގައި އިއްޔެ ބޭއްވި ރަސްމިއްޔާތެއްގައި ޓެނިސް އެސޯސިއޭޝަނުގެ ފަރާތުން އެމްއޯޔޫގައި ސޮއިކުރެއްވީ އެސޯސިއޭޝަނުގެ ރައީސް އަހުމަދު ނަޒީރެވެ. އަލީބޭގެ ފަރާތުން ސޮއިކުރެއްވީ ޑިރެކްޓަރު އެސިން ގުރަލް އަގަޓެވެ.

ޓެނިސް އެސޯސިއޭޝަނުން އަންނަނީ ޔޫތު ޑިވެލޮޕްމަންޓް ޕްރޮގްރާމް ވަރަށް ފުޅާ ދާއިރާއެއްގައި ހިންގަމުންނެވެ. އެ ޕްރޮގްރާމުން އުފެދުނު ބައެއް ކުޅުންތެރިން މިހާރު ވަނީ ގައުމީ ފެންވަރުގައި ވެސް ވިދާލައިފަ އެވެ.