ސައްޓު ފަހު ހާފުގައި އަރައި މިލަންދޫ ސަލާމަތްކޮށްދީފި

ފަހު ހާފުގައި ކުޅެން އަރައި އިޝާން އިބްރާހިމް (ސައްޓު) ޖެހި ދެ ލަނޑާ އެކު އުރީދޫ ދިވެހި ޕްރިމިއާ ލީގުގައި މިއަދު ހަވީރު ށ. މިލަންދޫ އިން އއ. މާޅޮހާ ފަހު ވަގުތު 2-2 އިން އެއްވަރުކޮށްފި އެވެ.

ފުރަތަމަ މެޗުން ބަލިވެފައިވާ ދެ ޓީމުން ގަލޮޅު ދަނޑުގައި މިއަދު ހަވީރު ކުޅުނު މެޗުގެ 28 ވަނަ މިނެޓުގައި ސްޕެއިން ފޯވާޑް އެންހެލް މުނޯޒް ވަނީ މާޅޮހަށް ލީޑު ނަގައިދީފަ އެވެ. އޭގެ ކުރިން މިލަންދޫގެ މުހައްމަދު ޒަމީރާއި އިބްރާހިމް ޝިޔާމަށް ރަނގަޅު ފުރުސަތުތަކެއް ލިބި ބޭކާރުވި އެވެ.

ފުރަތަމަ ހާފުގެ ފަހުކޮޅު މާޅޮހުގެ އެންހެލް އަށް ލީޑު ފުޅާކުރަން ރަނުގެ ދެ ފުރުސަތު ލިބުނެވެ. އެގޮތުން 31 ވަނަ މިނެޓުގައި އޭނާ އޭރިއާ ތެރެއިން ބޮލުން ފޮނުވާލި ބޯޅަ މިލަންދޫގެ ގޯލްކީޕަރު މުހައްމަދު އިމްރާން މަތަކުރިއިރު 33 ވަނަ މިނެޓުގައި އޭނާ ފޮނުވާލި ބޯޅަ ވެސް ކީޕަރު މަތަކުރި އެވެ.

ދެ ވަނަ ހާފު ފަށައިގެން 68 ވަނަ މިނެޓުގައި މާޅޮހުން ވަނީ ލީޑު ފުޅާކޮށްފަ އެވެ. ނިއު ރޭޑިއަންޓުގެ ކުރީގެ ކެޕްޓަން އަހުމަދު މުހައްމަދު އައްމަޑޭ ހިލޭ ޖެހުމަކުން ހުރަސްކުރި ބޯޅަ ގޯލުގެ ތެރެއަށް ބޮލުން ޖަހައި ވައްދާލީ އިބްރާހިމް ނާއިފެވެ.

މާޅޮސް ފަސޭހަކަމާ އެކު މެޗު ކާމިޔާބުކުރާނެ ކަމަށް ބެލެވުނު ނަމަވެސް މެޗުގެ ފަސް މިނެޓުގެ ތެރޭ މިލަންދޫ އިން ނަތީޖާ އަނބުރާލި އެވެ. އެ ޓީމުގެ ފުރަތަމަ ގޯލް 86 ވަނަ މިނެޓުގައި ސައްޓު ޖެހީ ހުސެއިން ވިސާލް މެދުތެރެއިން ނެގި ހުރަސް އޭރިއާ ތެރެއިން ކޮންޓްރޯލްކޮށްލުމަށް ފަހު ގޯލްކީޕަރު ބޯމަތިން ގޯލުގެ ތެރެއަށް ވައްދާލައިގެންނެވެ.

މިނިވަން ޗެމްޕިއަންޝިޕުގައި ބ. އޭދަފުށީ ޓީމުގައި މޮޅު ކުޅުމެއް ދެއްކި އެ ރަށަށް އުފަން ފޯވާޑް މިލަންދޫ އަށް އެއްވަރުކޮށްދިނީ 90 މިނެޓު ހަމަވެ އިތުރަށް ދިން ވަގުތުގެ ފަހު މިނެޓުގަ އެވެ. އޭރިއާ ތެރެއިން ސައްޓު އަށް ލިބުނު ބޯޅަ ކީޕަރު ކައިރިން ކުޑަކޮށް ނައްޓާލުމަށް ފަހު އޭނާ ފޮނުވާލުމުން ގޯލަށް ވަނީ ފުރޮޅިފައި ކަހަލަ ގޮތަކަށް ގޮހެވެ.

މިލަންދޫ ޓީމުގެ ކޯޗު މުހައްމަދު ނާސިރު ބުނީ އޭނާގެ ޓީމަކީ އަބަދުވެސް ވަރަށް ހިތްވަރުކުރާ ޓީމެއް ކަމަށާއި މިއަދު ވެސް ފެނިގެން ދިޔައީ އެ މަންޒަރު ކަމަށެވެ.

"އަޅުގަނޑު ވެސް އަބަދު ބުނަމުން މި އަންނަނީ އިދިކޮޅު ޓީމުން ގޯލެއް ޖެހިޔަސް ހިތްވަރު އެލުވާނުލައްޗޭ. އެއީ ފަހު މިނެޓާ ހަމައަށް ވެސް ފުރުސަތު އޮންނާނެތީ. ކުޅުންތެރިން މިއަދު ވަރަށް ހިތްވަރުކުރި. އޭގެ ނަތީޖާ މިއީ،" ގައުމީ ޓީމުގެ ކުރީގެ ޑިފެންޑަރު ބުންޏެވެ.

އޭނާ ބުނީ އޭދަފުށީގައި ވަޒީފާއަދާކުރާ ސައްޓު އަށް އަދި ރިލީޒް ހަމަނުޖެހޭ ކަމަށާއި ކުރިއަށް އޮތްތަނުގައި އޭނާ މިލަންދޫ ޓީމުގެ ފުރަތަމަ އެގާރައިގައި ކުޅެ މުހިއްމު ދައުރެއް އަދާކުރާނެ ކަމަށެވެ.

މާޅޮހުގެ ކޯޗު އަލީ ނިޝްތާރު ބުނީ ފަހު ވަގުތު ބަލިވުމުގައި ފިޓްނަސް ދަށްވުން ފަދަ މައްސަލަތައް ދިމާވި ކަމަށާއި އިތުރަށް ކުޅެ ޕްރެކްޓިސް ކުރެވޭ ވަރަކަށް އެކަންކަން ހައްލުވާނެ ކަމަށެވެ.

"ފުރުސަތުތަކެއް ލިބުނު. އެކަމަކު މޮޅެއް ހައްގެކޭ ނުބުނާނަން. ސަބަބަކީ ފުޓްބޯޅައިގައި އަބަދުވެސް އެ ޓީމަކަށް ހައްގު ނަތީޖާއެއް ލިބޭނީ. މިއަދު އަޅުގަނޑުމެންނަށް ހައްގު ވަނީ އެއް ޕޮއިންޓް،" ނިޝްތާރު ބުންޏެވެ. "ކުޅުންތެރިން ފަހު ވަގުތު ވެސް ހިތްވަރުކުރި. އެކަމަކު ބުންވަރު ދަށްވުން ފަދަ ކަންތައް ދިމާވުމުން ހިފަހައްޓާނުލެވުނީ. ހާއްސަކޮށް ކްރެސްޕޯ (އަބްދުﷲ އިބްރާހިމް) ބޭލި ހިސާބުން މެދުތެރެ ދަށްވެގެން ދިޔަ."