ގްރީންގެ އައްމަޑޭ މާޒިޔާ އަށް ސޮއިކޮށްފި

ގްރީން ސްޓްރީޓްސްގެ އައްމަޑޭ (ވ) ކައިރިން ޓީސީގެ ފޭދޫ އިއްބެ ބޯޅަ ހިފައިގެންދާން މަސައްކަތްކުރަނީ.-- ފޮޓޯ: ނިޝާން އަލީ/ މިހާރު

އައްޒާމް އަލިފުޅު، މިހާރު

02 ޖެނުއަރީ 2018 - 11:40

1 comments

ނިމުނު ސީޒަނުގައި ގްރީން ސްޓްރީޓްސް މެދުތެރެއިން މޮޅު ކުޅުމެއް ދެއްކި އަހުމަދު ހަސަން (އައްމަޑޭ) ގެނެސް، މާޒިޔާ ސްޕޯޓްސް އެންޑް ރެކްރިއޭޝަނުން އެ ޓީމުގެ ޒުވާން ގޯލްކީޕަރު ހުސެއިން ޝަރީފަށް ދިގު މުއްދަތުގެ ކޮންޓްރެކްޓެއް ދީފި އެވެ.

އައްމަޑޭގެ އިތުރުން ދާދި ފަހުން ނިމުނު ޔޫތު ޗެމްޕިއަންޝިޕް ފުޓްބޯޅަ މުބާރާތުގައި މާޒިޔާގެ ޒުވާން ޓީމަށް ކުޅުނު އަބްދުﷲ ޖުނައިދަށް ވެސް ވަނީ ސީނިއާ ޓީމުން ފުރުސަތުދީފަ އެވެ.

ލާޒްލޯ ކިސްގެ އިރުޝާދުގެ ދަށުން 2016 ވަނަ އަހަރު ވިކްޓަރީ އަށް މޮޅު ކުޅުމެއް ދެއްކި އައްމަޑޭ ބޮޑަށް ފާހަގަވަނީ ވަރަށް ބޮޑަށް މަސައްކަތްކުރާ މިޑްފީލްޑަރެއްގެ ގޮތުގަ އެވެ. ވިކްޓަރީން އޭނާގެ ކުޅުން ފާހަގަވުމުން މިދިޔަ އަހަރު އަލަށް ފުރަތަމަ ޑިވިޝަނުގައި ވާދަކުރި ގްރީން ސްޓްރީޓްސް އިން އޭނާ ހޯދި އެވެ.

އެސްޓީއޯ މާލޭ ލީގުގެ ދެ ވަނަ ގްރީން ސްޓްރީޓްސް އިން ހޯދިއިރު ވަރުގަދަ މެޗުތަކުގައި ޓީމުގެ މެދުތެރެ ބެލެހެއްޓުމަށް އައްމަޑޭ ވަނީ މޮޅު ކުޅުމެއް ދައްކައިފަ އެވެ. ހާއްސަކޮށް ގްރީން ސްޓްރީޓްސް އިން ނަން މަޝްހޫރު ބޮޑެތި ޓީމުތަކާ ދެކޮޅަށް އޭނާ ދެއްކި ކުޅުމަށް އޭރު ގްރީން ސްޓްރީޓްސްގެ ކޯޗު ސޮބާހު މުހައްމަދު (ސޮބާ) ވެސް ވަނީ ތައުރީފް ކޮށްފަ އެވެ.

އިސްމާއިލް މަހަފޫޒްގެ ކޯޗުކަމުގައި އަންނަ ސީޒަނަށް މާޒިޔާ ވަރުގަދަ ކުރަމުން އަންނައިރު އެ ޓީމުން ވަނީ ޓީސީގެ ނާއިޒު ހަސަން (ދާދު) ގެ ސޮއި ވެސް ހޯދައިފަ އެވެ. އަދި މީގެ އިތުރުން އެ ޓީމަށް މިދިޔަ ސީޒަނުގައި މޮޅު ކުޅުމެއް ދެއްކި މޫސާ ޔާމީން (ޔާމްބެ) އާއި މުހައްމަދު އިރުފާން (އިރޭ) އާއި ސަމޫހު އަލީ (ސަމުއްޓެ) އަދި ޔަސްފާދު ހަބީބު (މުލަކޭ) ވަނީ އެ ޓީމާ އެކު ހަދާފައިވާ އެއްބަސްވުން އާ ކޮށްފަ އެވެ.

މާޒިޔާ ދޫކޮށްދިޔަ ކުޅުންތެރިންގެ ތެރޭގައި ހިމެނެނީ މިިދިޔަ އަހަރުތަކުގައި އެ ޓީމަށް މޮޅު ކުޅުމެއް ދެއްކި ގައުމީ ޓީމުގެ މިޑްފީލްޑަރު މުހައްމަދު އުމެއިރު އެވެ. އޭނާ ބަދަލުވީ ނިއު ރޭޑިއަންޓަށެވެ.