ފަސް ހެޓްރިކާ އެކު ރިޒޭ ދުނިޔޭގެ ރެކޯޑަކާ ހަމަކޮށްފި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ޖެހިޖެހިގެން ފަސް މެޗުގައި ހެޓްރިކް ހަދައި ކްލަބް އީގަލްސްގެ ފޯވާޑް އަހުމަދު ރިޒުވާން (ރިޒޭ) ދުނިޔޭގެ ރެކޯޑަކާ ހަމަކޮށްފި އެވެ.

ގިނީސް ވޯލްޑް ރެކޯޑްސްގައި ވާ ގޮތުން ޖެހިޖެހިގެން އެންމެ ގިނަ މެޗުތަކުގައި ހެޓްރިކް ހެދުމުގެ ރެކޯޑް މީގެ ކުރިން އޮތީ ކްރޮއޭޝިއާގެ ސްޓޭޓް ލީގެއް ކަމަށްވާ ޑަކޯވޯ ލީގުގެ އެންކޭ ޒިރިންސްކީގެ ފޯވާޑް ސްޓެފަން ލުސިޖަނިޗް އަތުގަ އެވެ. އޭނާ ރެކޯޑް ހެދީ 2016 ވަނަ އަހަރުގައި ފަސް މެޗުގައި ހެޓްރިކް ހަދައި، ޖުމްލަ 20 ގޯލު ޖަހައިގެންނެވެ.

ޖެހިޖެހިގެން އެންމެ ގިނަ ހެޓްރިކް ހެދުމުގެ ރެކޯޑް ކުރިން އޮތީ ޖަޕާން ގައުމީ ޓީމުގެ ކުރީގެ ފޯވާޑް މަސަޝީޖާ ނަކަޔާމޫ އަތުގަ އެވެ. އޭނާ ވަނީ 1998 ވަނަ އަހަރު ޖަޕާނުގެ ކްލަބެއް ކަމަށްވާ ޖުބީލޯ އިވާޓާ އަށް ކުޅުނުއިރު ޖެހިޖެހިގެން ހަތަރު މެޗުގައި ހެޓްރިކް ހަަދައިފަ އެވެ.

ރިޒޭ ހެޓްރިކް ރެކޯޑާ ހަމަކުރީ ފަސް މެޗުން ހެޓްރިކް ހަދައި ޖުމްލަ 16 ގޯލާ އެކު އެވެ. ރިޒޭ ހެޓްރިކް ހެދީ ތ. ތިމަރަފުށި، ބ. ފެހެންދޫ، ށ. ފޯކައިދޫ އަދި ފ. ނިލަންދޫއާ ދެކޮޅަށް ކުޅުނު ދެ މެޗުގަ އެވެ. އޭގެ ތެރެއިން ނިލަންދޫ ކޮޅަށް ފުރަތަމަ ބުރުގައި ރިޒޭ ޖެހި އެއް ގޯލު އެ ދުވަހު ނިންމާފައިވަނީ ބައި ގޯލެއް ކަމަށެވެ. އެކަމަކު ފަހުން އެފްއޭއެމުން ވަނީ އެ ގޯލުގެ ވީޑިއޯ ދިރާސާކޮށް ރިޒޭ ޖެހި ގޯލެއް ކަމަށް ނިންމައިފަ އެވެ.

އެއާ އެކު ކ. ދިއްފުއްޓަށް އުފަން ރިޒޭ ވެފައިވަނީ ދުނިޔޭގެ ތާރީހީ ރެކޯޑަކާ ހަމަކުރި ރާއްޖެ އަށް ނިސްބަތްވާ ފުރަތަމަ ކުޅުންތެރިޔާ އަށެވެ. ފަސް މެޗަށް ފަހު ރިޒޭގެ ލަނޑު ޖެހުމުގެ ސިލްސިލާ އަށް ނިމުމެއް އައީ ލީގުގައި އެންމެ ފަހުން މާޒިޔާ އަތުން 1-0 އިން އީގަލްސް ބަލިވުމުންނެވެ.

ފަސް މެޗުން ފަސް ހެޓްރިކް ހެދުމުން ރިޒޭ އަށް އީގަލްސްގެ ކޯޗު މުހައްމަދު ޝިޔާޒް (މޯހަން) ވަނީ ތައުރީފް ކޮށްފަ އެވެ. ލީގުގައި ނިލަންދޫ އަތުން މޮޅުވި މެޗަށް ފަހު މޯހަން ބުނީ "ފަސް މެޗުން ފަސް ހެޓްރިކް ހެދުމަކީ ދުނިޔޭގެ ފެންވަރުގައި ވެސް ފަސޭހަކަމެއް ނޫން" ކަމަށެވެ.

ގައުމީ ޓީމުގެ ކޯޗަކަށް ކުރިން ހުރި އޮސްޓްރޭލިއާގެ ޑަރެން ސްޓެވާޓްގެ ކޯޗުކަމުގައި ރިޒޭ އަށް ރަނގަޅު މެޗުތަކެއްގައި ކުޅުމުގެ ފުރުސަތު ލިބުނެވެ. އެ ފުރުސަތުތަކުގެ ބޭނުން ހިފައި އޭނަ ތަފާތު ދެއްކި އެވެ. އެކަމަކު ގައުމީ ޓީމުގެ ކޯޗުކަމާ ކްރޮއޭޝިއާގެ ޕީޓާ ސެގާޓް ހަވާލުވި ފަހުން އަދި މިހާތަނަށް ގައުމީ ޓީމުން ރިޒޭ އަށް ޖާގަ ލިބިފައިނުވެ އެވެ.

އެނގިފައިވާ ގޮތުގައި އަންނަ މަހު ތިން ވަނަ ދުވަހު މެލޭޝިއާއާ ދެކޮޅަށް ގައުމީ ޓީމު ކުޅޭ މެޗަށް ނެގި ސްކޮޑުގައި ރިޒޭ ހިމެނެ އެވެ. ރިޒޭ އަށް އެންމެ ފަހުން ގައުމީ ޓީމުން ޖާގަ ލިބުނީ މިދިޔަ އަހަރު ނޮވެމްބަރު މަހުގަ އެވެ.

މި ސީޒަނުގައި 23 ލަނޑު ޖަހާފައިވާ ރިޒޭ ވަނީ ރާއްޖޭގެ އެންމެ އުއްމީދީ ކުޅުންތެރިޔާގެ މަގާމު ވެސް ހޯދައިފަ އެވެ. ރިޒޭ ވަނީ މިހާތަނަށް ރާއްޖޭގެ ފުޓްބޯޅައިގެ ތަޖުރިބާކާރު ތިން ކޯޗުންނާ އެކު މަސައްކަތްކޮށްފަ އެވެ. އީގަލްސްގައި މީގެ ކުރިން އިހުސާން އަބްދުލް ގަނީ (ސާންތީ)އާ އެކު މަސައްކަތްކުރި އެވެ. މިދިޔަ ފަހަރު ޕްރިމިއާ ލީގުގައި ގދ. ތިނަދޫ ޓީމަށް ރިޒޭ ކުޅުނީ އަލީ ސުޒޭންގެ އިރުޝާދުގެ ދަށުންނެވެ. މިހާރު މޯހަންގެ ކޯޗުކަމުގައި މޮޅު ކުޅުމެއް ދައްކަމުން އަންނައިރު، މީގެ ކުރިން ސުޒޭން އާއި ސާންތީ ވެސް ވަނީ ރިޒޭ އަށް ތައުރީފްކޮށް ވާހަކަ ދައްކައިފަ އެވެ.

ލީގު މެދުކަނޑާލުމުގެ ކުރިން އީގަލްސް ކުޅޭ މެޗުގައި މާދަމާ ހަވީރު ނުކުންނާނީ ކްލަބް ގްރީން ސްޓްރީޓްސްއާ ދެކޮޅަށެވެ.