ކޮމިޓީ ނުހަދައި ކުރަންވީ މަޝްވަރާ: ބައްސާމް

އެފްއޭއެމްގެ ކަމަކާ މެދު ހިތްހަމަނުޖެހި ކަމެއް އޮޅުންފިލުވަން ބޭނުންވެއްޖެނަމަ ސަރުކާރުގެ ވުޒާރާތަކުން ކޮމިޓީތައް ހެދުމުގެ ބަދަލުގައި އެންމެ ރަނގަޅު ގޮތަކީ އެފްއޭއެމާ މަޝްވަރާކުރުން ކަމަށް އެ އިދާރާގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.

މި އަހަރުގެ އޭއެފްސީ ކަޕުން ރާއްޖޭގެ ކްލަބްތަކަށް ފުރުސަތު ނުލިބުނު މައްސަލަ ބަލަން، ސްޕޯޓްސް މިނިސްޓަރު އަހުމަދު މަހުލޫފު ކޮމިޓީއެއް އުފެއްދެވުމުން، އެކަމުގައި އެފްއޭއެމުން އޭއެފްސީގެ ލަފާ ހޯދުމުން އެ އިދާރާ އިން ވަނީ އެކަން ހުއްޓާލުމަށް ނުސީދާކޮށް އިންޒާރު ދީފަ އެވެ. އެކަމަކު ފަހުން މަހުލޫފު ވިދާޅުވީ ބަލަނީ ދައުލަތުން ފުޓްބޯޅައަށް ހަރަދުކުރާ ފައިސާ އަށް ވީގޮތް ކަމަށާއި އެފްއޭއެމް ތެރެއަށް ނުވަންނާނެކަން އެފްއޭއެމްގެ ރައީސް ބައްސާމަށް އަންގާފައި ކަމަށެވެ.

އޭއެފްސީން އެ ފަހަރު އެންގީ އެފްއޭއެމް އަކީ މިނިވަން، ނޮން ގަވަމެންޓަލް އޯގަނައިޒޭޝަނެއްކަން ސަމާލުކަމަށް ގެންނަ ކަމަށާއި ހުރިހާ މެމްބަރު އެސޯސިއޭޝަނަކުން ވެސް ޒިންމާތައް އަދާކުރަން ޖެހޭނީ ތިން ވަނަ ފަރާތެއްގެ އެއްވެސް ހުރަހެއް ނެތިކަމަށެވެ. އަދި އެކަންކަމަށް ރިއާޔަތްކޮށް، އޭއެފްސީން ޔަގީންކޮށް ދެނީ ތިން ވަނަ ފަރާތެއްގެ އެއްވެސް ނުފޫޒެއް އަންނަ އައުން ތަހައްމަލުނުކުރާނެކަން ކަމަށެވެ.

ފުރަތަމަ އުފެއްދި ކޮމިޓީގެ މަސައްކަތްތައް މަޑުޖެހިފައިވަނިކޮށް ކުޅިވަރާ ބެހޭ ވުޒާރާގެ ވަގުތީ މިނިސްޓަރު އަލީ ވަހީދު ވަނީ ދާދި ފަހުން ދިވެހި ފުޓްބޯޅަ އަށް ދިމާވެފައިވާ މައްސަލަތައް ހައްލުކުރުމަށް "ޑިސްޕިއުޓް ރިޒޮލިއުޝަން ކޮމިޓީ" އެއް އުފައްދައިފަ އެވެ.

ފުރަތަމަ ޑިވިޝަނުގެ ފަސް ކްލަބެއްގެ އޮފިޝަލުންނާ އެކު އިއްޔެ އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ބައްސާމް ވިދާޅުވީ ކޮމިޓީތައް ހަދާއިރު އެކަން އެއީ ކުރެވޭނެ ކަމެއްތޯ ވިސްނާލަން ޖެހޭ ކަމަށެވެ.

"އަޅުގަނޑަށް ހީވަނީ ވުޒާރާތަށް ހިންގަވާ ބޭފުޅުން ވެސް އިންޓަނޭޝަނަލް ފުޓްބޯޅައިގެ ގަވައިދުތަކާއި ގާނޫނުތައް އެނގެން އެބަޖެހޭ. ފުޓްބޯޅަ އަކީ އަމިއްލަ އެންޓިޓީއެއް. އިންޑިޕެންޑެންޓް އެންޓިޓީއެއްގެ ގޮތުގައި މަސައްކަތްކުރަން ޖެހޭ ތަނެއް. ފީފާ އާއި އޭއެފްސީގެ ގަވައިދުތަކާ އެއްގޮތަށް،" ބައްސާމް ވިދާޅުވި އެވެ.

ބައްސާމް ވިދާޅުވީ ޔޫތު މިނިސްޓްރީން އެންމެ ފުރަތަމަ ހެދި ކޮމިޓީގެ ސަބަބުން ވެސް ފީފާ އާއި އޭއެފްސީގެ ހިތްހަމަ ނުޖެހުންތަކެއް ފެނި ރާއްޖެ އަށް އިންޒާރު ވެސް ދިން ކަމަށާއި އަނެއްކާ ވެސް އެ ފަދަ ކަމެއް ކުރާނަމަ ފީފާ އާއި އޭއެފްސީ ބަލާނެ ކަމަށެވެ.

"ތިން ވަނަ ފަރާތެއްގެ ނުފޫޒު ފޯރުވާނަމަ ޒީރޯ ޓޮލަރަންސް އެމީހުން (ފީފާ އާއި އޭއެފްސީ) ގެންގުޅުއްވަނީ. އެހެންވީމަ މި ކަމުގައި ވެސް އަޅުގަނޑު ދަންނަވާނީ ކޮމިޓީތައް ހެދުމުގެ ބަދަލުގައި ޑައިރެކްޓްލީ އެފްއޭއެމާ މަޝްވަރާކުރުން ވަރަށް ރަނގަޅޭ،" ބައްސާމް ވިދާޅުވި އެވެ.

"މިއަދާ ހަމައަށް ވެސް އަޅުގަނޑަކާ އެފްއޭއެމް އަކާ ހަމައަށް ވަކި ކަމެއް ސާފުކުރާކަށެއް އައިސްފައެއް ނެތް. އަޅުގަނޑުމެންނާ ހަމައަށް ސިޓީއެއް އެއްޗެއް ވެސް އައިސްފައެއް ނެތް. އައިސްފިއްޔާ އަޅުގަނޑުމެން މި ތިބީ ބޭނުންވާ ކަންތައްތައް ސާފުކޮށްދިނުމަށްޓަކައި ތައްޔާރަށް."

އެފްއޭއެމުން އޭރު ތުހުމަތުކޮށްފައި އޮތީ، ކްލަބްތަކަށް ނުފޫޒު ފޯރުވައިގެން އެފްއޭއެމްގެ ލީޑަޝިޕް ބަދަލުކުރަން އިސްވެ މަސައްކަތްކުރައްވަމުން ގެންދަވަނީ މަހުލޫފު ކަމަށެވެ. އެހެންވެ، ތިން ވަނަ ފަރާތެއް ނުފޫޒު ފޯރުވާނަމަ އެ މައްސަލަ ފީފާގެ ކަމާ ބެހޭ ކޮމިޓީތަކަށް ހުށަހަޅާނެ ކަމަށާއި އެހެންވެއްޖެ ނަމަ ރާއްޖެ ސަސްޕެންޑްކޮށްފާނެ ކަމުގެ އިންޒާރު ފީފާ އިން ދީފައިވާ ކަމަށް އެފްއޭއެމުން ބުނެފައިވެ އެވެ.

މިނިސްޓަރު އަލީ ވަހީދުގެ އުފެއްދި ކޮމިޓީގެ މަސައްކަތްތަކަކީ ތިން ވަނަ ފަރާތެއްގެ ނުފޫޒެއްގެ ގޮތުގައި އެފްއޭއެމުން ތަރުޖަމާކޮށްފާނެ ކަމުގެ ބިރު އެބައޮތްތޯ މީގެ ކުރިން 'މިހާރު"ން ސުވާލު ކުރުމުން ވިދާޅުވީ މަހުލޫފު ވެސް ނުފޫޒު ފޯރުއްވި ކަމަށް ގަބޫލުފުޅުނުކުރައްވާ ކަމަށެވެ. އަދި ހުދު އޭނާ ވެސް ވާހަކަދައްކަނީ ފީފާގެ ގަވާއިދުތަކާއި އަދި ދުނިޔަވީ ހަމަޔާ އުސޫލުގެ މަތިން ކަމަށް ކަމަށް ވިދާޅުވި އެވެ.