ސާފްގެ މޮޅު ކުޅުންތެރިޔާ ފައިސަލް ދަ ގްރާންޑޭ އަށް

މިދިޔަ އަހަރު އޮތް ސާފް ސުޒުކީ ކަޕްގެ މޮޅު ކުޅުންތެރިޔާގެ މަގާމު ހޯދި ރާއްޖޭގެ ގައުމީ ޓީމުގެ ގޯލްކީޕަރު މުހައްމަދު ފައިސަލް ކުރިއަށް އޮތް ސީޒަނަށް ދަ ގްރާންޑޭ ސްޕޯޓްސް ކްލަބަށް ސޮއިކޮށްފި އެވެ.

މި އަހަރު އަލަށް ފުރަތަމަ ޑިވިޝަނުގައި ވާދަކުރާ ދަ ގްރާންޑޭ އަށް ފައިސަލް ސޮއިކުރުމުގެ ކުރިން އޭނާ ވަނީ އެހެން ކްލަބްތަކަކާ ވެސް މަޝްވަރާކޮށްފަ އެވެ.

އޯލްޔޫތުލިންކްއޭޖް (އޭވައިއެލް) އިން ކެރިއަރު ފެށި ފައިސަލް ވަނީ ފަހުން ވިކްޓަރީ އަށް ވެސް ކުޅެފަ އެވެ. އަދި ވެލެންސިއާގެ އިތުރުން އީގަލްސްގެ ގޯލުން ވެސް ފެނުނު ފައިސަލް ނިއު ރޭޑިއަންޓަށް ބަދަލުވީ 2017 ވަނަ އަހަރުގެ ސީޒަންގެ މެދުތެރެއިން އެ ފަހަރު ވެލެންސިއާ އަށް ދިވެހި ޕްރިމިއާ ލީގުން ފުރުސަތު ނުލިބުމުންނެވެ.

މިދިޔަ ސީޒަނުގައި ނިއުގައި މަޑުކުރަން ފައިސަލް ނިންމި ނަމަވެސް ސީޒަންގެ ފުރަތަމަ ކޮޅުގައި އޭނާ އަށް ޓިމުގެ ފުރަތަމަ އެގާރައިން ފުރުސަތެއް ނުލިބެ އެވެ. އެކަމަކު ފަހުން މުސާރަ މައްސަލައިގައި ގޯލްކީޕަރު އިމްރާން މުހައްމަދު ނިއު އިން ވަކިވި ހިސާބުން ޓީމުގެ ފުރަތަމަ އެގާރައިގައި ހިމެނިގެން ކުޅުނީ ފައިސަލް އެވެ.

ކީޕަރު އިމްރާން ގައުމީ ޓީމުން 17 އަހަރަށް ފަހު ރިޓަޔާކުރުމަށް ފަހު ގައުމީ ޓީމުގެ ގޯލު ބެލެހެއްޓުމުގެ ޒިންމާ ވެސް އަދާކުރަމުން އަންނަނީ ފައިސަލް އެވެ. ފުރަތަމަ މެޗުތަކުގައި ފައިސަލްގެ ފަރާތުން ގޯސްތަކެއް ފެނިގެންދިޔަ ނަމަވެސް އިތުބާރާ އެކު ކުޅުން ކުރިއަށްގެން ގޮސް ފައިސަލް ވަނީ ތަފާތު ދައްކައިފަ އެވެ. ހާއްސަކޮށް މިދިޔަ އަހަރު ބަންގްލަދޭޝްގައި އޮތް ސާފް ސުޒުކީ ކަޕް ރާއްޖެ އަށް ކާމިޔާބު ކޮށްދިނުމުގައި ފައިސަލްގެ ދައުރު ބޮޑެވެ.

ކުރިއަށް އޮތް ސީޒަނަށް ދަ ގްރާންޑޭ ވަރުގަދަކުރިއިރު ރަނގަޅު ކުޅުންތެރިންތަކެއް ވަނީ ގެނެސްފަ އެވެ. އޭގެ ތެރޭގައި ގައުމީ ޓީމާއި ފުރަތަަމަ ޑިވިޝަނުގެ ޓީމުތަކުން ފާހަގަވި މުހައްމަދު ރަޝީދު (ހޮކޭ) އާއި މާޒިޔާ އަށް މިދިޔަ އަހަރުތަކުގައި ކުޅުނު އަހުމަދު އިމާޒް (އާއްކޮ) އާއި ޔަސްފާދު ހަބީބު (މުލަކޭ) އަދި އީގަލްސް އަށް ކުޅުނު ހަސަން ޝިފާން (ޝިފާންޓޭ) ހިމެނެ އެވެ.

ދަ ގްރާންޑޭގެ ކޯޗަކަށް ހަމަޖައްސާފައިވަނީ ކުރިން މާޒިޔާ އާއި ގައުމީ ޓީމުގެ އެސިސްޓަންޓް ކޯޗަކަށް ހުރި ކުރީގެ މިޑްފީލްޑަރު އިސްމާއިލް މަހަފޫޒް (އިންމަ) އެވެ. އިންމަ ވަނީ ކުރިއަށް އޮތް ސީޒަނުގައި ދަ ގްރާންޑޭގެ އަމާޒަކީ ގަދަ ހަތަރެއް ކަމަށް ބުނެފަ އެވެ. އަދި އެ ޓީމުގެ ވިސްނުމަކީ ހަރުދަނާ މެނޭޖްމަންޓެއްގެ ތެރެއިން ފުރަތަމަ ޑިވިޝަނުގައި ފައިތިލަ ސާބިތުކުރުން ކަމަށެވެ.