ބައެއް ކްލަބްތަކުން ބޭނުންވަނީ ލީގު ނިންމާލަން: ނިސްތާރު

ފުރަތަމަ ޑިވިޝަންގެ ކްލަބްތަކަށް ދިމާވެފައިވާ މާލީ މައްސަލަތަކުން އަރައިގަނެވޭނެ ގޮތެއް ފެންނަން ނެތުމުގެ ސަބަބުން މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ވާދަކުރާ ބައެއް ކްލަބްތަކުން ދެ ވަނަ ބުރަށް ފަހު ލީގު ނިންމާލަން ބޭނުންވާ ކަމަށް ފޯކައިދޫގެ ކޯޗު އަލީ ނިސްތާރު މުހައްމަދު ބުނެފި އެވެ.

ގައުމީ ފުޓްބޯޅަ ޓީމަށް ވަގުތު ދޭން ޕްރިމިއާ ލީގު މެދުކަނޑާލުމަށް ފަހު 50 ވަރަކަށް ދުވަހަށް ފަހު އަލުން ފެށިއިރު، މާޒިޔާ އާއި ޔުނައިޓެޑް ވިކްޓްރީ (ޔޫވީ) ފިޔަވައި އެހެން ޓީމަކަށް ގަވާއިދުން ޕްރެކްޓިހެއް ނުކުރެވެ އެވެ. މުސާރަ ދެވޭނެ ގޮތެއް ކްލަބްތަކަށް ނެތްއިރު، މެޗަށް ޓީމު ހަމަކުރަން ވެސް ޖެހެނީ ގޮންޖެހުންތަކަކާ ކުރިމަތިލާށެވެ.

ލީގުގެ އެއް ވަނައިގައި މާޒިޔާ އޮތީ 12 ޕޮއިންޓުގެ ލީޑަކާ އެކު އެވެ. އެ ޓީމަށް 14 މެޗުން 35 ޕޮއިންޓް ލިބިފައިވާއިރު، ދެ ވަނައިގައި އޮތް ގްރީން ސްޓްރީޓްސްގެ އޮތީ 12 މެޗުން 23 ޕޮއިންޓެވެ. މިހާރު އޮތްގޮތުން ލީގުގެ ދެ ވަނަ ބުރު ނިމޭނީ ޖެނުއަރީ 12 ވަނަ ދުވަހު އީގަލްސް އާއި ޓީސީ ބައްދަލުކުރާ މެޗުންނެވެ. ލީގު ފެށިއިރު ރާވާފައި އޮތީ ފުރަތަމަ ދެ ބުރުގެ ގަދަ އަށް ޓީމު ތިން ވަނަ ބުރު ކުޅޭ ގޮތަށެވެ.

ފޯކައިދޫގެ ކޯޗު ނިސްތާރު ބުނީ ހުރިހާ ކަމެއް ފުރިހަމަވެފައި އޮވެ މާޒިޔާގެ އެ ލީޑު އަތުލެވޭނެ އެހެން ޓީމެއް ނެތް ކަމަށެވެ.

"މާޒިޔާ އެ އޮތީ ވަރަށް ބޮޑު ލީޑެއް ނަގާފައި. އެ ޓީމު އެ އަންނަނީ ވަރަށް ރަނގަޅަށް ޓްރެއިން ކުރަމުން. މީހުން ވެސް ހަމަވޭ. މައްސަލައެއް ވެސް ނެތް. އަޅުގަނޑުގެ ސުވާލަކީ އެބައޮތްތޯއޭ އެ ފެންވަރުގައި އެ މީހުންނާ ވާދަކޮށްލެވޭނެ. އެއީ ކޮށްލަން ވަރަށް ރަނގަޅު ސުވާލެއް. އަޅުގަނޑުމެން ވާހަކަ ދެއްކި ވަރަށް ގިނަ ކްލަބްތަކުން ބޭނުންވޭ ދެ ވަނަ ބުރުން ލީގު ނިންމާލަން،" ނިސްތާރު ބުންޏެވެ.

މިދިޔަ އަހަރު ކްލަބްތަކަށް ދިމާވި މާލީ މައްސަލަތަކުން އަރައިގަނެ ކަންތައްތައް ހައްލުކޮށް މި ފަހަރުގެ ފުޓްބޯޅަ ސީޒަން ޖޫން މަހު ފަށަން ނިންމައި ބޮޑު ބަދަލެއް ގެނައީ އެންމެ ރަނގަޅަށް ކުރަން ޖެހޭ ދިރާސާތަށް ކުރެވިގެނެއް ނޫން ކަމަށް ފުޓްބޯޅައިގެ ގިނަ ފަރާތްތަކުން އަންނަނީ ބުނަމުންނެވެ. އަދި ރާއްޖޭގެ ސަގާފަތާ ގުޅުންހުރި ކަމެއް ގޮތަށް ޑިސެމްބަރު ޗުއްޓީއެއްގެ ގޮތުގައި އޮންނައިރު އެ މަހުގައި ސީޒަން ކުރިއަށް ގެންދާއިރު ގިނަ މައްސަލަތަކެއް ފެންމަތިވާނެކަން އެނގެން ޖެހޭނެ ކަމަށް އެކި ކޯޗުން އަންނަނީ ބުނަމުންނެވެ.

ނިސްތާރު ބުނީ ބޭރުގެ ގައުމުތަކުގައި ކުރާގޮތަށް ވަކި ކަންތައްތަކެއް ކުރެވެން ނެތްކަން ގަބޫލުކުރަންޖެހޭ ކަމަށާއި ރާއްޖޭގެ ފުޓްބޯޅަ ސީޒަން ފޯމެޓް ބަދަލުކުރިއިރު ވިސްނާނުލައި ބައެއް ކަންތައްތައް ކުރެވިފައިވާ ކަމަށެވެ.

"މި ފޯމެޓް ކުރިން އިން ގޮތަށް ބަދަލުކުރަންޖެހޭ. ޑިސެމްބަރުގައި ނުވާނެ މިކަމެއް. ސެލަރީސްއާ މި އިޝޫސް އުޅޭއިރު ޑިސެމްބަރުގައި ނުކުޅެންޏާ އެބަޖެހޭ އަވަހަށް ސީޒަން ފަށަން. ވަކި ގައުމެއްގައި ކުރާ ގޮތަކަށް ކުރުމެއް ނޫން. ރާއްޖެ އަށް އެންމެ ރަނގަޅު ގޮތް މުހިއްމުވާނީ. މި ފޯމެޓަށް އެބަހުރި ވަރަށް ބައިވަރު ޗެލެންޖަސް،" ކުރިން އއ. މާޅޮހަށް ޕްރިމިއާ ލީގުގައި ކޯޗުކޮށްދިން ނިސްތާރު ބުންޏެވެ.

ރަނގަޅަށް ޕްރެކްޓިސް ނުކޮށް ސީދާ މެޗަށް އަންނަ ޓީމުތަކުގެ ތެރޭގައި ފޯކައިދޫ ވެސް ހިމެނެ އެވެ. ލީގުގައި އެންމެ ފަހުން ފޯކައިދޫ ކުޅުނު މެޗުގައި ޔުނައިޓެޑް ވިކްޓްރީއާ 1-1 އިން އެއްވަރުވިއިރު، އެ މެޗަށް ފަހު ވެސް އެ ޓީމުގެ ފަރިތަކުރުންތައް ރަނގަޅަށް ކުރިއަށް ނުގެންދެވެ އެވެ. ބައެއް ކުޅުންތެރިން ވަނީ ރާއްޖޭގެ އެކި ހިސާބުތަކުގައި ކުރިއަށްދާ މުބާރާތްތަކަށް ގޮސްފަ އެވެ.

ލީގުގައި މިއަދު ހަވީރު ކުޅޭ މެޗުގައި ފޯކައިދޫ ނުކުންނާނީ ކްލަބް އީގަލްސްއާ ދެކޮޅަށެވެ. މިއީ ބްރޭކަށް ފަހު އަލުން ފަށާއިރު އީގަލްސް އިން ކުޅޭ ފުރަތަމަ މެޗެވެ. މެޗު ފަށާނީ 3:50 ގަ އެވެ.