ނުކުޅެދޭ މީހުންގެ އެލަވަންސް ބޮޑު ކުރަން މަސައްކަތް ކުރާނަން: ރައީސް

ނުކުޅެދުންތެރިކަން ހުންނަ ފަރާތްތަކުގެ އެލަވަންސް ކުޑަ މައްސަލަ އާއި އިތުރު ޝަކުވާތަކަށް ހައްލެއް ހޯދަން މަސައްކަތް ކުރައްވާނެ ކަމަށް ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.

ލޯފަން މީހުންނާއި އެހެނިހެން ނުކުޅެދުންތެރިކަން ހުންނަ ކުދިންގެ ބައެއް ބެލެނިވެރިން އިއްޔެ ހަވީރު ވަނީ ރައީސްއާ ބައްދަލު ކޮށްފަ އެވެ.

އެ ބައްދަލުވުމުގައި އެ މީހުން ދިރިއުޅުމަށް ކުރަން ޖެހޭ ހަރަދުތަކަށް ބަލާއިރު މިހާރު ދެމުންދާ އެލަވަންސް ކުޑަ މައްސަލަ އާއި އޭގެ ސަބަބުން ގިނަ ދަތިތަކާ ކުރިމަތިވާ ކަމުގެ ޝަކުވާ ރައީސް އަށް ދެންނެވި އެވެ. އަދި އެ މީހުންނަށް ފަރުވާ އާއި އިތުރު ހިދުމަތްތައް ރާއްޖޭގެ އެކި ކަންކޮޅުތަކުން ހޯދުމުގައި ދިމާވާ ގޮންޖެހުންތައް ވެސް ރައީސާ ވަނީ ހިއްސާކޮށްފަ އެވެ.

މީގެ އިތުރުން މާލީ އެހީތެރިކަން އިތުރުވެއްޖެ ނަމަ އެ މައްސަލަތަކަށް ކޮންމެވެސް ވަރެއްގެ ލުޔެއް ލިބިގެންދާނެ ކަމަށް ވެސް އެ ފަރާތްތަކުން ބުންޏެވެ.

އެ ޝަކުވާތައް އަޑު އެއްސެވުމަށް ފަހު ރައީސް ވަނީ، އެކަމަށް އެދެވޭ ހައްލެއް ހޯއްދަވައި ދެއްވުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ.

އޭގެ އިތުރުން އެންސްޕާ އިން ވަނީ ނުކުޅެދުންތެރިކަން ހުންނަ ފަރާތްތަކުގެ ދަފުތަރު އެކުލަވައިލުމާއި، އެ ދަފުތަރު ބެލެހެއްޓުމުގެ ގަވާއިދު ގެޒެޓް ކުރުމާއި ގުޅިގެން ޑިސްއެބިލިޓީ ސިވިއާނަސް އަށް ބަލައި ދެވޭ އެލަވަންސް މުރާޖާ ކުރުމުގެ މަޝްވަރާތައް ކުރަމުން އަންނަ ކަމަށް ބުނެފަ އެވެ.