ދުނިޔޭގެ އެކި ގައުމުތަކުގައި ހަލުއިކަމާ އެކު ފެތުރެމުންދާ ކޮވިޑު-19 ގެ އާ ވޭރިއެންޓް، އޮމިކްރޮން ވޭރިއެންޓް ރާއްޖެއިން ފެނުނު ފަހުން ބައްޔަށް ޕޮޒިޓިވްވާ ރޭޓް 66 ޕަސެންޓް އިތުރުވެއްޖެ ކަމަށް އެޗްޕީއޭ އިން ކޮންމެ ރެޔަކު ހާމަކުރާ ދުވަހު ހިސާބުތަކުން ދައްކައިފި އެވެ.
ރާއްޖޭގައި އޮމިކްރޮނަށް ފުރަތަމަ ފަހަރަށް ޕޮޒިޓިވްވީ އއ. އަތޮޅު ސޭންޑީސް ބަތަލާ ރިސޯޓަށް އައި ސައުތު އެފްރިކާގެ ޓޫރިސްޓެކެވެ. އޭނާ ކޮވިޑަށް ޕޮޒިޓިވްކަން އެނގުނީ މިދިޔަ ނޮވެމްބަރު މަހުގެ 27 ގަ އެވެ. އޭގެ ފަހުން، އެ ވޭރިއެންޓަށް އިތުރު ހަތަރު މީހަކު ޕޮޒިޓިވްވި ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުންޏަސް އިތުރަށް އެއްވެސް މައުލޫމާތެއް ނުދެ އެވެ.
އެޗްޕީއޭގެ ދުވަހު ހިސާބުތަކަށް ބަލާއިރު އޮމިކްރޮން ވެރިއަންޓް ރާއްޖޭން ފެނުނު، ނޮވެމްބަރު 27 ވަނަ ދުވަހު 3،820 މީހަކު ޓެސްޓްކުރި އިރު ޕޮޒިޓިވްވީ 76 މީހެކެވެ. އެއީ 1.99 ޕަސެންޓުގެ ޕޮޒިޓިވިޓީ ރޭޓެވެ. އެކަމަކު އޭގެ ފަހުން މި ރޭޓް މަތިވަމުން އައިސް އިއްޔެ ހުރީ 5.02 ޕަސެންޓުގަ އެވެ. އެއީ 3،209 ސާމްޕަލުން 161 މީހަކު ޕޮޒިޓިވް ވެގެންނެވެ.
އާ ވޭރިއެންޓް ފެނުނު ފަހުން އިއްޔެއާ ހަމައަށް މުޅި ރާއްޖެއިން 152،086 ސާމްޕަލް ޓެސްޓުކޮށްފައިވެ އެވެ. އެ ސާމްޕަލްތަކުން 4،778 މީހުން ޕޮޒިޓިވްވެފައިވެ އެވެ. މިއީ ޖުމްލަ ސާމްޕަލަށް ބަލާއިރު 3.14 ޕަސެންޓެވެ.
ކޮވިޑުގެ އެކްޓިވް ކޭސްތައް ވެސް މިދިޔަ މަހުން ފެށިގެން މަތިވަމުން ގޮސް، މިހާރު އެ އަދަދު ވަނީ 2،400 އަށް އަރައިފަ އެވެ.
މާލޭގައި އެ ބަލީގެ ހާލަތު ވަރަށް ގޯސްކޮށް އޮތުމަށް ފަހު، ފާއިތުވި ފަސް ވަރަކަށް މަސް ދުވަހުގެ ތެރޭގައި ވަރަށް ބޮޑަށް ކޮންޓްރޯލްކޮށްފައިވެ އެވެ.