ކޮވިޑު-19 ގައި ހާލު ދެރަވެގެން އައިސީޔޫގައި ހަތް މީހަކަށް ފަރުވާ ދެމުން އަންނަ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބުނެފި އެވެ.
އެ ސެންޓަރުގެ ކޮމިއުނިކޭޝަން އޮފިޝަލަކު ވިދާޅުވި ގޮތުގައި، ހޮސްޕިޓަލްގައި އެޑްމިޓުކޮށްގެން މި ވަގުތު 48 މީހަކަށް ފަރުވާ ދެ އެވެ. އެއީ ހުޅުމާލެ މެޑިކަލް ފެސިލިޓީގައި 37 މީހުންނާއި ދަރުމަވަންތަ ހޮސްޕިޓަލްގެ 16 ވަނަ ފްލޯގައި ނުވަ މީހުންނާއި އައްޑޫ ފެސިލިޓީ އަދި ބ. އަތޮޅު ފެސިލިޓީގައި އެޑްމިޓްކޮށްފައިވާ މީހެކެވެ.
ހުޅުމާލެ ފެސިލިޓީގައި 37 މީހަކު އެޑްމިޓުކޮށްގެން ފަރުވާ ދެމުން އަންނައިރު އައިސީޔޫގައި ތިބީ ހަތް މީހުންނެވެ. ވެންޓިލޭޓަރުގެ އެހީގައި ހަތަރު މީހަކަށް ފަރުވާ ދެމުން އަންނަ ކަމަށް އެޗްއީއޯސީން ބުންޏެވެ.
ނަމަވެސް އެ މީހުންގެ އުމުރާއި ވެކްސިނޭޝަނާ ގުޅޭ މައުލޫމާތެއް ހާމައެއް ނުކުރެ އެވެ.
އޮމިކްރޮން ވޭރިއެންޓާ އެކު ކޮވިޑުގެ ކޭސްތައް ރިކޯޑު މިންވަރަކަށް އިތުރުވަމުން ދިޔަ ކަމުގައި ވިޔަސް ހޮސްޕިޓަލައިޒޭޝަނަށް އަދި މާ ބޮޑު ބަދަލެއް ނާދެ އެވެ. ކޮންމެ ދުވަހަކު ކޮވިޑަށް ޕޮޒިޓިވްވާ އަދަދު ހުރީ 2،000 އިން މަތީގަ އެވެ.
އެޗްއީއޯސީން ކުރިން ބުނީ ބަލިން ރައްކާތެރިވުމުގެ އިތުރު ފިޔަވަޅު އަޅާނީ ހޮސްޕިޓަލައިޒޭޝަނާއި ކެޕޭސިޓީއަށް ބަލާފައި ކަމަށެވެ. ހާލަތަށް އަންނަ ބަދަލުތައް ރަނގަޅަށް މޮނީޓާކުރަމުންދާ ކަމަށް ވެސް އެ ސެންޓަރުން ބުންޏެވެ.