ފާއިތުވި ހަތަރު މަސް ދުވަހުގެ ތެރޭގައި މާލޭގައި ކޮވިޑުގެ ކޭސްތައް އެންމެ މައްޗަށް ދިޔައީ އިއްޔެ ކަމަށް، އެޗްޕީއޭ އިން ކޮންމެ ދުވަހަކު ހާމަކުރާ ތަފާސްހިސާބުން ދައްކައިފި އެވެ.
މާލެ، ހުޅުމާލެ އަދި ވިލިމާލޭގައި ކޮވިޑުގެ ކޭސްތައް ވަރަށް ދަށްވުމަށް ފަހު، ދުނިޔޭގައި ހަލުއިކަމާ އެކު ފެތުރެމުންދާ އޮމިކްރޮން ވޭރިންޓަށް ފަހު އަނެއްކާވެސް ގިނަ ބަޔަކު ވަނީ ޕޮޒިޓިވްވާން ފަށައިފަ އެވެ.
މިދިޔަ އޮކްޓޯބަރު 3 ގައި މާލެ ސަރަހައްދުން 2،030 ސާމްޕަލް ޓެސްޓުކުރިއިރު ޕޮޒިޓިވްވީ 22 މީހެކެވެ. އެ މަހުގެ ތެރޭގައި މާލޭގެ ކޮވިޑުގެ ކޭސްތައް އެވްރެޖްކޮށް ހުރީ 20 ގަ އެވެ. އަދި ސާމްޕަލް ޕޮޒިޓިވިޓީ ރޭޓް އެއް ޕަސެންޓުގައި ހިފެހެއްޓިފައިވެ އެވެ.
ޖެހިގެން އައި ނޮވެމްބަރު 3 ގައި 1،291 ސާމްޕަލް ޓެެސްޓުކުރިއިރު 29 މީހަކު ޕޮޒިޓިވްވެފައިވެ އެވެ. ޑިސެމްބަރު 3 ގައި ގައި 1،124 ސާމްޕަލް އިން 19 މީހަކު ޕޮޒިޓިވްވި އެވެ. އެ ދެ މަސް ދުވަހު ސާމްޕަލް ޕޮޒިޓިވިޓީ ހުރީ ދެ ޕަސެންޓުގަ އެވެ.
އެކަމަކު، ޑިސެމްބަރު 20ގެ ފަހުން ކޭސްތައް އިތުރުވަމުން ގޮސް، މިދިޔަ މަހުގެ ތެރޭގައި އެންމެ ގިނަ މީހުން ޕޮޒިޓިވްވެފައިވަނީ 53 މީހުންނެވެ.
އިއްޔެ މާލެ ސަރަހައްދުން 1،293 ސާމްޕަލް ޓެސްޓުކުރިއިރު 97 މީހުން ޕޮޒިޓިވްވެފައިވެ އެވެ. ސާމްޕަލް ޕޮޒިޓިވިޓީ ރޭޓް ހުރީ ހަތް ޕަސެންޓުގަ އެވެ.
މިއީ، ފާއިތުވި ހަތަރު މަސް ދުވަހުގެ ތެރޭގައި އެއް ދުވަހާ އެންމެ ގިނަ މީހުން ޕޮޒިޓިވްވި ދުވަހެވެ. އެހެންވެ، އެކްޓިވް ކޭސްތައް ވެސް 2،609 އަށް އަރާފައިވެ އެވެ.
ރާއްޖޭގައި އޮމިކްރޮނަށް ފުރަތަމަ ފަހަރަށް ޕޮޒިޓިވްވީ އއ. އަތޮޅު ސޭންޑީސް ބަތަލާ ރިސޯޓަށް އައި ސައުތު އެފްރިކާގެ ޓޫރިސްޓެކެވެ. އޭނާ ކޮވިޑަށް ޕޮޒިޓިވްކަން އެނގުނީ މިދިޔަ ނޮވެމްބަރު މަހުގެ 27 ގަ އެވެ.
އޭގެ ފަހުން ކޮވިޑަށް ޕޮޒިޓިވްވާ ރޭޓް 66 ޕަސެންޓް އިތުރުވެފައިވެ އެވެ.