ބޫސްޓަ ޑޯޒު ޖެހުމުގެ ކެމްޕޭން މި މަހު ފަށަނީ

ރާއްޖޭގެ އާބާދީގެ ބޮޑު ބަޔަކަށް ވެކްސިން ޖެހުމުގެ ކެމްޕެއިން ފެށުމަށް ބޭނުންވާ ސާމާނު ކުރިއަށް އޮތް ހަފްތާއެއްހާ ދުވަހުގެ ތެރޭގައި ލިބުމާ އެކު މި މަހުގެ މެދު ތެރޭގައި އާއްމުކޮށް ހުޅުވާލައިގެން ބޫސްޓަ ޑޯޒު ޖަހަން ފެށޭނެ ކަމަށް ހެލްތު މިނިސްޓްރީގެ ސްޓޭޓް މިނިސްޓަރު ޑރ. ޝާހު މާހިރު މިއަދު ވިދާޅުވެއްޖެ އެވެ.

ބޫސްޓަ ޑޯޒްގެ ގޮތުގައި، ކޮވެކްސް ފެސިލިޓީގެ ދަށުން އެމެރިކާއިން އިން ފައިޒާގެ 100،620 ޑޯޒް ރާއްޖެ އަށް ވަނީ ހަދިޔާކޮށްފަ އެވެ. އެކަމަކު ގިނަ ބަޔަކަށް ބޫސްޓަ ޑޯޒު ޖެހުން ލަސްވެފައި ވަނީ އެ ވެކްސިން ޖެހުމަށް ބޭނުންވާ ސިރިންޖް ނުލިބިގެންނެވެ.

އެޗްޕީއޭ އިން ކުރިން ޝެޑިއުލްކޮށްފައި އޮތީ ބޫސްޓަ ޑޯޒު ޖެހުމުގެ ކެމްޕޭން މިދިޔަ ޑިސެމްބަރު މަހުގެ ތެރޭގައި ފެށުމަށެވެ.

އާއްމުކޮށް ހުޅުވާލައިގެން ބޫސްޓަ ޑޯޒު ނުޖެހިޔަސް ސިއްހީ ދާއިރާ އާއި ޓޫރިޒަމް ދާއިރާގައި މަސައްކަތްކުރާ މީހުންގެ އިތުރުން ބޮޑެތި ބަލިތަކަށް ފަރުވާ ހޯދަމުން އަންނަ މީހުންނާއި އެއާޕޯޓްގެ ޕްރޮންޓްލައިން މުވައްޒަފުންނަށް ބޫސްޓާ ޑޯޒް މިހާރު ވެސް ދެމުން އެބަދެ އެވެ.

ޝާހު ވިދާޅުވި ގޮތުގައި ރާއްޖޭގެ މުޅި އާބާދީއަށް ޖެހުމަށް ބޭނުންވާ ވެކްސިން މިހާރު ވަނީ ހަމަޖެހިފަ އެވެ. އެއާއެކު ވެކްސިން ޖެހުމަށް ބޭނުންވާ އިތުރު ސާމާނު ވެސް ހަފްތާއެއްހާ ދުވަހުގެ ތެރޭގައި ލިބޭނެ ކަމަށް ބެލެވޭ ކަމަށް ވިދާޅުވި އެވެ.

"ބޫސްޓާ ޑޯޒް ޖެހުމުގެ ކެމްޕެއިން އަޅުގަނޑުމެން ފުދޭވަރަކަށް ބާރަށް މި ކުރިއަށް ގެންދަނީ. މިމަހު މެދެއްހާ ތަނުގައި އެ ޕްރޮގްރާމު ކުރިއަށް ގެންދާނަން،" ޝާހު ވިދާޅުވި އެވެ.

"އެންމެނަށް ބޭނުންވާ ވަރަށް ބޫސްޓާ ޑޯޒް ހަމަޖެހިފައި ވަނީ. އޭގެ އިތުރުން ވެކްސިން ޖެހުމަށް ޝަރުތު ހަމަވާ ކުދިންނަށް ވެކްސިން ހޯދުމުގެ މަސައްކަތް ކުރަމުންދަނީ."

ކޮވިޑުގެ ހާލަތު ރަނގަޅުވެފައި އޮތުމަށް ފަހު ގައުމުތަކުގައި ބާރަށް ފެތުރޭ އޮމިކްރޯންއާ އެކު ރާއްޖޭގެ ހާލަތު ވެސް މިހާރު ދަނީ ގޯސްވަމުންނެވެ. އެހެންވެ ރައްކާތެރިވުމުގެ ފިޔަވަޅުތައް އެޗްޕީއޭ އިން އަންނަނީ ވަރުގަދަ ކުރަމުންނެވެ.

އެކަމަކު ރާއްޖޭގެ އާބާދީގެ ބޮޑު ބަޔަކު ކޮވިޑް ވެކްސިންގެ ދެ ޑޯޒު ފުރިހަމަކޮށްގެން ތިބުމުން ބަލީގައި ބޮޑުވަރުވާނެ މީހުން މަދުވާނެ ކަމަށް އެޗްޕީއޭ އިން ލަފާކުރެ އެވެ.

ރާއްޖޭގައި މިހާރު ބޭނުންކުރަމުން އަންނަ ފައިޒާ ވެކްސިންގެ މުއްދަތު ހަމަވާން އޮތް ތާރީހަކީ މިދިޔަ ނޮވެމްބަރު މަހުގެ ނިޔަލެވެ. އެކަމަކުު ޑިސެމްބަރުން ފެށިގެން އިތުރު ތިން މަހަށް ވެކްސިން ބޭނުންކުރެވޭނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ އެޗްޕީއޭއަށް އަންގައިފަ އެވެ. މިފަހުން ރާއްޖެއަށް ލިބުނު ފައިޒާ ވެކްސިންގެ މުއްދަތު ހަމަވާން އޮތް ތާރީހު އަދި ސާފެއް ނުވެ އެވެ.

ރާއްޖެއިން މިހާތަނަށް 368،238 މީހަކު ވެކްސިންގެ ދެ ޑޯޒް ފުރިހަމަކޮށްފައިވާއިރު މިއީ ރާއްޖޭގެ އާބާދީގެ 80 އެއްހާ ޕަސެންޓެވެ. ބޫސްޓާ ޑޯޒް ޖަހާފައި ވަނީ 27،762 މީހެކެވެ.