ތިލަމާލެ ބްރިޖުގެ އެންމެ މުހިންމު ސާވޭ އަށް ބޭނުންވާ ސާމާނު ރާއްޖެ ގެނެސްފި

މާލެ، ވިލިމާލެ، ތިލަފުށި އަދި ގުޅިފަޅު ގުޅައިލަން ހަދާ "ތިލަމާލެ ބްރިޖު"ގެ އެންމެ މުހިންމު ސާވޭ އަށް ބޭނުންވާ ސާމާނު މިއަދު ރާއްޖެ ގެނެސްފި އެވެ.

ޕްލޭނިން މިނިސްޓްރީން ނެރުނު ބަޔާނެއްގައި ބުނީ ތިލަމާލެ ބްރިޖު ހަދަން ހަވާލުކޮށްފައިވާ އިންޑިއާގެ ކުންފުނި، އެފްކޮންސް އިންފްރާސްޓްރަކްޗާގެ ފަރާތުން ތައްޔާރުކުރާ ޑީޓެއިލް ޑިޒައިނަށް ބޭނުންވާ ޖިއޯޓެކްނިކަލް ސާވޭތައް ހެދުމަށް ބޭނުންވާ ބައެއް ސާމާނު މިހާރު ރާއްޖެ ގެނެސްފައިވާ ކަމަށެވެ.

ޖިއޯޓެކްނިކަލް ސާވޭ އަކީ ބިމުގެ ވަރުގަދަކަން ވަޒަން ކުރުމަށް ކުރާ ސާވޭއެކެވެ.

ކުރިއަށް އޮތް ދެ ދުވަހުގެ ތެރޭގައި މާލެ އާއި ވިލިމާލޭގައި މި ސާވޭގެ އަމަލީ މަސައްކަތް ފަށަން ވަނީ ނިންމައިފަ އެވެ.

މީގެ ކުރިން ވެސް ވަނީ މި ބްރިޖްގެ މަސައްކަތް ފެށުމުގެ ކުރިން ހަދަން ޖެހޭ ސާވޭއެއްގެ މަސައްކަތް ކޮށްފަ އެވެ. މިދިޔަ އަހަރު އޮކްޓޯބަރު 28 އިން ފެށިގެން ކުރި އެ ސާވޭ އަކީ ލޭންޑް އެންޑް މެރިން ސާވޭއެކެވެ.

ތިލަމާލެ ބްރިޖުގެ މަސައްކަތް ފެށުމަށް އިންޑަސްޓްރިއަލް ވިލެޖުން ހުސްކުރި ބިން.-- ފޮޓޯ: ފަޔާޒް މޫސާ / މިހާރު

މި ސާވޭގެ މަސައްކަތް ފަށާއިރު، ބްރިޖުގެ މަސައްކަތަށް މާލެ އިންޑަސްޓްރިއަލް ވިލެޖުގެ، ބޮޑުތަކުރުފާނު މަގުން ކަޅުތުއްކަލާ ކޮށީގެ ކުރިމައްޗަށް ވާގޮތަށް އޮންނަ ބިން ހުސްކޮށްފަ އެވެ. މިނިސްޓްރީން މައުލޫމާތު ދިން ގޮތުގައި އެއީ ބުރިޖްގެ ކޮންސްޓްރަކްޓާގެ ސައިޓެއް ހަދަން ހުސްކުރި ބިމެކެވެ.

މި ސަރުކާރުން ކުރިއަށް ގެންދަން ރާވާފައިވާ އެންމެ ބިޔަ މަޝްރޫއު މާލެ، ވިލިމާލެ، ތިލަފުށި އަދި ގުޅިފަޅު ގުޅުވައިލާ "ގްރޭޓާ މާލެ ކަނެކްޓިވިޓީ ޕްރޮޖެކްޓް" ނުވަތަ "ތިލަމާލެ" ބްރިޖު އެޅުމުގެ މަސައްކަތް މި އަހަރުގެ ކުރީކޮޅު ފަށާނެ ކަމަށް ސަރުކާރުން ބުނެފައިވެ އެވެ.

އިންޑިއާގެ އެގްޒިމް ބޭންކުގެ ލޯނަކާއި އެ ގައުމުން ދޭ އެހީއެއް އެއްކޮށްލައިގެން ހަރަދުކުރާ ގޮތަށް ހިންގަން ނިންމާފައިވާ ތިލަމާލެ ބްރިޖުގެ މަސައްކަތް އިންޑިއާގެ އެފްކޮންސްއާ ހަވާލުކޮށް، އެއްބަސްވުމުގައި ސޮއިކުރީ މިދިޔަ އަހަރު އޮގަސްޓް މަހު 26 ގަ އެވެ.

Thilamale' bridge ge masahkathah Industrial Village ge bimeh huskoffi

The most trusted news source in the Maldives

Mihaaru

މި މަޝްރޫއުގެ ދަށުން ގްރޭޓާ މާލެ ސަރަހައްދު ގުޅައިލުމަށް 6.7 ކިލޯމީޓަރުގެ ބްރިޖެއް އަޅާނެ އެވެ. އެއީ 500 މިލިއަން ޑޮލަރު (7.7 ބިލިއަން ރުފިޔާ) ގެ މަޝްރޫއެކެވެ. އެއީ ލައިން އޮފް ކްރެޑިޓްގެ ދަށުން ދޭ 400 މިލިއަން ޑޮލަރާއި އިންޑިއާގެ ސަރުކާރުން ހިލޭ އެހީގެ ގޮތުގައި ލިބޭ 100 މިލިއަން ޑޮލަރެވެ.

ތިލަމާލެ ބްރިޖަކީ މާލޭގެ ވިޔަފާރި ބަނދަރު ގުޅިފަޅަށް ބަދަލުކުރުމާއި ގުޅިފަޅު ތަަރައްގީކުރުން ވެސް ހިމެނޭ ބޮޑު ޕްރޮޖެކްޓެއްގެ އެއް ބައެވެ. ފިޔަވަހިތަކަކަށް ބަހާލައިގެން މަސައްކަތް ކުރިއަށް ގެންދާ މި ބްރިޖުގެ ފުރަތަމަ ފިޔަވަހީގައި މާލެ އާއި ވިލިމާލެއާ ގުޅުވައިލާނެ އެވެ. މި ސަރުކާރުގެ އަމާޒަކީ އަންނަ އަހަރު ދައުރު ނިމުމުގެ ކުރިން ފުރަތަމަ ފިޔަވަހި ނިންމާލުމެވެ.