ސަރުކާރުން ބިރު ނުދައްކައި ރީތި ކެމްޕެއިނެއް ކުރަން އިންތިގެ ޓީމުން ގޮވާލައިފި

އެމްޑީޕީގެ ޗެއާޕާސަންގެ އިންތިހާބަށް ސަރުކާރުން ނުފޫޒު ފޯރުވަމުންދާ ކަމަށް ބުނެ އެކަން ހުއްޓާލައި ރީތި ކެމްޕެއިނެއްގެ ތެރެއިން ވޯޓު ހޯދުމަށް، އިންތިހާބުގައި ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)ގެ ކެމްޕެއިން ޓީމުން މިއަދު ގޮވާލައިފި އެވެ.

އިންތިގެ ކެމްޕެއިން ޓީމްގެ ފަރާތުން ބޭއްވި ނޫސްވެރިންގެ ބައްދަލުވުމުގައި ކެމްޕޭނުގައި އިންތިގެ ތަރުޖަމާނުކަން ކުރައްވާ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވީ ވަޒީފާގެ ބިރު ދެއްކުމާއި ވަކި ކެންޑިޑޭޓަކަށް ކެމްޕެއިން ނުކޮށްފި ނަމަ ވަޒީފާގައި އުނދަގޫ ވެދާނެ ކަމުގެ ޝަކުވާ އެމްޑީޕީގެ މެމްބަރުން ކުރަމުން އަންނަ ކަމަށާއި ސަރުކާރުން ފޯރުކޮށްދޭންޖެހޭ ބައެއް ހިދުމަތްތަކަށް ހުރަސް އެޅިދާނެ ކަމުގެ ބިރު ވެސް ދައްކާ ކަމަށެވެ.

އަންނަ އޭޕްރިލް މަހު 16 ގައި ބާއްވާ އެމްޑީޕީގެ ޗެއާޕާސަންގެ އިންތިހާބުގައި އިންތިއާ ވާދަކުރައްވަނީ އިކޮނޮމިކް މިނިސްޓަރު ފައްޔާޒް އިސްމާއިލް އެވެ.

ވައްޑެ ވިދާޅުވީ އެއީ އެމްޑީޕީން ގަބޫލުކުރާ ހަމައެއް ނޫން ކަމަށާއި އެކަން ހުއްޓާލައި، ރީތި ކެމްޕެއިނެއްގެ ތެރެއިން ވޯޓު ހޯދައި ކާމިޔާބު ކުރުމަށް އިލްތިމާސް ކުރައްވާ ކަމަށެވެ.

"އެމްޑީޕީ ޕާޓީއެއްގެ ސިފައިގައި ގާއިމްވި އިރު އެންމެ ބޮޑު އެއް މަގްސަދެއް ގޮތުގައި ދެއްކި ވާހަކަ އަކީ ބިރުފަހަނައަޅައި ދިޔުމާއި ހާސްކަން ނެތުން. 2008 އިން ފެށިގެން 2012 އާ ހަމަޔަށް ހިނގި އިންތިހާބުތަކުގައި ވެސް މިފަދަ ގޮތަކަށް، ސަރުކާރުގެ ވަޒީރަށް ވޯޓު ނުދީފި ނަމަ ބިރު ދެއްކުމުގެ ކަންކަން ނުފެނޭ،" ވައްޑޭ ވިދާޅުވި އެވެ.

ވައްޑޭ ވިދާޅުވީ ރ. ދުވާފަރު ސިއްހީ މަރުކަޒާ ހަވާލުވެ ހުންނެވި އެމްޑީޕީގެ "އަރަމުން އަންނަ ލީޑަރެއް" ކަމަށްވާ އާމިރު އަހުމަދު ވަނީ ރައިސުލްޖުމްހޫރިއްޔާ އަށް ލިބިދޭ ބާރުގެ ދަށުން، ވަޒީފާ އިން ވަކި ކޮށްފައިވާ ކަމަށާއި އިންތިހާބާ ދިމާކޮށް ޖާއިޒް ނޫން ގޮތަކަށް އާމިރު ވަޒީފާ ކަނޑާލީތީ ކަންބޮޑުވާ ކަމަށެވެ. އަދި އެކަން ކުށްވެރި ކުރައްވާ ކަމަށް ވައްޑޭ ވިދާޅުވި އެވެ.

"އެއީ އާމިރަށް ދިން ގެއްލުމެއްގެ ބަދަލުގައި ދެކެނީ އެއީ ޕާޓީގެ އަރަމުން އަންނަ އެތައް ލީޑަރުންނަކާ ދެކޮޅަށް ކުރަމުން އަންނަ ވަރަށް ދެރަވަރުގެ ކަމެއް ގޮތުގައި،" ވައްޑޭ ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ދައުރުގައި ވެސް އެފަދަ އަނިޔާވެރިކަމާއި ނުފޫޒުތައް ފެނުނު ކަމަށް ވައްޑޭ ވިދާޅުވި އެވެ. އެހެންކަމުން ބިރު ދެއްކުން ފަދަ ކަންކަމަކީ އެމްޑީޕީ މެމްބަރުންނަށް އާ ކަމެއް ނޫން ކަމަށް ވައްޑޭ ވިދާޅުވި އެވެ.

އެންމެ މީހަކަށް ދައްކާ ބިރެއްގެ ސަބަބުން އިތުރު 100 މީހުން އެކަމާ ނުރުހުން ފާޅުކޮށް، އިންތިގެ ކެމްޕެއިނާ ގުޅޭނެ ކަމަށް ވެސް ވައްޑެ ވިދާޅުވި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ އެމްޑީޕީގެ އިންތިހާބާ ދިމާކޮށް ރައީސުލްޖުމްހޫރިއްޔާގެ ބާރުތައް ނާޖާއިޒް ގޮތުގައި ބޭނުންކުރައްވާ ކަމަށް ވިދާޅުވެ އެމްޑީޕީގެ ވަޓްސްއެޕް ގްރޫޕަކަށް މެސެޖެއް ވެސް ފޮނުއްވައިފަ އެވެ. އެ މެސެޖުގައި ނަޝީދު ވަނީ އިންތިހާބަށް ނުފޫޒު ފޯރުވާ ކަމަށް ތުހުމަތުކުރައްވައި ވަރަށް ބޮޑަށް ނުރުހުން ފާޅުކުރައްވައިފަ އެވެ.