ދީޕިކާ ޕަދުކޯންގެ ކުރީގެ ލޯބިވެރިޔާ ރަންބިރު ކަޕޫރާ އެކު ފިލްމެއް ކުޅެން ވަރަށް ބޮޑަށް ކެތްމަދުވެފައިވާ ކަމަށް ދީޕިކާގެ ފިރިމީހާ އަދި ބޮލީވުޑްގެ އެކްޓަރު ރަންވީރު ސިންގް ބުނެފި އެވެ.
ވަރަށް ބިޒީކޮށް އުޅެމުން ވެސް އިންސްޓަގްރާމް މެދުވެރިކޮށް ސަޕޯޓަރުން ކުރި ސުވާލުތަކަށް އިއްޔެ ރަންވީރު ޖަވާބު ދިނެވެ.
އޭނާ އަށް އަމާޒުވި އެއް ސުވާލަކީ ރަންބީރާ އެކު އެންމެ ފިލްމެއް ނަމަވެސް ކުޅޭނީ ކޮންއިރަކުން ހެއްޔޭ އެވެ. އެއާ އެކު ރަންވީރު ބުނީ ރަންބީރާ އެކު ފިލްމެއް ކުޅެން ކެތްމަދުވެފައި ހުންނަތާ އެތައް އަހަރެއްވެއްޖެ ކަމަށެވެ.
ރަންބީރާއި ރަންވީރު އެކުގައި އޮން ސްކްރީނުން ފެނުނީ ކަރަން ޖޯހަރުގެ "ކޮފީ ވިތު ކަރަން" ގަ އެވެ.
ރަންބީރަކީ ދީޕިކާގެ ކުރީގެ ލޯބިވެރިޔާ ނަމަވެސް ދީޕިކާ އާއި ރަންބީރުގެ މެދުގައި ގުޅުން ރަނގަޅެވެ. އެހެންވެ، އެހެން ބޮލީވުޑްގެ ޖޯޑުތަކާ ހިލާފަށް އެ އެންމެން ވެސް އުޅެނީ ވަރަށް ގުޅިގެންނެވެ.