ގައުމީ ފިލްމު އެވޯޑްސްގައި އެންމެ މޮޅު ބަތަލާގެ އެވޯޑް "ލޫދިފާ" އިން މަރިޔަމް އަފީފާ (އަފީ) އަށް ލިބުމުން ވަރަށް އުފާވި ކަމަށާއި އެއި ހަމަ ހައްގު އެވޯޑެއް ކަމަށް، ދެ ފިލްމަކުން އެންމެ މޮޅު ބަތަލާގެ އެވޯޑަށް ވާދަކުރި ތަޖުރިބާކާރު ބަތަލާ ނިއުމާ މުހައްމަދު ބުނެފި އެވެ.
ނިއުމާ އެގޮތަށް ބުނީ އެވޯޑް ހަފުލާ ނިމުމުގެ ކުރިން ނުކުމެގެން ދިޔައީ އޭނާ އަށް އެވޯޑް ނުލިބުމުން ހިތްހަމަނުޖެހިގެން ކަމުގެ އަޑުތައް އަރާފައި އޮއްވަ އެވެ.
އެކަމަކު ނިއުމާ ބުނީ އެއީ ހަގީގަތެއް ނޫން ކަމަށެވެ. އޭނާ ނުކުތީ މުޅިން އެހެން ސަބަބެއް އޮވެގެން ކަމަށް ވެސް ބުންޏެވެ.
"އަސްލު ފައި އޮޕަރޭޝަން ކޮށްގެން ވަރަށް ބަލިކޮށް މި އުޅެނީ. އެވޯޑް ހަފުލާ އަށް ދިޔަ އިރު ވެސް ހިނގަން ވަރަށް އުނދަގޫ،" ނިއުމާ ބުންޏެވެ.
"ދެން އެންމެ މޮޅު ބަތަލާގެ އެވޯޑަށް ފަހު ވެސް އެވޯޑްތަކެއް ދިން ފަހުން އަހަރެން ދިޔައީ. އެހާ ބަލިކޮށް އުޅެމުން އެތަނުގައި އިނުމުގެ ބޭނުމެއް ނެތީމަ އަސްލު ދިޔައީ. އެވޯޑް ނުލިބިގެން ހިތްހަމަނުޖެހިގެނެއް ނޫން."
އޭނާ ބުނީ އަފީ އަށް އެންމެ މޮޅު ބަތަލާގެ އެވޯޑް ހައްގު ކަމަށާއި އެކަމާ އެއްވެސް ސުވާލެއް ނެތް ކަމަށެވެ.
"އަފީއަކީ އަނެއްކާ އަހަރެންގެ ވަރަށް ގާތް ރައްޓެއްސެއް. ހަގީގަތުގައި ވަރަށް އުފާވި އޭނަ އަށް އެވޯޑް ލިބުނީމަ،" މި ހަށިން ފުރާނަ ދަންދެން އާއި "ސަޒާ" އިން އެންމެ މޮޅު ބަތަލާގެ އެވޯޑަށް ވާދަކުރި ނިއުމާ ބުންޏެވެ.
"އޯވަރޯލްކޮށް އެވޯޑްގެ ޖަޖިން ހަމަ ވަރަަށް ފެއާއޭ ބުނެވޭނީ."
ނިއުމާ ބުނީ އެންމެ މޮޅު ބަތަލާގެ އެވޯޑް އޭނާ އަށް ނުލިބިގެން ހިތްހަމަނުޖެހެންވީ ސަބަބެއް ނެތް ކަމަށެވެ.
އެންމެ ފަހުން ބޭއްވި ގައުމީ ފިލްމު އެވޯޑްސްގެ ދެ ހަފުލާގައި ވެސް އެންމެ މޮޅު ބަތަލާގެ އެވޯޑް އުފުލީ ނިއުމާ އެވެ. އެހެންވެ މި ފަހަރު އެ އެވޯޑް ލިބުނު ނަމަ ނިއުމާ އަށް ހެޓްރިކެއް ހެދޭނެ އެވެ.
"އެވޯޑެއް ނުލިބިގެން ދެރަވާން ޖެހޭ ވަރުގެ މީހެއް ނޫން އަހަންނަކީ. މިހާރު ވެސް އެކި އެވޯޑްތަކުން އެންމެ މޮޅު ބަތަލާގެ ދިހަ އެވޯޑް އަހަރެންގެ އަތުގައި އެބަ އޮތް،" އޭނާ ބުންޏެވެ.
އޭގެ އިތުރުން ގައުމީ އިނާމު ވެސް އޭނާ އަށް ވަނީ ލިބިފަ އެވެ.
ނިއުމާގެ ނަމުން ނަން ދީގެން އޭނާ ޑައިރެކްޓް ކުރި "ނިއުމާ" އިން އެންމެ މޮޅު ޑައިރެކްޓަރުގެ އެވޯޑް ވެސް މިދިޔަ އަހަރު އުފުލާލި އެވެ.
ފިލްމީ ދާއިރާގައި 20 އަހަރަށް ވުރެ ގިނަ ދުވަސް ހޭދަކޮށްފައިވާ ބަތަލާ މިހާރު އަންނަނީ ދެވަނަ ޑައިރެކްޝަނަކަށް ތައްޔާރުވަމުންނެވެ. އަންނަ އަހަރުގެ މެދުތެރޭގައި ޝޫޓިން ފެށޭނެ ކަމަށް ލަފާކުރެވޭ ފިލްމުގެ ސްކްރީންޕްލޭ އަހުމަދު ޒަރީރު އަންނަނީ ލިޔަމުންނެވެ.