މިދިޔަ އަހަރު ބޭއްވި ހަ ވަނަ ގައުމީ ފިލްމް އެވޯޑްސްގައި އެންމެ މޮޅު ބަތަލާގެ އެވޯޑް ހޯދީ މަޝްހޫރު ބަތަކާ ނިއުމާ މުހައްމަދެވެ. މި އަހަރަކީ އަނެއްކާ ވެސް އެ ކާމިޔާބީ ތަކުރާރު ކުރަން އޭނާ އަށް ލިބޭ އިތުރު ފުރުސަތެކެވެ.
އެވޯޑްގައި ޖުމްލަ 11 ފީޗާ ފިލްމް ވާދަ ކުރާ އިރު، މީގެ ތެރެއިން ހަތަރު ފިލްމަކީ ނިއުމާ ބަތަލާގެ ރޯލް ކުޅެފައިވާ ފިލްމުތަކެވެ. އެއީ މި ހަށިން ފުރާނަ ދަންދެން، ޒަހަރު، ހިތް ޔާރާ ދީފާ، އަދި "ދިލަކަނި އެވެ.
ކުރު ފިލްމް ކެޓަގަރީގައި ހަ ފިލްމް ވާދަ ކުރާ އިރު، އޭގެ ތެރޭގައި ހިމެނޭ "13 އަށް ވިސްނާ 2000" ގެ ބަތަލާއަކީ ވެސް ނިއުމާ އެވެ.
އެހެންވެ އެއް ބަތަލާއެއްގެ އެންމެ ގިނަ ފިލްމްތަކަށް ބަލާ އިރު، އެ ރެކޯޑް އޮތީ ނިއުމާއަށެވެ. އެހެންވެ މި އަހަރު ބާއްވާ ހަތް ވަނަ ގައުމީ ފިލްމީ އެވޯޑްސްއަކީ ވެސް ނިއުމާގެ އަހަރަކަށްވުން ވަަރަށް ގާތެވެ.
މިކަމާ ނިއުމާ ބުނަނީ ކީކޭ ބާވަ އެވެ؟
ނިއުމާ ބުނީ އޭނާގެ ގިނަ ފިލްމުތަކެއް އެވޯޑްގައި ވާދަ ކުރުމަކީ ހިތްހަމަޖެހުމެއް ކަމަށެވެ. އެކަމަކު އެވޯޑާ ދޭތެރޭ މި ފަހަރު އޭނާ ކުރާ އުންމީދު ތަފާތެވެ.
"އަހަރެންގެ ފަސް ފިލްމެއް އެވޯޑްގައި އެބަ ވާދަ ކުރޭ. އެހެން ނަމަވެސް މި ފަހަރު އެންމެ ބޮޑަށް އުންމީދު ކުރާ އެވޯޑަކީ ތޭރަ އަށް ވިސްނާ ދެހާސް އިން އެންމެ މޮޅު ބަތަލާގެ އެވޯޑް،" މިދިޔަ އަހަރު "ނިއުމާ" އިން އެންމެ މޮޅު ބަތަލާގެ އެވޯޑް އުފުލާލި ހުނަރުވެރިޔާ ބުންޏެވެ.
ފިލްމީ ދާއިރާ އަށް ބަލައިފި ނަމަ، ނިއުމާ އަށް މިހާތަަނަށް ނުލިބޭ އެވޯޑެއް ނެތެވެ. އެންމެ މޮޅު ބަތަލާގެ މަގާމު އެތައް އެވޯޑެއްގައި ހޯދުމަށް ފަހު، 2010 ގައި އޭނާ ޑައިރެކްޓް ކުރި "ނިއުމާ" އިން ނިއުމާ ވަނީ އެންމެ މޮޅު ޑައިރެކްޓަރުގެ އެވޯޑް ވެސް އުފުލާލައިފަ އެވެ.
ނިއުމާގެ ހަތަރު ފީޗާ ފިލްމެއް މި ފަހަރު އެވޯޑްގައި ވާދަ ކުރާތީ، ގިނަ ބަޔަކު މިހާރު ވެސް އުންމީދުކޮށްގެން ތިބީ އެންމެ މޮޅު ބަތަލާގެ އެވޯޑް ނިއުމާ އުފުލައިލާނެ ކަަމަށެވެ. އެެހެންވެ އޭނާގެ އެވޯޑް ހަރުގަނޑަށް އެވޯޑެއް ނުވަތަ އެވޯޑްތަކެއް އަނެއްކާވެސް އިތުރު ވުމަށް ބޮޑު ފުރުސަތެއް އެބަ އޮތެވެ.