މާވެލްގެ އެންޓައި ހީރޯ "ވެނަމް"ގެ ތިން ވަނަ ބައެއްގެ މަސައްކަތް ފަށާފައިވާ ކަމަށް އޭގެ ޕްރޮޑަކްޝަން ސޮނީ ޕިކްޗާސް އިން ބުނެފި އެވެ.
ޓޮމް ހާޑީ ލީޑް ރޯލުން ފެންނަ ވެނަމްގެ ދެވަނަ ބައި "ލެޓް ދެއާ ބީ ކާނޭޖް" ރިލީޒްކޮށްފައި ވަނީ މިދިޔަ އަހަރުގެ ފަހުކޮޅުގަ އެވެ. އެއަށް ފަހު ފިލްމު ސީރީޒްގެ އިތުރު ބައެއް ނިކުންނާނެ ކަމަށް ޕްރޮޑަކްޝަނުން އިޝާރާތް ކޮށްފައިިވިޔަސް، ކުރިން އެކަން ކަށަވަރެއް ނުވެ އެވެ.
އިއްޔެ ސޮނީ އިން ވަނީ އެ ސީރީޒްގެ އިތުރު ފިލްމެއް ނެރޭނެކަން އިއުލާނުކޮށްފަ އެވެ. އަދި ފިލްމުގެ ޕްރޮޑަކްޝަން މިހާރު ފަށާފައިވާ ކަމަށް ވެސް ބުންޏެވެ.
ފިލްމުގެ ޕްރީ ޕްރޮޑަކްޝަން ކުރިއަށް ދާއިރު، ސްކްރިޕްޓް މަސައްކަތް ވަނީ މިހާރު ފަށައިފަ އެވެ. އަދި ކުރިއަށް އޮތް މަހެއްގެ ތެރޭގައި އިތުރު މަސައްކަތް ފަށާއިރު، ފިލްމުގެ ޝޫޓިންތައް ފަށާނެ ދުވަހެއް އަދި ނޭނގެ އެވެ.
ވެނަމްގެ ދެވަނަ ބަޔަކީ ބެލުންތެރިންނަށް އެހާ ކަމުދިޔަ ފިލްމަކަށް ނުވި އެވެ. ނަމަވެސް، ބޮކްސް އޮފީހުގައި ފިލްމަށް ރަނގަޅު އާމްދަނީ އެއް ލިބިފައިވުމުގެ ސަބަބުން އެ ފިލްމުގެ ތިންވަނަ ބައެއް ނެރުމަށް ވަނީ ހަމަޖައްސައިފަ އެވެ.
ވެނަމްގެ ދެވަނަ ބަޔަށް ވަނީ 500 މިލިއަން ޑޮލަރަށް ވުރެ ބޮޑު އާމްދަނީއެއް ލިބިފަ އެވެ.