އަލިފުށީގައި ޓިވެޓް ސެންޓަރެއް ހަދަން ހަވާލުކޮށްފި

ރާއްޖޭގެ އެކި ސަރަހައްދުތަކަށް އަމާޒުކޮށް މަތީ ތައުލީމާއި ތަމްރީނު ދޭ މަރުކަޒުތައް ބިނާކޮށް ހިންގުމަށް ކުރިއަށް ގެންދާ މަޝްރޫއުގެ ތެރެއިން ރ.އަލިފުށީގައި އިމާރަތްކުރަން ހަމަޖެހިފައިވާ ސްޓޭޓް އޮފް ދި އާޓް ޓެކްނިކަލް އަދި ވޮކޭޝަނަލް އެޑިކުއޭޝަން ޓްރައިނިން (ޓިވެޓް) ސެންޓަރުގެ މަސައްކަތް ކޮންޓްރެކްޓަރަކާ ހަވާލުކޮށް އެއްބަސްވުމުގައި މިއަދު ސޮއިކޮށްފި އެވެ.

އަލިފުށީގައި ޓިވެޓް ސެންޓަރެއް ހެދުމުގެ މަސައްކަތް ހަވާލުކުރީ ވީ އަވަ އިންވެސްޓްމެންޓް ޕްރައިވެޓް ލިމިޓެޑާ އެވެ. މި މަސައްކަތް ހަވާލުކުރީ 365 ދުވަހުގެ ތެރޭގައި ނިންމާ ގޮތަށެވެ.

ހަޔާ އެޑިއުކޭޝަނުން މިއަދު ބުނީ އަލިފުށީގައި 38،328 އަކަފޫޓް ބިމެއްގައި ޓިވެޓް ސެންޓަރު އިމާރާތް ކުރުމަށް ހަމަޖެހިފައިވަނީ އަލިފުށީ ޕޮލިޓެކްނިކް ކެމްޕަސް ބިމާ, އެބިމުގެ ހުޅަނގުން އޮތް ބިން ހިމެނޭ ގޮތަށް އޮތް 38،328 އަކަފޫޓު ބިމެއްގައި ކަމަށެވެ.

ބޯޓް ބިލްޑިން ދާއިރާގެ އެކި ލެވެލްތަކުގެ ކޯސްތައް ހިންގުމަށް ހާއްސަކޮށްގެން ހަދާ މި ޓިވެޓް ސެންޓަރު އިމާރާތްކުރުމަށް ހަމަޖެހިފައިވަނީ ތިން ފަންގިފިލާ ހިމެނޭ ގޮތަށް އިންސްޓިއުޓް ބްލޮކަކާއި ބޯޓްޔާޑަކާއި އެކޮމޮޑޭޝަން ބްލޮކަކާއި އެކްޓިވިޓީ އޭރިއާއެއް ހިމެނޭ ގޮތަށެވެ.

ޓިވެޓް ސެންޓަރުގައި އެއްފަހަރާ 150 ދަރިވަރުންނަށް ކިޔަވައިދެވޭނެ ކެޕޭސިޓީ ހުންނާނެ ކަމަށާއި އެކޮމޮޑޭޝަން ބްލޮކްގައި 58 ދަރިވަރުންގެ ޖާގަ ހުންނާނެކަމަށް ހަޔާ އެޑިއުކޭޝަނުން ބުންޏެވެ.