އިންތި ނަޒާހަތްތެރި ނަމަ މިވަރު ނުކޮށްލާނެ، ސާބިތުކޮށްދީ: ފަޔާ

ދުނިޔޭގައި ނެތް ވަރުގެ ނުބައި މީހަކަށް ކުއްލިއަކަށް އޭނާ ބަދަލުކޮށްލި އިރު ވާދަވެރި ކެންޑިޑޭޓް އިމްތިޔާޒް ފަހުމީ (އިންތި) ނަޒާހަތްތެރި ނަމަ އެ ހިސާބަށް ނުގެންދަވާނެ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް (ފަޔާ) އިއްޔެ ވިދާޅުވެއްޖެ އެވެ.

އެމްޑީޕީގެ ޗެއާޕާސަން އިންތިހާބާ ގުޅޭ ގޮތުން "މިހާރު"އަށް ދެއްވި ހާއްސަ އިންޓަވިއުގައި ފަޔާ ވިދާޅުވީ މި ކެމްޕޭން ފެށުނީއްސުރެން ވައްކަމާއި ހިޔާނާތާއި ނުފޫޒާއި އެ ނޫން ވެސް ހުރިހާ ނުބައި އިލްޒާމެއް އަޅުވައި ބަދުނާމު ކުރަމުންދާތީ "ހިތުގައި ޖެހޭ" ކަމަށެވެ. އެކުގައި މަސައްކަތްތަކެއް ކުރެއްވި އިންތިގެ ފަރާތުން އެކަން ފެނުން އޭނާއަށް ގަބޫލު ނުކުރެއްވޭ ކަމަށް ވިދާޅުވި އެވެ.

އިންތި މި ކެމްޕޭނުގައި ފަޔާއަށް އަމާޒުކުރައްވަނީ ވައްކަމާއި ކޮރަޕްޝަނާއި ދައުލަތުގެ ބަޖެޓުން އާއިލާއަށް ފައިދާ ހޯދައިދޭ ކަމާއި ނުފޫޒުން ވޯޓު ހޯދުމުގެ އިތުރުން މަނީ ލޯންޑްރިން ހިންގި ކަމުގެ ތުހުމަތެވެ. ވަޒީރު ކަމުގެ ޒިންމާ ފުރިހަމައަށް އަދާނުކުރެއްވޭ ކަމުގެ މިސާލުތަކާއި ޕާޓީގެ ފިކުރާ ދުރު ބޭފުޅެއް ކަމުގެ ތުހުމަތު ވެސް ވަނީ އަޅުވައިފަ އެވެ.

ކެމްޕޭނުގައި އިންތިގެ ސްލޯގަން "ތިލަފަތުގެ ރަމްޒު" އެއީ ހަމަހަމަކަމާއި އިންސާފާއި ޕާޓީން ދަމަހައްޓާ އުސޫލްތައް ކަމަށް ވިދާޅުވާ އިރު އޭނާއާ ދޭތެރޭގައި އެކަން ނެތީ ކީއްވެތޯ ފަޔާ ސުވާލު އުފެއްދެވި އެވެ.

އޭނާ ވިދާޅުވީ އިންތި ނަޒާހާތްތެރި، އަދި އެ ވިދާޅުވާ އަސާސްތައް ހިފަހައްޓާ ނަމަ ސާބިތު ނުހިފޭ ވާހަކަތަކުން "ވަގެކޭ, ހިޔާނާތްތެރިއެކޭ" ވިދާޅެއް ނުވާނެ ކަަމަށެވެ.

"ބައްލަވާ އެންމެ ފަހަރަކު ވެސް އަހާލިންތޯ އަޅުގަނޑާ ދޭތެރޭގައި ކުރާ ތުހުމަތުގައި ފަޔާއޭ މިކަން އޮތީ ކިހިނެއްތޯ. ހަމަ ވައްކަމޭ ނުފޫޒޫ ނަޒާހަތްތެރި ނަމަ ނުކިޔޭނެ," ފަޔާ ވިދާޅުވި އެވެ.

"ނަޒާހަތްތެރިކަން ނެތީމާ, ޑިމޮކްރެޓިކް އުސޫލް ނެތީމާ އަދުލު އިންސާފުވެރިކަން ވެސް ނެތީމާ އެހެން ކިޔަނީ."

ފަޔާ ވިދާޅުވި ގޮތުގައި އަދުލު އިންސާފުގެ ކަންފުޅެއް އޮތް ނަމަ ވެސް އޭނާއަށް އަމާޒުކުރާ ތުހުމަތުތައް އިންތި އާއި އޭނާގެ ކެމްޕޭން ޓީމުން ރައްޔިތުންނާ ހަމައަށް ސާފުކޮށްދެއްވާނެ އެވެ.

ފަޔާ ވިދާޅުވި ގޮތުގައި ކެމްޕޭންގެ ފުރަތަމަ ދުވަހުން ފެށިގެން ވެސް އޭނާގެ އަޒުމަކަށް ވީ ރީތި ކެމްޕޭނެކެވެ. ފިތުނަތަކުން ޕާޓީގެ މަސްލަހަތު ނަގާ ނުލުމެވެ.

އެއާޚިލާފަށް، އިންތިގެ ޓީމުން ފެނުނީ ތުހުމަތުތަކުން އަބުރު ކަތިލަމުންދިޔަ މަންޒަރު ކަމަށް ވިދާޅުވި އެވެ. ކޮންމެ ގެއަކަށް، ރަށަކަށް ވަޑައިގެން ވެސް ވަގެއް ކަމުގެ ތުހުމަތު އަޅުވަމުންދިޔަ ކަމަށް ވިދާޅުވި އެވެ.

މުއައްސަސާތަކަށް ވެސް ހުށަނާޅާއި އެ ވާހަކަ ދައްކަވަމުންދިއުން ބަލައެއް ނުގަނެވޭ ކަމަށް ވިދާޅުވެ އެދިވަޑައިގަތީ ރައްޔިތުންގެ މަޖިލީހުގެ ކޮމިޓީއެއް ނަގައިގެން ވެސް އެކަންކަން ބައްލަވައިދެއްވުމަށެވެ.

"ތި ވިދާޅުވާ ނުފޫޒާ ކޮރަޕްޝަނާ ބައްލަވައިދޭށޭ އަޅުގަނޑު އާދޭސްކޮށްފައި މި ދަންނަވަނީ. ދެފައިގައި ހިފާ މި ދަންވަނީ ރައްޔިތުންގެ މަޖިލީހުގެ ރައީސަށް ވެސް އަޅުގަނޑުގެ ވާދަވެރި ކެންޑިޑޭޓަށް ވެސް ކޮމިޓީއެއް ހައްދަވާށޭ, އެ ބޭފުޅުން ބޭނުން ބަޔަކު ލައްވަވާށޭ،" ފަޔާ ވިދާޅުވި އެވެ.

"އަޅުގަނޑު އެދޭނީ އެންމެ ކަމަކަށް އެއީ އޯޕަން އިންކުއަރީއަކަށް ވާންވާނެއޭ. ކޮމިޓީގައި މަޝްވަރާއެއް ކުރެވޭ ކޮންމެ ވަގުތަކު ނޫސްވެރިންނަށް ތިބެވެންވާނެ. އާއްމު ރައްޔިތުންނަށް ވަދެވެންވާނެ. ޓީވީން ދެއްކެންވާނެ."

އެއީ ފުރިހަމައަށް އޭނާ އާއި އޭނާގެ ޓީމަށް ޖަވާބުދާރީވުމަށް ދެއްވަން ޖެހޭ ފުރުސަތެއް ކަމަށް ވިދާޅުވި އެވެ.

ފަޔާ އެދިވަޑައިގަތީ ވީހާވެސް އަވަހަކަށް އެކަން ކޮށްދެއްވުމަށެވެ.

އެކަން ކުރުން މާ ލަސްވެ ބޮޑެތި ފިތުނަތަކެއް ވެސް ޕާޓީގެ ތެރޭގައި އުފައްދާއި ޕާޓީ އާއި ސަރުކާރަށް ވެސް އިތުބާރު ގެއްލުވާލާފައިވާ ކަމަށް ވިދާޅުވި އެވެ.

"ހިތުގައި އަނދައަނދާ އޮތް އަލިފާންގަނޑެއް ނުކުމެގެން ގޮސް މިހާރު ކުރެވުނު ހުރިހާ މަސައްކަތެއްގައި ރޯވެ ހުޅުޖެހި އަނދައިގެންދާ ހިސާބަށް މި ދަނީ," ފަޔާ ވިދާޅުވި އެވެ.

"އެހެންވީމަ ސާބިތުކޮށްދެއްވަން އެބަޖެހޭ. އެ ބޭފުޅުން އެ ވިދާޅުވާ ނަޒާހަތްތެރި އަދުލުވެރި, ޑިމޮކްރެޓިކް ނަމަ އެ އިލްޒާމްތަކުގެ ސާފުކަން ރައްޔިތުންނާ ހިސާބަށް ގެނެސްދޭން ޖެހޭނެ."

މި ކެމްޕޭނުގައި ފަޔާއަށް އަމާޒުކުރާ އެއް ތުހުމަތަކީ ޕާޓީގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާ ގުޅުވައި ބޭއްވި އެމްޑީޕީގެ ގައުމީ މަޖިލީހުގެ ޖަލްސާތަކުގެ ކޯރަމް ހަމަނުކުރަން މަސައްކަތް ކުރައްވާފައިވުމެވެ.

އެ ވާހަކަތަކުގައި ވެސް ފަޔާ ވިދާޅުވި ގޮތުގައި ހަގީގަތެއް ނެތެވެ.

"ކަނޑައެޅިގެން ރޯ ދޮގު ވާހަކަތަކެއް އިނގޭތޯ. ފުރަތަމަ ތި ވާހަކަ އައީ ގައުމީ މަޖިލީސްއޭ ކިޔައިގެނެއް ނޫން. ފުރަތަމަ ތި ވާހަކަ އަކީ މަޖިލިސް 241 ކޮމިޓީން މެމްބަރުން ބޭރުކުރަން އަޅުގަނޑު އުޅުނީއޭ ކިޔައިގެން, ނުވެސް ދެނަހުރިން އެ ކޮމިޓީގެ ކަންކަން އޮތް ގޮތެއް," ފަޔާ ވިދާޅުވި އެވެ.

އޭނާ ވިދާޅުވި ގޮތުގައި ނަޝީދުގެ ހަމަލާއާ ގުޅުވައި ކޮންމެ ރެއަކު ލައިވްކޮށްގެން ބޭއްވި ގައުމީ މަޖިލީހުގެ ޖަލްސާތަކުގައި އޭނާ ބައިވެރިވުމެއް ނެތީ ސިޔާސީ ގޮތުން "ބޮޑު ކަލްޓް ލީޑަރަކު" އުފެއްދުމުގެ ސިފަތަކަކަށް އެ ބައްދަލުވުން ބަދަލުވުމާއި މަސައްކަތް ހުރި ގޮތުން ކޮންމެ ރެއަކު ބައިވެރިވެވެން ނެތުމުންނެވެ.

އެ ޖަލްސާތަކުގެ މައިގަނޑު އަމާޒަކަށް ވެފައި އޮތް އެއް ކަމަކީ ސަރުކާރު ބަދުނާމު ކުރުން ކަމަށް ވިދާޅުވި އެވެ.

ފަޔާ ވިދާޅުވި ގޮތުގައި އެމްޑީޕީ ތަމްސީލްކުރާ ސަރުކާރެއްގެ ކެބިނެޓު ވަޒީރެއްގެ ގޮތުގައި އޭނާ ހުންނަވައި ޖަލްސާގައި އިންނަވައި އެ ފާޑުކިއުންތަކުގައި ބައިވެރިވެވަޑައިގަތުމަށް ބޭނުން ނުވީ އެވެ.

"މުޅިން އޭތި ރޭވިފައި އޮތް ގޮތް ކޮންމެ ބޭފުޅަކު ވެސް ބައްލަވާ. އެ ވާހަކަ ވެސް ތިލަކުރައްވާ އިރު ސާބިތު ކުރެއްވޭ ވާހަކަ ދައްކަވަން އެބަޖެހޭ. އަޅުގަނޑުމެންގެ އަތުގައި ވެސް އެބަހުއްޓޭ އެނގޭތޯ ވަރަށް ވާހަކަ. ވަރަށް ވާހަކަ އެބަހުއްޓޭ. ނުދައްކާ ނަމޭ ސާބިތުކުރެވޭ ގޮތަކަށް މެނުވީ."

ފަޔާ ސިފަކުރެއްވި ގޮތުގައި ހުރިހާ ތުހުމަތެއްގެ އަސްލަކީ ސަރުކާރު ބަލިކަށިކުރަން ކުރާ މަސައްކަތުގައި "އޭނާ ސައިޒުކޮށްލުމެ"ވެ. ނަޝީދު ޕާޓީން ބޭރުކޮށްލުމުގެ ތުހުމަތު އެޅުވުން އޭނާއަށް މާނަކުރެއްވެނީ އެ މަނިކުފާނު ބޭނުންވާ ހުރިހާ ގޮތަކަށް ކަންކަން ނުހިނގާނެ ކަމުގެ ވާހަކަ އެވެ.

ޗެއާޕާސަން ކަމަށް އޭނާ ވާދަކުރެއްވީ އަސާސީ ގަވާއިދު އޮތް ތަނެއްގައި ބާއްވާފައި ވަކި ބޭފުޅެއްގެ އެންގެވުންތައް ތަންފީޒު ކުރައްވަން ނޫން ކަމަށް ސާފުކޮށް ވިދާޅުވާން ކެރިވަޑައިގަންނަވާނެ ކަމަށް ފަޔާ ވިދާޅުވި އެވެ.

"އެއީ، ރައީސް ނަޝީދު ވިޔަސް، ރައީސް ސޯލިހް ވިޔަސް. އަޅުގަނޑެއް ނޫން، އެގޮތަށް ވާން ޗެއާޕާސަންގެ މަގާމުގައި އިންނާނީ. އަޅުގަނޑަށް އެއްބަސް ނުވެވޭ ކަންކަމުގައި، އަސާސީ ގަވާއިދާ އެއްގޮތަށް ނުދާ ކަންކަމުގައި ވަނީ ނަމަ ބަސްކިޔާނެ،" ފަޔާ ވިދާޅުވި އެވެ.

ސަރުކާރުން މި އިންތިހާބަށް ބިރު ދައްކަނީއޭ ނުފޫޒު ފޯރުވަނީ ކަމުގެ ތުހުމަތުކުރާ އިރު އިންތިގެ ޓީމުގައި ހަރަކާތްތެރިކޮށް އުޅުއްވަނީ ސަރުކާރުގެ ވަޒީފާތަކުގައި ތިއްބެވި ޕާޓީގެ މެމްބަރުން ކަމަށް ފަޔާ ވިދާޅުވި އެވެ. އޭގެތެރޭގައި އޭނާގެ މިނިސްޓްރީގެ އެސްއީޑީންގެ ގޮތުގައި ތިއްބެވި ބޭފުޅުން ވެސް އިންތިގެ ޓީމާ އެކު އުޅޭއިރު އެ ވިދާޅުވާ ނުފޫޒެއް ކޮބައިތޯ ފަޔާ ސުވާލު އުފެއްދެވި އެވެ.

ފަޔާ ވިދާޅުވި ގޮތުގައި އެމްޑީޕީގެ ބައެއް މީހުންނަކީ މެހި މާބުރު ކަމަށް ސިފަކުރެއްވި ބޭފުޅާ އެމްޑީޕީއަށް އެންމެ އުނދަގޫ ދަނޑިވަޅު ހަރަކާތްތަކުން ނުފެނެ އެވެ.

އެއަށް ވުރެން އެމްޑީޕީގެ އަންހެނުންގެ ރޫހުގެ ރައީސާ ކަމަށް ވާދަކުރައްވާ މިދޫ ދާއިރާގެ މެމްބަރު ރޮޒައިނާ ވެސް މާ ހިދުމަތްތެރި ކަމަށާއި ޕާޓީއާ ގުޅިވަޑައިގަތް ހިސާބުން މަގުމަތީ ހަރަކާތްތަކުން ފެށިގެން މަޖިލީހުގައި ވިޔަސް ޕާޓީއާ އެކު ދެމިހުންނެވި ކަން ފަޔާ ފާހަގަކުރެއްވި އެވެ.

އެމްޑީޕީގައި ތިމަންނާމެންނަކީ ޑިމޮކްރެޓިކް މީހުން ކަމަށް ސިފަކުރާ އިރު އެފަދަ ނަފްރަތާއި ފިތުނަ އުފައްދައި ޕާޓީ ބައިބައިކުރުމަކީ ޕާޓީގެ އުފެއްދި މަގްސަދާއި އަސާސްތަކާ މާ ދުރު ސިފައެކެވެ. އެ ގަބޫލުކުރުމަށް ތާއީދު ނުކުރާ ކޮންމެ މެމްބަރަކީ އެމްޑީޕީގެ ފިކުރު ނޫން ކަމަށް ސިފަކުރުމަކީ ވެސް ޕާޓީގެ އަސާސީ ގަވާއިދުގައި އޮތް ގޮތް ނޫން ކަމަށް ވިދާޅުވި އެވެ.

"އަޅުގަނޑު މިހާރު ވެސް މިދަންނަވަނީ ޑިމޮކްރެޓިކް ކަންކަމުގައި އަޅުގަނޑުގެ ހިތުގައި އޮތް ލޯބި މާ ބޮޑު," ފަޔާ ވިދާޅުވި އެވެ.