މަހާނަ ރީތި ކުރުމުގެ ވާދަވެރިކަމެއް ފެށި، އާސަހަރާގެ ބައެއް މަހާނަތައް މިހާރު ވަނީ ބޮޑު އަގު ދީގެން އަލުން ހަދައިފައި. އަގު އުޅެނީ 1،500ރ. އިން 3،500ރ.އާ ދެމެދު.
އާސަހަރާގައި މަހާނަތަކުގެ ކައިރީގައި ގާފޮޅު ރޭނުމާއި ވެލި އެޅުން މިހާރު ވަނީ ބޮޑު ވިޔަފާރިއަކަށް ބަދަލުވެފައި -- ފޮޓޯ/ ފަޔާޒު މޫސާ
25 މެއި 2022 - 06:34
132 comments
ބައްޕަގެ މަހާނަ ބަލައިލަން އާސަހަރާ އަށް ޒިޔާރާތްކުރި މީހެއްގެ ކައިރިއަށް ޖަމާއަތްތެރިއަކު ގޮސް، މަހާނަ ރީތިކޮށްލަން ބޭނުންތޯ ސުވާލު ކުރި އެވެ. އޭނާ ވަށައިގެން ނަޒަރު ހިންގާލި އިރު، ބައެއް އެހެން މަހާނަތައް ވެސް ހުރީ ރީތިކޮށްފަ އެވެ.
ޖަމާއަތްތެރިޔާ އަގު ވެސް ކިޔެވެ. ވެލި އަޅައިދޭ އަގަކީ 300ރ. އެވެ. ހަމައެކަނި މަހާނައަކަށް ވެލި އަޅާލަން އެއީ ބޮޑު އަގެއް ނަމަަވެސް، ބައްޕަގެ މަހާނަ ރީތިކޮށް ބަލަހައްޓަން ބޭނުންވާތީ އެ ކަން ކުރަން އޭނާ އެއްބަސްވި އެވެ.
މިއީ އާސަހަރާ އަށް އާއިލާގެ މީހެއްގެ މަހާނަ ކައިރި އަށް ޒިޔާރާތް ކުރާ ކޮންމެ މީހަކަށް ހެން މިހާރު ލިބޭ "އޮފާ"ތަކެކެވެ. އެ ކަން މިހާރު މި ވަނީ ބޮޑު ވިޔަފާރިއަކަށް ބަދަލުވެފަ އެވެ.
ގާފޮޅު ރޭނުން އާންމު ކަމަކަށް!
"މިހާރު" ގެ ނޫސްވެރިން އާސަހަރާ އަށް ގޮސް ބެލިބެލުމުން ފެނުނީ ގިނަ މަހާނަތަކެއްގެ ކައިރީގައި ގާފޮޅު ރާނާފައި ހުރި ތަނެވެ. ފާހަގަވި އެއް ކަމަކީ އެކަކަށް ވުރެ ރީއްޗަށް އަނެކަކު އެ ކަން ކުރަން މަސައްކަތް ކޮށްފައި ހުރި ކަމެވެ.
ސަހަރާގެ ތެރެއިން ވާހަކަ ދެއްކި ޖަމާއަތްތެރިއަކު ބުނީ އެއީ ކުރިން އާންމު ކަމެއް ނޫން ކަމަށެވެ. އެ ކަން އާންމުވީ ވަރަށް ފަހުން ކަމަށް އޭނާ ބުންޏެވެ.
މިހާރު އާސަހަރާގައި މީހުން ވަޅުލާ ތަނަށް އިތުރަށް ވެލި އަޅާ ގޮތަކަށް ނިންމައިފައެއް އަދި ނެތެވެ. ދެން އެ ތަނަށް ވެލި ނާޅާނެ ކަމަށް ވާހަކަ ދެއްކި ބައެއް ޖަމާއަތްތެރިން ބުންޏެވެ. އެ މީހުން ބުނި ގޮތުގައި ގިނަ މީހުން އެ ގޮތަށް ރާނާ ސަބަބަކީ އެއީ އެވެެ.
ސަހަރާއަށް ދާ މީހުންގެ ކައިރިއަށް އައިސް އެ ކަން ކުރާ މީހުން އެކަމަށް އެދޭ -- ފޮޓޯ/ ފަޔާޒު މޫސާ
"ސަހަރާ އަށް އައިސްފައި މި ހިތަށް އަރަނީ އޭނާ ވެސް އެ އޮތީ މަންމަގެ މަހާނައިގައި ގާފޮޅު ރާނާލައި މުށި ޖަހާލައިފައޭ. ތިމަންނަ ވެސް ޖެހޭނެއޭ އެ ކަން ކޮށްލަން އެ އަށް ވުރެ ރީއްޗަށް،" ޖަމާއަތްތެރިޔާ ބުންޏެވެ.
އެ ކަން ހަގީގަތުގައި ވެސް އެ ތަނުން ފެނެ އެވެ. އެކަކަށް ވުރެ ރީއްޗަށް އަނެކަކު އެ މަސައްކަތް ކުރަން އުޅެފައި ހުރިކަން ފާހަގަ ކުރެވެ އެވެ.
ޖަމާއަތްތެރިއަކު އެކަން ކުރޭ!
އާސަހަރާ އިން ވާހަކަ ދެއްކި ޖަމާއަތްތެރިން ބުނި ގޮތުގައި، އެ މީހުންގެ ތެރެއިން އެކަކު އެ މަސައްކަތުގައި ޝާމިލުވެ އުޅެ އެވެ. އަދި އެ ތަނުގައި ވަޅުލާ މީހުންގެ އާއިލާ މީހުންނަށް ގުޅައި، އެ ކަންތައްތައް ކުރަން ހިތްވަރު ދޭ ކަމަށް، އެކަން ދަންނަ މީހުން ބުނެ އެވެ.
"މި ތަނުގައި އޮންނާނެ މައްޔިތުންގެ މައުލޫމާތު ލިޔާ ފޮތެއް. އޭގައި އޮންނާނެ މައްޔިތުންގެ އަހުލުވެރިންގެ ނަންބަރު ވެސް. އެ ނަންބަރުތައް އޭނާގެ ޑިއުޓީ ގަޑީގައި ނޫނަސް ހާވާތަން ފެނޭ،" ޖަމާއަތްތެރިއަކު ކިޔައިދިނެވެ.
އެ ކަންކަން ކުރުމަށްޓަކައި ވެއްޔާއި ގާ ވެސް ގެންނަނީ ފާޅުގަ އެވެ. ހަމައެކަނި އެ ބޭނުމަށް، އިއްޔެ ވެސް ދެ ޕިކަޕުގެ ވެލި ސަހަރާ އަށް ވެއްދި މަންޒަރު އެ ތަނުގެ މަސައްކަތު މީހުންނަށް ވަނީ ފެނިފަ އެވެ.
އާސަހަރާ ތެރޭގައި ވެލި ބަސްްތާތަކެއް ބަހައްޓާފައި، މީހުން ވަޅުލަން ވެލި ނެރޭނީ ވަޅުލަން ވީމާ އެކަނި -- ފޮޓޯ/ ފަޔާޒު މޫސާ
ޖަމާއަތްތެރިން ކިޔައިދިން ގޮތުގައި އެކަން ކޮށްދޭ އެކި ޕެކޭޖުތައް ހުރެ އެވެ. އާދައިގެ ގޮތަކަށް، ރާނައިދޭ ނަމަ އެކަން ކޮށްދެނީ 1،500ރ. އަށެވެ. މޮޅު ފެންވަރަށް މުށި ޖަހައިގެން ނަމަ 3،500ރ. އަށެވެ. މަހާނަ އަށް ވެލި އަޅައިދެނީ 300ރ. އަށެވެ. އަދިވެސް ބައެއް ޕެކޭޖުތައް ހުރެ އެވެ.
މިއީ މަނާ ކަމެއް!
އާސަހަރާގެ ކަންކަން ބަލަހައްޓަން ސިޓީ ކައުންސިލުން ކަނޑައަޅާފައި ހުންނަ އޮފިޝަލު "މިހާރު" އަށް ވިދާޅުވީ، އެ ކަން ކުރުމަކީ އެ ތަނުގެ މަސައްކަތު މީހުންނަށް އަދި ޖަމާއަތްތެރިންނަށް ވެސް މަނާކަމެއް ކަމަށެވެ. މަސައްކަތު މީހުން އެ ކަން ކުރާކަން ސަމާލު ކަމަށް އައިސް އެ ކަން ނުކުރުމަށް އަންގާފައި ވާނެ ކަމަށް އޭނާ ވިދާޅުވި އެވެ.
"ސަހަރާގައި މަސައްކަތް ކުރާ މީހުންނަކަށް ހުއްދައެއް ނޯންނާނެ އެ ގޮތަށް އެ ކަންތައް ކުރާކަށް. މަސައްކަތު މީހުން އެ ކަން ކުރާކަމުގެ ޝަކުވާ އައިސްގެން އަޅުގަނޑު ވާނީ އެ މީހުންނަށް އެކަން ނުކުރަން އަންގައިފައި. ޖަމާއަތްތެރިއަކު އެކަން ކުރާކަމުގެ ޝަކުވާއެއް އައިސްފައެއް ނުވޭ،" އޭނާ ވިދާޅުވި އެވެ.
އާސަހަރާގައި ގާފޮޅު ރާނާފައިވާ މަހާނައެއް -- ފޮޓޯ/ ފަޔާޒު މޫސާ
އެ ފަދަ ކަމެއް ފާހަގަ ކުރެވޭ ނަމަ އެ ކަން ހުއްޓުވާނެ ކަމަށް ވެސް އޮފިޝަލް ވިދާޅުވި އެވެ.
މަހާނަ ގާ ބެހެއްޓުމާއި ވެލި އެޅުމަކީ މީގެ ކުރިން ވެސް ދިވެހިން ކޮށް އުޅުނު ކަމެކެވެ. އާސަހަރާގައި ވެސް އެ ކަން ކުރިން ވެސް ކުރެ އެވެ. އެކަމަކު މިހާރު ވަނީ ބޮޑު ވިޔަފާރިއަކަށް ބަދަލު ވެފަ އެވެ.
އެ މައްސަލައިގައި ދީނީ ބައެއް އިލްމުވެރިން ވަނީ ކަންބޮޑުވުން ވެސް ފާޅުކުރައްވައިފަ އެވެ. އެ ފަދަ ވާދަވެރި ކަމެއްގެ ތެރެއިން އެ ފެށެނީ ބިދުއައެއް ކަމަށާއި އެއީ ބޭނުމެއް ނެތް ކަމެއް ކަމަށް އެ ބޭފުޅުން ވިދާޅުވި އެވެ. ދިރިތިބީންނަށް އޮތްހާ ވެސް ކަމަކީ، މައްޔިތާ އަށް ހެޔޮ ރަހުމަތް ލެއްވުން އެދި ދުއާކުރުން ކަމަށް ވިދާޅުވެ، އެ ކަހަލަ ނާތަހުޒީބީ އަމަލުތަކުން ދުރުވެ ތިބުމަށް އިލްމުވެރިން ވަނީ ގޮވާލައްވައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަގޭ ކަމަކާ ކަލެއަކައް ނުބެހެވޭނެ!
29 May 2022
ވިޔަފާރި ކުރުމަކީ ރަގަޅު ކަމެއް. އެއީ ދެމީހަކު އެއްބަސްވެގެން އެކަކު އަނެކަކައް ކޮއްދޭ ކަމެއް. އެ ކަމުގެ އެއްބަސްވި އުޖޫރަ އެއްގެ ގޮތުން ފައިސާ ދެނީ! މަހާނަ ރީތި ކުރުމަކީ އެއާއިލާއެއްގެ އިހްތިޔާރެއް! އެހެން ކަނޑުކޮހަކައް ދަތްބާރުވާކައް ނުޖެހޭނެ! ކޮމެންޓް ތަކުގަ ޝީޢާއިން ނޫނީ ކްރިސްޗިއަން ކުރާކަމެކޭ ކިޔައިގެން ބިރުގަނޭތޯ ވާހަކަ ގިނަކުރާނިކަމެއްނެތް! އެމީހެއްގެ ހިސާބު ކިތާބު ބަލާނީ އެމީހެއްގެ އަމަލަކުން. އެހެންމީހުން ބޯކޮއްޕާކައް ނުޖެހޭ!
އެދުރުދައިތަ
27 May 2022
ސުބުޙާނަﷲ މީކޮންފަދަކަމެއް އަދި އަލަށްމިފެނުނީ އިސްލާމުންގެ މަހާނައިގަ މިގޮތަށް ޖަރީކޮށްފަ ހުރިތަން މިވަރަށް ޖަރީކޮށް ރީތިކޮށް މަހާނަމަތީގަ ބަގިޗާ ހައްދައިގެން ދުނިޔެމަތީގައި ކޮންމެފަދަގޮތަކަށް އުޅުނަސް ކަށްވަޅުގަ އެކަނިވެރިވެފަ އޮންނައިރު ކަށްވަޅުއެއީ އެމީހާއަށް ބަގީޗާއެއްކަމުގައި ލައްވާނެކަމަށް ހީކުރަނީތަ ކުށްހީއެއް
ކޮވެލި
26 May 2022
ބަލަ ކުރީ ޒަމާނުގައި މަތިމައްޗަށް ވެލި އަޅާ ނަހަދާ. އެހެން ކަމުން މަހާނަ ގަލުގައި އެ މީހަކު އުފަންވި ތާރީޚާ ނިޔާވި ތާރީޚު ލިޔެފައިވޭ. އޭރަކު އައިޑީ ކާޑެއް ނޯވޭ. އަދި ރަށު އޮފީހުގައި އޮންނަ ރެޖިސްޓްރީ އެއީ ކަތީބު ބޭނުން ގޮތަކަށް ބަދަލު ކުރާ އެއްޗެއް. މީހުންގެ ނަން އަދި އުފަން ތާރީޚު ބަދަލު ކުރުމަކީ އޭރު ޢާންމު ކަމެއް. އަދި މާ ބޮޑު ކަމެއްވެސް ނޫން.
އިބްރާހީމްސ
26 May 2022
ކޮންމެ ކަމަކީ ދީނީ ކަމަކަށް ވާންޖެހޭނެކަމަކަށް ނުދެކެން. މީސްމީހުން ސަގާފީގޮތުންނާ އާދަކާދައިގެ ގޮތުން ކުރަމުން އަންނަ ކަންކަން ހުންނާނެ.
ތަސްލީމާ
26 May 2022
ދީނަކީ އުޅެންވީ ގޮތް ކަމުގައި ވީހިނދު ދީނީ ކަމަކަށް ނުހެދެންވީ ކީއްވެ؟
ކިންގް އިލްހާމް
26 May 2022
ބޭނުންވަނީ އޯގާތެރިކަން ލޯތްބާއި ކުލުނު ، ދުނިޔޭގައި ހުންނަ އިރު އަދި މަރުވެ ދިޔުމަށްފަހުވެސް އެއިޙްސާސްތަށް ބިނާވެގެންދާ އިޙްލާޞްތެރި ޔެޔޮދުއާ، މިޔަދު މުޖުތަމަޢުގައި ކިތައްމައިންނާއި ބަފައިންތޯ އަޅާލުމާއި އޯގާތެރިކަމުން މަޙްރޫމްގެ ދަރިންގެ އަނިޔާވެރިކަމުގެ ޝިކާރައަކަށް ވެފައިވަނީ މުދަލާއި ފައިސާއާއި އަންބިންނާއި ފިރިންނަށްޓަކައި އަމިއްލަ މައިން ބަފައިން ނިކަމެތިކޮށާްލާފައިވަނީ
ާއަހައްމަދު
26 May 2022
މިކަންކަމާއި ހަޥާލުވެ ގެންތިބޭ އޮފިށަލުންނާއި މިމީސްމީިހުން މީ ޝަކުވާއެެއްއައިއްސިއްޔާ ބަލަންތިބޭބައެެއްތަ. ޙެޔޮލޯކުރިމަތީގަ ކިތަންމެ ބޮޑު މަނާކަމެއް ހިނގިޔަސް. ޢެެއްވެސް ޒިންމާދާރުކަމެއްނެތެއްނު. ޢާނ އެކަންތައް އަމިއްލަ އަށް ބަލާ ފިޔަވަޅު އެޅުމެެއްނު މިމީހުންގެ ޒިންމާޔަކީ. ޢެކަމަކު އަދިވެސް މުސާރަކުޑަވެގެން އެއުޅެނީ.
ކަތްދައްތަ
26 May 2022
އެދުވަސްވަރުގެ ހޭލުންތެރިކަން ހުރިގޮތުން އެކަން ކޮށްފަ ހުރީ މިހާރު އާސާރީ ތަނެއްގެ ގޮތުގަ ބަލަހައްޓަނީ. ބޮޑެތި މަހާނަގާ ޖަހާފަ ހުރީ, މަހާނަމަތީގަ ރާނާ ތަށިމުށިޖަހާ ގަސް އިންދާފަ ނުހުރޭ. ކްރިސްޓއަނުންގެ މަހާނައާ ތަފާތީ ދެކޮޅުގަ ގާ އިނީމަ . އެބައިމީހުންގެ އިންނަނީ ބޯލާކޮޅުގަ އެކަނި. މަހިތށް އަރަނީ ކީއްކުރަން ކުރާކަމެއްބާވައޭ. އމީހާ އަށް އެކަމުން ލިބޭނެ ފައިދާއެއްނެތް. ކަން ދެއްކުމަށް ކުރާ ކަންތައް.
މުޙައްމަދު123
25 May 2022
އަދި މާބޮނޑިއާއި މާފައްޗާއި ކާބޯތަކެތި ބަހައްޓާ ހިސާބަށް ވެސް ދާނެ. ގާތަކުގައި ފޮޓޯޖަހައި ކުދިކުދި ބުދު ބަހައްޓާ ހިސާބަށް ވެސް ނުގޮއްސިއްޔާ ރަނގަޅު. ދިވެހިންނަކީ އެހެން މީހުން ކުރާ ހުރިހާ ކަމެއް ކޮޕީކުރާހިތްވާ ބައެއް. ހަރާމެއް ހަލާލެއް ނުބަލާނެ.
އަމާގެ މަހާނަ
25 May 2022
ދެން ދުވަސްކޮޅަކުން ފެންނާނެ ކަންނޭނގެ މަހާނަތައްމަތީ މާބޮނޑިއާ ކާއެއްޗެހި ބަހައްޓާތަންވެސް
ޅިންޑި
26 May 2022
ދެންފެންނާނެ ކިޔާފަ ކިއިދާނެ ދުލައައިހާއެއްޗެ. ޢަޅެ ނަމުގެ ކުރިޔައް އޮއިބަސް ބޭނުން ކޮއްލައިގެން ޓުރައިކޮއްލަބަލަ.
ފަހުރުވެރި ދިވެއްސެއް
25 May 2022
މަހާނަ އަށް ވެލިލައި އައުކުރުމަކީ އެންމެ ރަނގަޅު ކަމެއް ކަމަށް ދެކެން. އަދި ގާފޮޅު ޖަހައި ކައްގަލެއް ޖެހުމަކީވެސް، ގަލުގައި ކާކުކަން އެނގޭނެހެން ނަމެއް ޖެހުމަކީވެސް މައްސަލައެއް ނޫންކަން ނޭނގެ. އެތައް ޒަމާނަކަށް އިސްލާމީ ތާރީޚު ފެނި، އެރަށެއް ނުވަތަ ތަނެއް ފަޅުވިޔަސް އެއީ މުސްލިމުން އުޅުނުތަނެއް ކަން ދިރި ތިބީންނަށް ބުނެދޭނެ. މުސްލިމު އެހެން ޤައުމުތަކުގައިވެސް މިކަންކަން މިގޮތަށް ކުރޭ. ސަރުކާރުންވެސް ކޮށްދޭން ހަމަ ރަނގަޅު އޭރުން ވިޔަފާރި ހުއްޓޭނެ