ހައްޖަށް ދިއުމަށް ކިއުގައި މި ވަގުތު 3،500 އެއްހާ މީހުން އެބަތިބި ކަމަށާއި ކުރީގެ އުސޫލާ އެއްގޮތަށް ފުރުސަތު ލިބޭ ނަމަ ތިން އަހަރުގެ ތެރޭގައި ކިއު ހުސްކޮށްލެވޭނެ ކަމަށް ހައްޖު ކޯޕަރޭޝަނުން މިއަދު ބުނެފި އެވެ.
ހައްޖު ކޯޕަރޭޝަންގެ މެނޭޖިން ޑިރެކްޓަރު އިސްމާއިލް ހަމީދު "މިހާރު" އަށް ވިދާޅުވީ، އެ ކުންފުނިން މީހުން ހައްޖަށް ގެންގޮސްދޭ އަގުގެ 75 ޕަސެންޓް ދެއްކުމުން ވެއިޓްލިސްޓުކޮށްދޭ ކަމަށެވެ. މިހާރު ވެސް 3،400-3،500 ދެމެދުގެ މީހުން ކިއުގައި އެބަތިބި ކަމަށް އޭނާ ވިދާޅުވި އެވެ.
ސަރުކާރުގެ ކުންފުނިން ހައްޖަށް ގެންގޮސްދެނީ 69،965ރ. އަށެވެ. ކިއުގައި ޖައްސައިދެނީ 52،500ރ. ދެއްކުމުންނެވެ.
ހަމީދު ވިދާޅުވީ ކޮވިޑުގެ ހާލަތުގެ ކުރިން ހައްޖަށް ގެންދިއުމަށް އެ ކުންފުންޏަށް 1،000 މީހުންގެ ކޯޓާ ލިބޭ ކަމަށެވެ. ކިއު ދިގުވެގެން ދިޔައީ ވެސް ސައުދީން އަރަބިއްޔާއިން ބޭރުގައި އުޅޭ މީހުންނަށް ހައްޖަށް ދާން ފާއިތުވި ދެ އަހަރު ކޯޓާ ނުލިބުމުންނެވެ. ނަމަވެސް އެ ގައުމުން ވަނީ ރާއްޖެއިން ހައްޖަށް ގެންދަން މި އަހަރު 453 ކޯޓާ ލިބިފައިވާކަން ރަސްމީކޮށް އަންގައިފަ އެވެ.
ސަރުކާރުން ނިންމާފައި ވަނީ އެ ކޯޓާ ހައްޖު ކޯޕަރޭޝަނަށް އެކަނި ދޭށެވެ. އޭގެ ތެރެއިން އާއްމުންނަށް ހުޅުވާލަން ނިންމާފައިވަނީ 100 ފުރުސަތެވެ. ބާކީ 353 ޖާގަ ދޭނީ ހައްޖު ކޯޕަރޭޝަންގެ ކިއުގައި ތިބި މީހުންނަށެވެ.
ހައްޖަށް ދާން ފައިސާ ދައްކާފައި ތިބި މީހުންގެ ކިއު ދިގުވިއަސް އެ ކުންފުނިން އަދި ވެސް އޮތީ ކިއުއަށް ހުޅުވާލައިފަ އެވެ.
"އެޑްވާންސް ދެއްކުމަށްފަހު ބާކީވާ ފައިސާ ދައްކަންޖެހޭނެ ހައްޖަށް ދިއުމުގެ ކުރިން،" ހަމީދު ވިދާޅުވި އެވެ.
ހައްޖަށް ދާން ފައިސާ ދައްކާފައިވާ މީހަކު ނިޔާވެއްޖެނަމަ އެ ވާނީ ވާރުތަ މުދަލަށެވެ. އެއާމެދު ގޮތެއް ނިންމާނީ ކޯޓުންނެވެ.