އެމެރިކާގެ މަޝްހޫރު އެކްޓަރު ކެވިން ސްޕޭސީ ތިން ފިރިހެނުންނަށް ޖިންސީ އަނިޔާކުރިކަމަށް ތުހުމަތުކުރާ މައްސަލައިގައި އޭނާގެ މައްޗަށް ދައުވާކޮށްފި އެވެ.
އިނގިރޭސިވިލާތުގެ މެޓްރޮޕޮލިޓަން ފުލުހުން ކަށަވަރުކޮށްދިން ގޮތުގައި، ތިން ފިރިހެނުންނަށް ޖިންސީ އަނިޔާކުރި ކަމަށް ތުހުމަތުވާ މައްސަލައިގައި، 62 އަހަރުގެ ސްޕޭސީގެ މައްޗަށް ހަތަރު ދައުވާއެއްކޮށްފައިވެ އެވެ. އޭގެ އިތުރުން، ނުރުހުމުގައި ގަދަކަމުން ބަޔަކު ލައްވާ ޖިންސީގުޅުން ހިންގުމުގެ ދައުވާއާ އަކު ޖުމްލަ ފަސް ދައުވާއެއް އޭނާއާ ދެކޮޅަށް އުފުލާފައިވެ އެވެ.
އެ މައްސަލައިގައި އަންނަ ބުރާސްތި ދުވަހު އޭނާ ލަންޑަނުގެ ވެސްޓްމިންސްޓާ މެޖިސްޓްރޭޓް ކޯޓަށް ހާޒިރުވާން ޖެހެ އެވެ.
އޭނާގެ މައްޗަށް އެ ދައުވާތައް ކުރީ މެޓްރޮޕޮލިޓަން ފުލުހުން ހޯދާފައިވާ ހެކިތަކުގެ މައްޗަށް ބެލުމަށް ފަހުގަ އެވެ.
ސްޕޭސީ އަށް ކުރާ ދައުވާތައް
- މިހާރު އުމުރުން 40ގެ އަހަރުތަކުގައި އުޅޭ ފިރިހެނަކަށް މާޗު 2005 ގައި ޖިންސީ އަނިޔާކުރިކަމުގެ ދެ ދައުވާ.
- މިހާރު އުމުރުން 30ގެ އަހަރުތަކުގައި އުޅޭ ފިރިހެނަކަށް އޮގަސްޓް 2008 ގައި ޖިންސީ އަނިޔާކުރުމުގެ ދައުވާ އާއި ނުރުހުމުގައި ގަދަކަމުން ޖިންސީ ގުޅުން ހިންގުމުގެ ދައުވާ.
- މިހާރު އުމުރުން 30ގެ އަހަރުތަކުގައި އުޅޭ އިތުރު ފިރިހެނަކަށް އެޕްރީލް 2013 ގައި ޖިންސީ އަނިޔާކުރިކަމުގެ ދައުވާ.
އެ އެންމެނަކީ ވެސް އިނގިރޭސިވިލާތުގެ މީހުންނެވެ.
ސްޕޭސީގެ މައްޗަށް ދައުވާކުރެވެން މިދިޔަ މަހު އޮތަސް، އޭނާގެ އިނގިރޭސިވިލާތުގައި ނެތުމުން ދައުވާ ނުއުފުލި ލަސްވެގެން ދިޔައީ އެވެ. އެކަމަކު، އަމިއްލަ އިހުތިޔާރުގައި އެ ދައުވާތަކަށް ޖަވާބުދާރީވުމަށް އިނގިރޭސިވިލާތަށް ދާނެ ކަމަށް ބުނުމަށް ފަހު، އޭނާ އެ ލަންޑަނަށް ދިޔައީ އިއްޔެ އެވެ. އޭނާ ލަންޑަނަށް ދިއުމާ އެކު ވަނީ ދައުވާކޮށްފަ އެވެ.
އެމެރިކާގެ މީޑިއާއަކަށް ދިން އިންޓިވިއުއެއްގައި ސްޕޭސީ ބުނީ އޭނާގެ މައްޗަށް އެ ދައުވާތައް ސާބިތުނުވާނެ ކަމަށެވެ.
ދެ ފަހަރެއްގެ މަތިން އޮސްކާ އެވޯޑް ވެސް ހޯދާފައިވާ ސްޕޭސީގެ މަޝްހޫރު ފިލްމުތަކުގެ ތެރޭގައި "އެމެރިކަން ބިއުޓީ"، "އެލްއޭ ކޮންފިޑެންޝިއަލް"،" "ބޭބީ ޑްރައިވާ" އަދި "ސެވަން" ހިމެނެ އެވެ. އޭނާ އަކީ ނެޓްފްލިކްސް އިން ގެނެސްދިން ވަރުގަދަ ސިޔާސީ ޑްރާމާ "ހައުސް އޮފް ކާޑްސް" ގެ ވެސް ލީޑު އެކްޓަރެކެވެ. އޭނާގެ މައްޗަށް ޖިންސީ ފުރައްސާރައިގެ ތުހުމަތުކުރީ އެ ސީރީޒް ކުޅުނު ދުވަސްވަރެވެ.