ނެޓްފްލިކްސްގެ ވަރުގަދަ ސިޔާސީ ޑްރާމާ "ހައުސް އޮފް ކާޑްސް"ގެ ދެން އޮތް ހަވަނަ ސީޒަނާ އެކު ސިލްސިލާ ނިންމާލާނެކަން އިއުލާންކޮށްފި އެވެ.
ސިޔާސީ ފައިދާއަށްޓަކައި ބޮޑެތި ޖަރީމާތައް ހިންގާ ރަހުމްކުޑަ ދެމަފިރިއެއްގެ ގޮތުގައި ކެވިން ސްޕޭސީ އާއި ރޮބިން ރައިޓް ފެންނަ "ހައުސް އޮފް ކާޑްސް"ގެ ފަހު 13 އެޕިސޯޑް އަންނަ އަހަރު ނެޓްފްލިކްސް އަށް އަންނާނެ އެވެ.
މި އަހަރުގެ މެދު ތެރެއިން ފެށިގެން ހަވަނަ ސީޒަންގެ މަސައްކަތްކުރަމުން އަންނަ ސިލްސިލާ ނިންމާލާނެކަން މި އިއުލާންކުރީ ކެވިން ސްޕޭސީ އަށް ބޮޑު މައްސަލަގަނޑެއް ކުރިމަތިވެފައިވާ ދަނޑިވަޅެއްގަ އެވެ. ތަރިއެއްގެ އިތުރުން އެގްޒެކެޓިވް ޕްރޮޑިއުސަރެއްގެ ގޮތުގައި ވެސް "ހައުސް އޮފް ކާޑްސް"ގައި ބައިވެރިވާ ސްޕޭސީގެ މައްޗަށް ޖިންސީ ގޯނާގެ ތުހުމަތު އެކްޓަރަކު ވަނީ ކޮށްފަ އެވެ.
"ސްޓާ ޓްރެކް"ގެ ތަރިއެއް ކަމަށްވާ އެންތަނީ ރެޕް ބުނާގޮތުގައި އޭނާގެ އުމުރުން އެންމެ 14 އަހަރުގައި ސްޕޭސީ އޭނާއާ ބެހެން އުޅުނެވެ. އެފަދަ ކަމެއް ހިނގި ކަމުގެ ހަނދާނެއް ނެތް ކަމަށާއި އެކަމަކު އެއީ ހިނގި ކަމެއް ނަމަ މައާފަށް އެދޭ ކަމަށް ބުނެ ސްޕޭސީ ބަޔާނެއް ނެރުނަސް އޭނާ އަށް ވަރަށް ބޮޑެތި ފާޑުކިޔުންތައް ވަނީ އަމާޒުވެފަ އެވެ.
އެމީގެ 46 އެވޯޑަކަށް ނޮމިނޭޓްވެ ހަ އެވޯޑެއް ކާމިޔާބުކުރުމުގެ އިތުރުން ދެ ގޯލްޑެން ގްލޯބް ވެސް ލިބިފައިވާ "ހައުސް އޮފް ކާޑްސް"އަކީ އެތަކެއް ބައިވަރު އަމިއްލަ އުފެއްދުންތަކަކަށް ނެޓްފްލިކްސް ގެންގޮސްދިން ކާމިޔާބު ސިލްސިލާއެކެވެ.