މި އަހަރު ރާއްޖެ އިން ހައްޖަށް ދާ މީހުން މިރޭ ފުރަން ފަށާއިރު، އެ މީހުން ފުރާ ވަގުތުތަކުގައި މާލޭގެ ބައެއް ބޮޑެތި މަގުތަކުން އެއްކޮޅަށް ވެހިކަލްތައް ދުއްވޭ ގޮތަށް ޓްރެފިކަށް ބަދަލު ގެންނަން ނިންމައިފި އެވެ.
ފުލުހުން މިއަދު ބުނީ ހައްޖާޖީން ފުރާ ތިން ދުވަސް ކަމަށްވާ، މިއަދާއި އަންނަ ބުދަ ދުވަހާއި އަދި ހޮނިހިރު ދުވަހުގެ ބައެއް ގަޑިތަކުގައި މަޖީދީމަގާއި އަމީނީމަގު އަދި އޯކިޑްމަގުން ދުއްވޭނީ ހުޅަނގުން އިރަށް އެކަނި ކަމަށެވެ.
އެ ދުވަސްތަކުގެ ރޭގަނޑު 7 އިން 8 އަށް އެ މަގުތަކުން އެއްކޮޅަށް ދުއްވޭނީ އެއްކޮޅަށެވެ.
މާލެ އާއި ހުޅުމާލެ އިން ހައްޖާޖީންނާއި އެ މީހުންގެ އާއިލާތަކަށް ބަހުގައި ވެލާނާ އިންޓަނޭޝަނަލް އެއާޕޯޓަށް ދެވޭނެ އިންތިޒާމު ވެސް އިސްލާމިކް މިނިސްޓްރީން ވަނީ ހަމަޖައްސައި ދީފަ އެވެ.
މާލޭގެ ބަސް ސްޓޮޕްތައް:
މާލޭގެ ބޮޑެތި މަގުތަކުގެ އެކި ތަންތަނަށް ބަސް ހުއްޓާނެ އެވެ. އެ މަގުތަކަކީ؛
• މަޖީދީމަގު
• އަމީނީމަގު
• އޯކިޑްމަގު
• ލޮނުޒިޔާރަތްމަގު
• ބޮޑުތަކުރުފާނުމަގު
• އިސްކަންދަރު މަގު
ހުޅުމާލޭގެ ބަސް ސްޓޮޕްތައް:
• އަސުރުމާ ހިނގުން، ރެޑްވޭވް ސްކޮޔާ ކައިރި ބަސް ސްޓޮޕް
• ނިރޮޅު މަގު، ހުދުމާ ކައިރި ބަސް ސްޓޮޕް
• އުނިމާ ހިނގުން، ރެޑްވޭވް މޯލް ކައިރި ބަސް ސްޓޮޕް
• ރީތިގަސް މަގު، އަމީން އެވެނިއު ބަސް ސްޓޮޕް
• ހުޅުމާލެ ދެވަނަ ފިޔަވަހީގެ ނިރޮޅުމަގު، ބީޗް ސައިޑް ބަސް ސްޓޮޕް
ހުރިހާ ބަހެއް ވެސް ދަތުރު ފަށާނީ އިރުއޮއްސި 6:50 ގައި ކަމަށް މިނިސްޓްރީން ބުންޏެވެ.
ކޮވިޑުގެ ދެ އަހަރަށް ފަހު، ފުރަތަމަ ފަހަރަށް ބޭރު ގައުމުތަކުގެ މީހުންނަށް ހައްޖަށް ދިއުމުގެ ފުރުސަތު ސައުދީން މި އަހަރު ހުޅުވާލިއިރު، ރައްކާތެރިކަމުގެ ފިޔަވަޅެއްގެ ގޮތުން ހުރިހާ ގައުމަކަށް ވެސް ކޯޓާ ދިނީ ކުރިއަށް ވުރެ މަދުންނެވެ.
ރާއްޖެ އަށް މި އަހަރު ލިބުނީ 453 ކޯޓާ އެވެ. އިތުރު ކޯޓާ ހޯދުމަށް ސަރުކާރުން މަސައްކަތް ކުރި ކަމަށް މިނިސްޓްރީން ބުންޏެވެ.
ރާއްޖެ އަށް ލިބުނު ކޯޓާގެ ތެރެއިން 100 ކޯޓާ ގުރުއަތުން ދިނީ އާންމުންނަށެވެ. އަދި ބާކީ 353 ޖާގަ ދީފައި ވަނީ ހައްޖު ކޯޕަރޭޝަނަށް ކުރިން ފައިސާ ދައްކައިގެން ކިއުގައި ތިބި މީހުންނަށެވެ. އެ ކުންފުނީގެ ކިއުގައި މިހާރު ވެސް 3،500 މީހުން އެބަ ތިއްބެވެ.
ކަލަންޑަރުގައިވާ ގޮތުން މި އަހަރުގެ ހައްޖު ދުވަހަކީ އަންނަ މަހު އަށެކެވެ.