ސަލްމާން މިސްކިތުގައި ހުކުރު ކުރަމުންދަނިކޮށް މިންބަރަށް އަރައި އަޑުގަދަކޮށް ނަމާދަށް ހުރަސްއެޅި މީހާއަކީ ގިނަ ދުވަސްތަކެއް ވަންދެން ނަފްސާނީ ބައްޔަށް ފަރުވާކުރަމުން އަންނަ މީހެއް ކަމަށް ޑޮކްޓަރުގެ ލިއުންތަކުން ދައްކާ ކަމަށް ފުލުހުން ބުނެފި އެވެ.
ސަލްމާން މިސްކިތުގައި އޭނާ މިންބަރަށް އަރައި އަޑުގަދަކުރި ވީޑިއޯ މިއަދު ވަނީ އާންމުވެފަ އެވެ. ވީޑިއޯގައި އިވޭ ގޮތުގައި މިންބަރަށް އަރައި ހުރެ، އޭނާއަށް ހޭލެވިފައިވަނީ މާލަހުން ކަމަށާއި މިވަގުތު ރާއްޖޭގެ ހާލަތު ގޯސްވެފައިވާ މިންވަރުގެ ސަބަބުން ދައްޖާލު އަރައިފި ނަމަ، ސަލާމަތްވާނެ ހަމަ އެކަކު ވެސް ނެތް ކަމަށް ބުނެފަ އެވެ.
ޖުއްބާއެއްލައި ބޮލުގައި ފަގުޑި އަޅައިގެން ހުރި އެ މީހާ ފުލުހުންގެ ބެލުމުގެ ދަށަށް ގެންދިޔައީ، އެތަނުން ފައިބަން ތަކުރާރުކޮށް އެދުމުން ވެސް އެކަން ނުކުރުމުންނެވެ.
އެ މައްސަލާގައި ފުލުހުން 42 އަހަރުގެ ފިރިހެނަކު ހައްޔަރުކުރި ނަމަވެސް، އޭނާއަކީ ނަފްސާނީ ބަލިމީހެއްކަން ސާބިތުވާ މެޑިކަލް ރިޕޯޓުތައް އާއިލާއިން ހުށަހެޅުމުން މިހާރު އޭނާ ވަނީ އާއިލާއާ ހަވާލު ކޮށްފަ އެވެ.
"މިހާރު"އަށް އެނގިފައިވާ ގޮތުގައި އޭނާއަކީ ރ. މަޑުއްވަރިއަށް ނިސްބަތްވާ މީހެކެވެ. އެ ރަށުން ވާހަަކަ ދެއްކި މީހުން ބުނި ގޮތުގައި އޭނާ ނަފްސާނީ ބައްޔަށް ފަރުވާކުރާތާ ގާތްގަނޑަކަށް ފަސް އަހަރު ވެދާނެ އެވެ.
"ވަރަށް ފަހުން އެހެންވެ އޭޑީކޭގައި އެޑްމިޓް ކޮށްގެން ވެސް ފަރުވާދިން އޭނާއަށް. ރަށަށް އަޔަސް އޭނާ އެ ގޮތަށް އުޅޭނީ،" މަޑުއްވަރިން ވާހަކަ ދެއްކި މީހުން ކިޔައިދިނެވެ.
ބައެއް މީހުން ބުނިގޮތުގައި ނަފްސާނީ ބަލިމަޑުކަމާ ކުރިމަތިލާން ޖެހުމުގެ ކުރިން އޭނާއަކީ ބައެއް ރިސޯޓުތަކާއި އެހެން ވެސް މަސައްކަތްތައްކޮށްފައިވާ މީހެކެވެ.