ޕެރިސް (ޖުލައި 5) - ޕެރިސް ސެއިންޓް ޖާމެއިންގެ (ޕީއެސްޖީ) ގެ ކޯޗަކަށް ހުރި މައުރިސިއޯ ޕޮޗެޓީނޯ މަގާމުން ވަކި ކުރުމާ އެކު، އެ މަގާމަށް ކްރިސްޓޮފް ގަލްޓިއާ ހަމަޖައްސައިފި އެވެ.
މިދިޔަ ސީޒަނުގައި ފްރާންސްގެ ނީސް އަށް ލީގުގެ ފަސްވަނަ ހޯދައިދީ، ފްރެންޗް ކަޕްގެ ދެވަނަ ހޯދައިދިނުމަށް ފަހު ގަލްޓިއާ ވަނީ މިދިޔަ މަސް ނިމުމާ އެކު ޓީމު ދޫކޮށްލައިފަ އެވެ. އޭގެ ކުރީ ސީޒަނުގައި އޭނާ ވަނީ ލިލް އަށް ލީގުގެ ޗެމްޕިއަންކަން ހޯދައިދީފަ އެވެ.
އުމުރުން 55 އަހަރުގެ ގަލްޓިއާ އާއެކު ޕީއެސްޖީން އެއްބަސް ވެފައި ވަނީ ދެ އަހަރު ދުވަހުގެ މުއްދަތަށް، ޖޫން 2024 އާ ހަމައަށެވެ. އަދި އޭނާ އަކީ ގަތަރުގެ މަހުޖަނުން ޕީއެސްޖީއާ ހަވާލުވި ފަހުން އެ ޓީމާ ގުޅުނު ހަތްވަނަ ކޯޗެވެ.
"ޕީއެސްޖީއާ ގުޅެން ލިބުމުން ވަރަށް އުފާވޭ، ޗެއާމަން ނާސިރު އަލް ޚެލައިފީ އާއި [ފުޓްބޯޅަ އެޑްވައިޒަރު] ލުއިސް ކެމްޕޯސް އަދި ކްލަބުން އަހަންނަށް ކުރާ އިތުބާރަށް ޝުކުރު އަދާކުރަން،" ގަލްޓިއާ ބުންޏެވެ.
"ޔޫރަޕްގައި އޮތް އެންމެ ވާދަވެރި އަދި އެންމެ ވަރުގަދަ އެއް ސްކޮޑް އޮތް މި އާދަޔާ ހިލާފު ޓީމަށް ކޯޗުކޮށްދިނުމަށް އަދާކުރަންޖެހޭ ޒިންމާތައް އަހަންނަށް ފުރިހަމައަށް އެނގޭ."
ގަލްޓިއާ އަކީ، 2017 ވަނަ އަހަރު މޮނާކޯއާ އެކު ލިއޮނާޑޯ ޖާޑިމް ލީގު ނެގި ފަހުން، ވޭތުވެދިޔަ 10 އަހަރު ޕީއެސްޖީން ލީގު ކާމިޔާބުކުރުން ހުއްޓުވި ދެ ކޯޗުންގެ ތެރެއިން އެކަކެވެ.
އުމުރުން 50 އަހަރުގެ ޕޮޗެޓީނޯ ޕީއެސްޖީ ދޫކޮށްލީ އެންމެ 18 މަސްދުވަހަށް ފަހު، މިދިޔަ ސީޒަނުގައި އެޓީމަށް ލީގު ހޯދައިދީފަ އެވެ. އެއީ ޕޮޗެޓީނޯގެ ކެރިއަރުގައި ވެސް ލީގު ޗެމްޕިއަންކަން ހޯދި ފުރަތަމަ ފަހަރެވެ.
ޓޮޓެންހަމްގެ ކުރީގެ ކޯޗު މަގާމުން ވަކިވާނެ ކަމަށް ބެލެވުނުތާ މިހާރު ގާތްގަނޑަކަށް މަހެއްހާ ދުވަސް ވެފަ އެވެ. އެކަމަކު އެކަން އިއުލާންކުރީ ގަލްޓިއާ މަގާމަށް ހަމަޖެއްސިކަން އިއުލާން ކުރުމުގެ ވަގުތުކޮޅެއް ކުރިންނެވެ.