ޕެރިސް (ސެޕްޓެމްބަރު 19) - ފާޑުކިޔުން އަމާޒުވި ޕީއެސްޖީގެ މަޝްހޫރު ތިން ފޯވަޑުންގެ ދިފާއުގައި ކޯޗު މައުރީސިއޯ ޕޮޗެޓީނޯ ނުކުމެއްޖެ އެވެ.
ޗެމްޕިއަންސް ލީގުގައި މިދިޔަ ހަފުތާގައި ޕީއެސްޖީ ކުޅުނު މެޗުގައި ލިއޮނެލް މެސީ އާއި ކިލިޔަން އެމްބާޕޭ އަދި ނޭމާ އެކުގައި ކުޅެން ދިން ފުރުސަތުގައި އެ ކުޅުންތެރިންނަށް އެންމެ ރަނގަޅު ކުޅުމެއް ނުދެއްކުނެވެ. އޭގެ ފަހުން އެ ތިން ކުޅުންތެރިންނަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ.
ފްރެންޗު ލީގުގައި މިރޭ އޮލިމްޕިކް ލިޔޯންއާ ދެކޮޅަށް ކުޅޭ މެޗުގެ ކުރިން މީޑީއާގައި ވާހަކަ ދައްކަމުން ޕޮޗެޓިނޯ ބުނީ އެއް މެޗުގައި ދަށްކޮށް ފެނުމަކީ އަނެއް މެޗުގައި އެކަން ތަކުރާރު ވާނެ ސަބަބެއް ނޫން ކަމަށެވެ.
"އޭގެ މާނައަކީ ކުރިމަގުގައި ވެސް އެހެން ވާނެއެކޭ ނޫން،" ތިން ފޯވަޑުންގެ ދިފާއުގައި ވާހަކަ ދައްކަމުން ޕޮޗެޓިނޯ ބުންޏެވެ. "ތަފާތު ސިސްޓަމަކަށް ކުޅެން ޖެހުމުން ވެސް އެހެން ދިމާވެދާނެ."
ގިނަ ވަގުތު ޕްރެކްޓިސްކޮށްގެން އެ ތިން ކުޅުންތެރިންގެ މެދުގައި ރަނގަޅު ކޮމްބިނޭޝަނެއް އުފެދޭނެ ކަމުގެ ޔަގީންކަން ޕޮޗެޓިނޯ ދިނެވެ. ޕެރިހުގައި މިރޭ ކުޅޭ މެޗު ވެގެންދާނީ ޕީއެސްޖީގެ ސަޕޯޓަރުންގެ ކުރިމަތީގައި މެސީ ކުޅޭ ފުރަތަމަ މެޗަށެވެ.
"އޭނާ (މެސީ) ހުރީ ވަރަށް ރަނގަޅު ފޯމެއްގައި. އޭނާ ދެކެނީ އަމިއްލަ ސަޕޯޓަރުންގެ ކުރިމަތީގައި އަމިއްލަ ދަނޑުގައި ކުޅޭ ފުރަތަމަ މެޗަށް ވީމަ ހާއްސަ މެޗެއް ކަމަށް،" ޕޮޗެޓިނޯ ބުންޏެވެ.
"އެކަމަކު އެންމެ މުހިންމު ކަމަކީ މުޅި ޓީމު މެޗަށް ސަމާލުކަންދީގެން އޮތް މިންވަރު. ޗެމްޕިއަންސް ލީގުގައި ކުރިމަތިވި ހިތްދަތިކަމުން އަރައިގަތުމަށް މިރޭގެ މެޗު ބޭނުން ކުރާނަން."
ޕީއެސްޖީ އާއި ލިޔޯން ކުޅޭ މެޗު ފަށާނީ ރާއްޖޭގަޑިން މިރޭ 11:45 ގަ އެވެ.