ޔޯގާ ދުވަހުގެ ހަރަކާތަށް ހުރަސް އެޅި ބައެއް ދީނީ އިލްމުވެރިން ހައްޔަރު ކުރުމާ ގުޅިގެން އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ އަށް ވަރަށް ބޮޑަށް ފާޑު ކިޔުން އަމާޒުވެފައި ވަނިކޮށް، އެއްވެސް އިލްމުވެރިޔަކަށް އަނިޔާއެއް ނުކުރައްވާނެ ކަމަށް އޭނާ ވިދާޅުވެއްޖެ އެވެ.
ގަލޮޅު ދަނޑުގައި ބޭއްވި ޔޯގާ ހަރަކާތާ ދެކޮޅަށް ހިންގި ހަމަނުޖެހުމާ ގުޅިގެން ދީނީ ތަގުރީރު ދިނުމުގެ ހުއްދަ އޮންނަ ޝެއިހު އާދަމް ނިޝާނާއި ޝޭހް ފަޒްލޫން މުހައްމަދު ވަނީ ހައްޔަރުކޮށްފަ އެވެ. ސޯޝަލް މީޑިއާގައި ގިނަ ބަޔަކު އަންނަނީ އެ އިލްމުވެރިން މިނިވަން ކުރުމަށް ގޮވާލަމުންނެވެ.
އެކަމާ ގުޅިގެން އިމްރާން ރޭ ކުރެއްވި ޓުވީޓެއްގައި ވިދާޅުވީ އެއްވެސް މީހަކަށް، އަދި ވަކިން ހާއްސަކޮށް ދީނީ އިލްމުވެރިޔަކަށް އޭނާ އަނިޔާ ނުކުރައްވާނެ ކަމަށެވެ. އަދި އަނިޔާ ލިބޭ މީހުންގެ ދުއާ އިން ރައްކާތެރިވުމަށް ފުލުހުންނާއި މޯލްޑިވްސް ކަރެކްޝަނަލް ސާވިސްގެ އޮފިސަރުންނަށް އިލްތިމާސް ކުރައްވާ ކަމަށް އިމްރާން ވިދާޅުވި އެވެ.
ޔޯގާ ދުވަހާ ގުޅިގެން އިލްމުވެރިންތަކެއް ހައްޔަރުކޮށް އެ މީހުންގެ ބަންދުގެ މުއްދަތު އިތުރު ކުރަމުން ދާއިރު އިމްރާން ހަނު ހުރުމާއި އެއް ޖިންސުން ގުޅުން ހިންގާ ވީޑިއޯތަކެއް ލީކުވެ ތުހުމަތުވާ ފަރާތްތަކާ މެދު މާ ބޮޑު ފިޔަވަޅެއް ނާޅައި ދޫކޮށްލާފައި ތިބުމުން ގިނަ ބަޔަކު އަންނަނީ އިމްރާނަށް ފާޑު ކިޔަމުންނެވެ.
ދީނަށް ހިދުމަތްކުރާ ޕާޓީއެއްގެ ގޮތުގައި ވަކާލާތު ކުރާ އަދާލަތު ޕާޓީން ސަރުކާރު ކޯލިޝަންގައި އޮވެ، ސަރުކާރުން ހިންގާ ކަމަށް ބައެއް ފަރާތްތަކުން ތުހުމަތު ކުރާ ދީނާ ހިލާފު ކަަންކަމާ ގުޅޭ ގޮތުން ހިމޭނުން އޮންނަ ކަމަށް ސޯޝަލް މީޑިއާގައި ގިނަ ބަޔަކު ތުހުމަތު ކުރެ އެވެ.
ކުރީގެ ރައީސް އަބްދުﷲ ޔާމީނާ އެކު 2013 ގައި ކެމްޕެއިން ކުރެއްވި އިރު އެމްޑީޕީ އާ ދެކޮޅަށް ދެއްކި ވާހަކަތަކާއި އެއާ ހިލާފަށް މިހާރު އަމަލު ކުރަމުން ދާ ގޮތުގެ ވީޑިއޯތައް ވެސް ސޯޝަލް މީޑިއާގައި އަންނަނީ ދައުރު ކުރަމުންނެވެ.
އިމްރާން ވެސް ވަނީ ބައެއް ކަންކަމަށް ރައްދު ދެއްވައި ޓުވީޓު ކުރައްވައިފަ އެވެ.
އޭނާ ވިދާޅުވި ގޮތުގައި އަދާލަތު އުފެއްދީ ރާއްޖޭގައި ފަނޑުވަމުން ދިޔަ އިސްލާމް ދީނުގެ މަތިވެރި އުސޫލުތައް ނެގެހެއްޓުމަށެވެ. އެ ޒިންމާ އަދާ ކުރުމުގައި އެ ޕާޓީ ދެމި އޮންނާނެ ކަމަށް އިމްރާން ވިދާޅުވި އެވެ.
މި ސަރުކާރުގެ ތިން އަހަރާއި ބައި އަދި 2005 ވަނަ އަހަރުން ފެށިގެން ބެލިޔަސް އަދާލަތު ޕާޓީގެ އިލްމުވެރިންނަށް ވުރެ ދީނަށް ހިދުމަަތް ކުރި ޕާޓީއެއް ނުވަތަ ޖަމާއަތެއް ވެސް ރާއްޖޭގައި ނޯންނާނެ ކަމަށް ވެސް އިމްރާން ވިދާޅުވި އެވެ.
"ބަޔަކު މީހުން ކިތަންމެ ނުރުހުނަސް އަދާލަތު އޮތީ ކުޑަކޮށް ވެސް ފަހަތަށް ޖެހޭ ގޮތަކަށް ނޫން. އިސްލާމް ދީނުގެ ފުރިހަމަ މަފްހޫމްގައި ސިޔާސީ މަސައްކަތުގައި އަދާލަތު ދާނީ ބާރަށް ކުރިޔަށް،" އިމްރާން ވިދާޅުވި އެވެ.