ބަދުއަހުލާގީ އަމަލުތައް ފެންނަ ވީޑިއޯތައް ދައުރު ކުރާތީ އެޗްއާރުސީއެމުން ވެސް ކަންބޮޑުވުން ފާޅުކޮށްފި

ބަދުއަހުލާގީ އަމަލުތައް ހިންގާ މަންޒަރު ފެންނަ ވީޑިއޯތައް ސޯޝަލް މީޑިއާގައި އާންމުކުރުން މި ދުވަސްވަރު އިތުރުވަމުން ދާތީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން މިއަދު ކަންބޮޑުވުން ފާޅުކޮށްފި އެވެ.

އެ ކޮމިޝަނުން ކަންބޮޑުވުން ފާޅުކުރީ، ބަންގްލަދޭޝްގެ މީހެއް ކަމަށްވާ އާލަމްގީރާއެކު، އެއްޖިންސުން ގުޅުން ހިންގާ ގިނަ އަދަދެއްގެ ވީޑިއޯތަކެއް މި ދުވަސްވަރު ސޯޝަލް މީޑިއާގައި ދައުރުވަމުން ދާތީ އެވެ.

އެޗްއާރްސީއެމުން ނެރުނު ނޫސްބަޔާނެއްގައި ބުނީ، އެފަދަ ވީޑިއޯތައް އާންމުކުރުމަކީ ޖިނާއީ ކުށަކަށް ވުމުގެ އިތުރުން، ތުހުމަތު ކުރެވޭ މީހުން ކަމަށް ބުނެ އެކިއެކި މީސްމީހުންގެ ވަނަވަރު އާންމުކޮށް، ސޯޝަލް މީޑިއާގައި ދައުރު ކުރުމަކީ ބައެއްގެ އަބުރާއި ކަރާމަތަށް އަރައިގަތުމުގެ އަމަލެއް ކަމަށެވެ. އެހެންވެ، އެކަމުގެ ކަންބޮޑުވުން އެޗްއާރުސީއެމުން ފާޅުކުރި އެވެ.

އެގޮތަށް ކަންތައް ކުރުމުގެ ސަބަބުން އަދުލު އިންސާފު ގާއިމު ކުރުމުގައި ވެސް ހުރަސްތަކަކާ ކުރިމަތިވާނެ ކަމަށް ގަބޫލު ކުރެވުމުގެ އިތުރުން، އެއީ އާއިލާތަކާއި މުޖުތަމައުގެ މެދުގައި ހަމަނުޖެހުމާއި ފިތުނަފަސާދަ އުފެދި، އާއިލާތައް ރޫޅި ދިއުމުގެ ބިރު ވަރަށް ބޮޑަށް އޮތް ކަމެއް ކަމަށް ބުންޏެވެ.

"... މިފަދަ ވީޑިއޯތައް އާންމުކުރާ ސޯޝަލް މީޑިއާ ޕްލެޓްފޯމްތަކަކީ ކުޑަކުދިން ވެސް ބޭނުންކުރާ ޑިޖިޓަލް ޕްލެޓްފޯމްތަކެއް ކަމަށް ވުމުން، އުމުރާ އެކަށީގެންނުވާ އަދި ފާހިޝް އަމަލުތައް ދައްކުވައިދޭ މަންޒަރުތަކަށް ކުޑަކުދިންނާއި ނާޒުކު ހާލަތްތަކުގައި ތިބި ފަރާތްތައް ދަނީ ހުށަހެޅުމުންނެވެ. އެހެންކަމުން މިއީ ރައްކާތެރިކަމާ އެކު ހެދިބޮޑުވުމުގެ ހައްގަށް ހުރަސްއެޅިގެންދާނެ ކަމެއް ކަމުގައި ދެކެމެވެ،" އެ ބަޔާނުގައި ވެ އެވެ.

އެ ކަހަލަ މައްސަލަތަކާ ގުޅޭ ގޮތުން ވީޑިއޯއެއް ނުވަތަ މައުލޫމާތެއް ލިބިފައިވާ ނަމަ ކަންކަން ބަލައި ތަހުގީގު ކުރުމުގެ ބާރު އޮތް އިދާރާތަކަށް އެ މައުލޫމާތު ހިއްސާކޮށް، މައްސަލަތައް ތަހުގީގު ކުރުމަށާއި އަދުލު އިންސާފު ގާއިމު ކުރުމަށް އޮންނަ ނިޒާމުގެ ތެރެއިން އިދާރާތަކަށް އެއްބާރުލުން ދިނުމަށް އެޗްއާރުސީއެމުން އިލްތިމާސްކުރި އެވެ.

އެ ވީޑިއޯތައް ދައުރު ކުރާތީ ހޯމް މިނިސްޓަރު އިމްރާން އަބްދުﷲ ވެސް މިއަދު ވަނީ ކަންބޮޑުވުން ފާޅުކުރައްވައި، އެކަން ހުއްޓުވަން ގާނޫނީ އޮނިގަނޑެއް އެކުލަވައިލަން ޖެހޭ ކަމަށް ވިދާޅުވެފަ އެވެ.

Huthuru video thah dhauru kurun huttuvaane gaanoonee onigandeh beynunvey: Imran

The most trusted news source in the Maldives

Mihaaru

އެއްޖިންސުން ގުޅުން ހިންގާ މަންޒަރު ފެންނަ ގިނަ ވީޑިއޯތަކެއް ސިއްރުން ރެކޯޑު ކޮށްފައި ވަނީ ބްލެކްމެއިލް ކުރަން ބޭނުން ކުރުމަށް ކަމަށް ފުލުހުން ބުންޏެވެ. ނަމަވެސް އެ ލީކު ކުރަމުންދާ މީހުންނާއި އެކަމުގެ ފަހަތުގައި ތިބި މީހުން ފުލުހުން އަދި ހައްޔަރެއް ނުކުރެ އެވެ.

އާލަމްގީރާއެކު، އެއްޖިންސުން ގުޅުން ހިންގި ކަމަށް ވީޑިއޯތަކުން ފެންނަ ބައެއް މީސްމީހުންނަކީ ސަރުކާރުގެ އެކި ވަޒީފާތަކުގައި ތިބި މީހުންނެވެ. އެ މީސްމީހުންގެ މައުލޫމާތު އެ އިދާރާތަކަށް ދިނުމުން މިހާރު ވަނީ ވަޒީފާތަކުން ސަސްޕެންޑްކޮށްފަ އެވެ، އަދި ސިޔާސީ މީހުން ވަނީ މަގާމުން ވަކިކޮށްފަ އެވެ. އެ މައްސަލާގައި މިހާތަނަށް 18 މީހެއްގެ ޕާސްޕޯޓު ވަނީ ހިފަހައްޓައިފަ އެވެ.

އެ މައްސަލާގައި ހައްޔަރު ކޮށްފައިވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް ސައްތާރާއި ފުލުސް އޮފިސަރަކަށް ދައުވާ ކޮށްދިނުމަށް އެދި ޕީޖީ އޮފީހަށް ވެސް ފުލުހުން ވަނީ މައްސަލައެއް ފޮނުވައިފަ އެވެ. އާލަމްގީރާއެކު އުޅެނިކޮށް ފެންނަ، ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު (ކާނަލް) އަށް ދައުވާ ކޮށްދޭން އަދި ފުލުހުން ނޭދެ އެވެ.