އެއްޖިންސުން ގުޅުން ހިންގި މައްސަލާގައި ކުށަށް ތައުބާވެ ހިތާމަކުރާ ކަމަށާއި ރައްޔިތުންގެ ކިބައިން މާފަށް އެދި، ގާނޫނީ ވަކީލް ނާޒިމް ސައްތާރު ބަޔާނެއް ނެރެފި އެވެ.
ބަންގްލާދޭޝްގެ ފިިރިހެނެއް ކަމަށްވާ އަލަމްގީރާ އެކު އެއްޖިންސުން ގުޅުން ހިންގި މައްސަލާގާއި ނާޒިމްގެ މައްޗަށް ކުރި އެއްޖިންސުން ގުޅުން ހިންގުމުގެ ދައުވާއަށް އޭނާ ވަނީ އިއުތިރާފް ވެފަ އެވެ. އޭނާ މިއަދު ބަޔާނެއް ނެރުނީ މިއަދު ހަވީރު އެ މައްސަޅާގައި ހުކުމް ކުރުމަށް ތާވަލްކޮށްފައި ވަނިކޮށެވެ.
ނާޒިމްގެ ބަޔާނުގައި ވަނީ ކުށަށް އިއުތިރާފް ވަނީ ކުށްވެރި ވުމުގެ އިތުރުން މިކަމުގައި އޭނާ ބްލެކްމެއިލްކޮށް ފައިސާ އަތުލަން އުޅެ، ވިކްޓިމަކަށް ވެސް ވެފައި ވަނިކޮށް ކަމަށެވެ.
"... އަދި އަޅުގަނޑު ރާއްޖޭން ބޭރަށް ފިލައިގެން ނުގޮސް، ރާއްޖޭގައި ހުރެ، އަޅުގަނޑު އިއުތިރާފުވެ މި ކުށަށް ކުރިމަތިލާން ބޭނުންވާތީ އެވެ."
ނާޒިމަށް ހުކުމް ކުރުމަށް ތާވަލްކޮށްފައި ވަނީ މިއަދު ހަވީރު 4:30 ގަ އެވެ.
މި މައްސަލާގައި ހިމެނޭ އަލަމްގީރު ވެސް އޭނާގެ މައްޗަށް އިއްވި ތިން ދައުވާއަށް ވަނީ އިއުތިރާފް ވެފަ އެވެ. ދައުވާކޮށްފައިވަނީ ގާނޫނުލްއުގޫބާތުގެ ދަށުން ކަމަށް ވާތީ ހަތް މަހާއި ހަ ދުވަހަށް ޖަލަށް ލާން ހުކުމް ކޮށްފަ އެވެ.
މި މައްސަލާގައި ހިމެނޭ މީހުންނަށް ދައުވާކޮށްފައިވަނީ ގާނޫނުލްއުގޫބާތުގެ ދަށުންނެވެ. ޖިންސީ ކުށުގެ ގާނޫނުގައި ވެސް އެއްޖިންސުން ގުޅުން ހިންގުން ކުށެއްގެ ގޮތުގައި އޮވެ އެވެ. އެ ގާނޫނުގެ ދަށުން ދައުވާކޮށްފި ނަމަ ލިބޭ އަދަބު މާ ބޮޑުވާނެ އެވެ. ޖިންސީ ކުށުގެ ގާނޫނުގެ ދަށުން ނަމަ ދެ މީހަކު ރުހުމުގައި އެއްޖިންސުން ޖިންސީ ގުޅުން ހިންގައިފި ނަމަ އަދަބަކީ 5-7 އަހަރަށް ޖަލަށް ލުމެވެ. ނުރުހުމުގައި ނަމަ އެކަން ކުރި މީހަކަށް 7-10 އަހަރުގެ ޖަލު ހުކުމެކެވެ.
އަލަމްގީރާ އެކު އެއްޖިންސުން ގުޅުން ހިންގި މައްސަލާގައި ނާޒިމްގެ އިތުރުން ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު އަދި ފުލުސް އޮފިސަރު އަބްދުއްރަހުމާން ރަފީއުގެ މައްޗަށް ވެސް ވަނީ އެއްޖިންސުން ގުޅުން ހިންގުމުގެ ދައުވާކޮށްފަ އެވެ. މި މީހުންގެ އިތުރުން ވެސް އެތައް ބަޔަކު އަލަމްގީރާ އެކު އެއްޖިންސުން ގުޅުން ހިންގުމުގެ ތުހުމަތުގައި ހައްޔަރުކޮށް ތަހުގީގު އަންނަނީ ކުރަމުންނެވެ.