ގިނަ ބަޔަކާ އެކު އެއް ޖިންސުން ގުޅުން ހިންގުމަށް ފަހު އެ މަންޒަރުތައް ވީޑިއޯކުރި މައްސަލާގައި ބަންގްލަދޭޝްގެ އަލަމްގީރް ދެ އަހަރާއި ނުވަ މަހަށް ޖަލަށްލާން ކްރިމިނަލް ކޯޓުން މިއަދު ހުކުމްކޮށްފި އެވެ.
ދިވެހި ފިރިހެނުންތަކަކާ އެކު އެއް ޖިންސުން ގުޅުން ހިންގި މަންޒަރު ރެކޯޑްކުރި މައްސަލާގައި އަލަމްގީރްގެ މައްޗަށް އޮރިޔާން ކާޑު ހެދުމުގެ 40 ދައުވާ ދައުލަތުން ކުރި އެވެ. އެ ދައުވާއަށް އޭނާ އެއްބަސްވި އެވެ.
ގާނޫނުލް އުގޫބާތުގެ ދަށުން އޮރިޔާން ކާޑު ހެދުމުގެ އަސާސީ އަދަބަކީ 27 ދުވަހަށް ޖަލަށްލުމެވެ. ކޮންމެ ދައުވާއަކަށް އެ މުއްދަތު ކަނޑައެޅުމުން އަންނަނީ ދެ އަހަރާއި 11 މަހުގެ ޖަލު ހުކުމެކެވެ. އެކަމަކު އޭނާ ބަންދުގައި ހޭދަކުރި މުއްދަތު އުނިކުރުމަށްފަހު އޭނާގެ އަދަބު ދެ އަހަރާއި ނުވަ މަހުގެ ހުކުމަކަށް ކުޑަވީ އެވެ.
އެއް ޖިންސުން ގުޅުން ހިންގި މައްސަލާގައި މިހާރު އަލަމްގިރި މިހާރު ވެސް ދަނީ ހަތް މަހުގެ ޖަލު ހުކުމެއް ތަންފީޒު ކުރަމުންނެވެ. އޭނާއާ އެކު ގުޅުން ހިންގި މައްސަލާގައި ވަކީލް ނާޒިމް ސައްތާރާއި ފުލުހެއް ކަމަށްވާ އަބްދުއްރަހުމާން ރަފީއުގެ މައްޗަށް ވެސް ޖަލު ހުކުމް އިއްވި އެވެ.
ނާޒިމަށް އިއްވީ ތިން މަހާއި 26 ދުވަހުގެ ގޭ ބަންދުގެ ހުކުމެކެވެ. ފުލުސް މީހާއަށް އިއްވީ އެއް އަހަރުގެ ޖަލު ހުކުމެކެވެ.
އަލަމްގީރް ރެކޯޑްކުރި ވީޑިއޯތައް ބޭނުންކޮށްގެން ބްލެކްމެއިލްކޮށް، ފައިސާ ހޯދަން މަސައްކަތްކުރި މައްސަލާގައި އިތުރު ތިން މީހަކު މިހާރު ވަނީ ހައްޔަރުކޮށްފަ އެވެ.