އެއްޖިންސުން ގުޅުން ހިންގި މައްސަލާގައި ބަންގްލާދޭޝްގެ ފިރިހެނެއް ކަމަށްވާ އެމްޑީ އަލަމްގީރުގެ މައްޗަށް ކުރި 40 ދައުވާއަށް ވެސް އޭނާ މިއަދު ކްރިމިނަލް ކޯޓުގައި އިއުތިރާފްވެއްޖެ އެވެ.
އެތައް ބަޔަކާ އެކު އަލަމްގީރް އެއްޖިއްސުން ގުޅުން ހިންގާ މަންޒަރު ފެންނަ ވީޑިއޯތަކެއް މީގެ ތިން މަސް ކުރިން އާންމުވުމުން ފެށި ތަހުގީގަށް ފަހު މީގެ ކުރިން އުފުލި އެއްޖިންސުން ގުޅުން ހިންގުމުގެ ތިން ދައުވާއަށް ވެސް އޭނާ ވަނީ އިއުތިރާފްވެފަ އެވެ. އެ ތިން ދައުވާގެ އަދަބަކަށް މިދިޔަ މަހުގެ 31 ވަނަ ދުވަހު ވަނީ ހަތްމަހާއި ހަ ދުވަހުގެ ޖަލު ހުކުމެއް އިއްވައިފަ އެވެ.
ބަދުއަހުލާގީ މައްސަލަތަކުގެ ޝަރީއަތް ހިންގަނީ ސިއްރުން ކަމަށް ވާތީ މިއަދުގެ ޝަރީއަތް ވެސް ކުރިއަށް ގެންދިޔައީ އެގޮތަށެވެ. ޝަރީއަތުގައި އިއުތިރާފްވުމާ އެކު އަވަސް ނިއާގެ މައްސަލައެއްގެ ގޮތުގައި ދެން އޮންނާނީ ހުކުމް އިއްވުމެވެ. ހުކުމް އިއްވުމުގެ ޝަރީއަތް ވަރަށް އަވަހަށް ބާއްވާނެ ކަމަށް ވަނީ ބުނެފަ އެވެ.
އޮރިޔާން ކާޑު ހެދުމުގެ ދައުވާކޮށްފައި ވަނީ އެއްޖިންސުން ގުޅުން ހިންގައި އެ މަންޒަރުތައް ރެކޯޑްކޮށްފައި ވާތީ އެވެ. އެހެންވެ އެއީ އަލަމްގީރް ރެކޯޑްކުރިކަން އެނގޭ ކޮންމެ ކްލިޕަކަށް ދައުވާއެކެވެ. ދައުވާކުރި މާއްދާގެ ދަށުން އެއީ ޖުނަހް 3 ވަނަ ދަރަޖައިގެ ކުށެކެވެ. މިއީ އެއް މަހާއި ހަ ދުވަހުގެ ހުކުމެއް އަންނަ ކުށަކަށް ވިޔަސް އެއް ދައުވާއަށް ވުރެ ގިނަ ވުމުންނާއި ކުށަށް އިއުތިރާފް ވުން ފަދަ ކަންކަމާ ގުޅިގެން އަންނަނީ ކޮންމެ ދައުވާއަކަށް ވަރަށް ކުޑަ އަދަބެކެވެ.
އަލަމްގީރާ އެކު އެއްޖިންސުން ގުޅުން ހިންގިކަމުގެ ތުހުމަތަށް އިތުރު ތިން ދިވެއްސަކަށް ދައުވާ ކޮށްފައިވެ އެވެ. އެއީ ގާނޫނީ ވަކީލް ނާޒިމް ސައްތާރާއި ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު (ކާނަލް) އަދި ފުލުސް އޮފިސަރު އަބްދުއްރަހުމާން ރަފީއު އެވެ. މީގެ ތެރެއިން ނާޒިމާއި ރަފީއު ކުށަށް އިއުތިރާފް ވުމުން ވަނީ ހުކުމްކޮށްފަ އެވެ. ނާޒިމް ތިން މަހަށް ގޭގައި ބަންދުކުރަން ހުކުމްކުރި އިރު ރަފީއު އަށް އިއްވީ އެއް އަހަރާއި އެއް މަހުގެ ޖަލު ހުކުމެކެވެ. ރަފީއުއަށް އަދަބު ކަނޑައެޅީ ގޯސްކޮށް ކަމަށް ޕީޖީން ދެކޭތީ އެ ހުކުމް ވަނީ އިސްތިއުނާފްކުރަން ނިންމައިފަ އެވެ.