ހުޅުމާލޭގައި ހަދަމުން އަންނަ ސަރުކާރުގެ އޮފީސް އިމާރާތުގެ މަސައްކަތް އަންނަ މަހު ނިންމައި، ޑިސެމްބަރު މަހު ބޭނުންކުރަން ފެށޭނެ ކަމަށް ޕްލޭނިން މިނިސްޓްރީން ބުނެފި އެވެ.
މިނިސްޓްރީން ބުނީ އެ އިމާރާތް ހެދުމަށް ސަރުކާރުން ނިންމީ ސަރުކާރުގެ ގިނަ އޮފީސްތަކެއް ބޮޑު ހޭދައެއް ކޮށްގެން، އަމިއްލަ ތަންތަނުގައި މުއްދަތެއް ނެތް ގޮތަށް ކުއްޔަށް ހިފައިގެން އުޅެން ޖެހޭތީ އެކަމަށް ހައްލެއް ގެންނަން ރައީސް އިބްރާހިމް މުހައްމަދު ސޯލިހު 2019 ގައި ނިންމެވުމާ ގުޅިގެން ކަމަށެވެ.
އެހެންވެ މާލޭގައި އިމާރާތް އަޅާނެ ބިމުގެ ދަތިކަން ހުރުމުން ސަރުކާރުން ނިންމާފައި ވަނީ ހުޅުމާލޭގައި އެތަން އިމާރާތްކުރާށެެވެ. ހުޅުމާލޭ ފޭސް އެެކެއްގައި 185 މިލިއަން ރުފިޔާގެ އެ އޮފީސް އިމާރާތްކުރުމަށް ހަވާލުކުރީ 2019 ވަނަ އަހަރު ޗައިނާގެ ހުނާން އިންޖީނިއަރިންއާ އެވެ.
މިނިސްޓްރީން ބުނީ 2020 ގައި އެ އިމާރާތް އަޅަން ފެށި ނަމަވެސް ކޮވިޑްގެ ބަލިމަޑުކަމާ ގުޅިގެން މަސައްކަތް ނުނިމި ދިގުލައިގެން ދިޔަ ކަމަށާއި އެކަމަކު ދިމާވި ދަތިތަކަށް ފަހު އަންނަ މަހު އެތަނުގެ މަސައްކަތް އެއްކޮށް ނިމޭނެ ކަމަށެވެ.
ޑިސެމްބަރުގައި މިތަން ބޭނުންކުރަން ފަށާއިރު ހަ ބުރީގެ އެ އިމާރާތުގައި ތިން މިނިސްޓްރީއެއް ހުންނާނެ އެވެ.
- ގްރައުންޑް ފްލޯ - ޕާކިން
- ދެވަނަ ފްލޯ - ޖެންޑާ މިނިސްޓްރީ
- ތިން ވަނަ ފްލޯ - ޓްރާންސްޕޯޓް މިނިސްޓްރީ
- ހަތަރު ވަނަ ފްލޯ - އެމެރިކަން އެމްބަސީ
- ފަސް ވަނަ ފްލޯ - ހަޔަ އެޑިއުކޭޝަން
- ހަ ވަނަ ފްލޯ - ކުދި މީޓިން ރޫމްތަކާއި ސެމިނާ ރޫމެއް އަދި ޓެރަސް
މިނިސްޓްރީން ބުނި ގޮތުގައި ކޮންމެ ފަންގިފިލާއެއްގެ ބޮޑު މިނަކީ 25،000 އަކަފޫޓެވެ.
އެ މިނިސްޓްރީން ބުނި ގޮތުގައި ސަރުކާރުގެ އޮފީސް އިމާރާތުގެ ދަތިކަން ބޮޑުވީ ހުރަވީ ބިލްޑިން ބޭނުން ނުކުރެވި އެ އިމާރާތަކީ ރައްކާތެރި ތަނެއް ނޫން ކަމަށް އިންޖީނިއަރުން ލަފާދިނުމުން އެތަނުގައި ހުރި އޮފީސްތައް ހުސްކުރަން ޖެހުމުންނެވެ.
މިއަހަރު ހުރަވީ ބިލްޑިން ތަޅާލާފައި ވާއިރު މި އިމާރާތުގެ ސްޓީލް ސްޓްރަކްޗާއަށް އެއްވެސް ގެއްލުމެއް ވެފައި ނެތް ކަމަށާއި އެހެންވެ ސަރުކާރުން ނިންމާފައި ވަނީ އޮފީސްތަކުގެ ފައިލްތައް ދިގު މުއްދަތަކަށް ރައްކާތެރިކުރުމަށް ޖާގަ ބޭނުންވާތީ އެ ސްޓީލް ސްޓްރަކްޗާ ބޭނުންކޮށްގެން މާލެއާ ކައިރި ރަށެއްގައި ނުވަތަ ވައިމަގުން ދެވޭނެ ތަނެއްގައި ފައިލް ރައްކާކުރުމުގެ އިމާރާތެއް އެޅުމަށް ކަމަށް ވެސް މިނިސްޓްރީން ބުންޏެެވެ.