ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީ އަށް މިރޭ މަގުމަތިން ބަޔަކު ހަމަލާ ދީފި އެވެ.
އެކަން، އޭނާ ނިސްބަތްވާ ޕާޓީ، އެމްއާރްއެމް އިން ވަނީ ކަށަވަރުކޮށްދީފަ އެވެ.
މި ހަމަލާގައި ޝިމާޒަށް ލިބުނު ހާނިއްކައިގެ ތަފްސީލެއް އަދި ނުލިބެ އެވެ. އަދި ހަމަލާ ދިނީ ކޮން ބަޔެއް ކަމެއް އަދި މިއީ ކޮން މަގުސަދެއްގައި ދިން ހަމަލާއެއް ކަމެއް ނޭގެ އެވެ.
ޝިމާޒަށް ބަޔަކު ހަމަލާ މިދިނީ، އޭނާގެ ސައިކަލަށް ދާދި ފަހުން ގެއްލުންދީ، އިންޒާރުގެ މެސެޖުދީ، އާއިލާ މެމްބަރުންނަށް ގުޅައި އިންޒާރު ދީފައި ވަނިކޮށެވެ.\
އެމްއާރްއެމް އިން ދާދި ދެންމެއަކު ކުރި ޓްވީޓެއްގައި ވަނީ ޝިމާޒަށް ދިން ހަމަލާ ކުށްވެރިކޮށްފަ އެވެ. އަދި ހަމަލާ ދިން މީހުން ހޯދައި، ކަމާއި ބެހޭ ފަރާތްތަކުން މިމައްސަލަ ތަހުގީގުކޮށް ފިޔަވަޅު އެޅުމަށްވެސް ގޮވާލި އެވެ. ދާދި ފަހުން ޓްރާންސްޕޯޓް މިނިސްޓަރު އާއިޝަތު ނަހުލާ ވަނީ ޝިމާޒަށް، ގަވާއިދާ ހިލާފަށް ވެހިކަލް ރަޖިސްޓްރީކޮށްދިނުން ފަދަ ކޮރަޕްޝަންގެ ބޮޑެތި ކުށްތަކާއި މިނިސްޓްރީގެ ސިޔާސީ މީހުންގެ އަބުރު ކަތިލުމުގެ ތުހުމަތުކޮށް އޭނާ މަގާމުން ވަކިކޮށްދޭން އެދި ރައީސް އޮފީހަށް ސިޓީ ފޮނުވައިފަ އެވެ.
ޝިމާޒް 'މިހާރު' އަށް އޭރު ވިދާޅުވި ގޮތުގައި ވެހިކަލް ރަޖިސްޓްރޭޝަނާއި ޓްރާންސްޕޯޓް މިނިސްޓްރީ ތެރޭގައި ހިނގާ އެހެން މައްސަލަތަކުގެ ތުހުމަތު އެޅުވިޔަސް ގާނޫނާއި ގަވާއިދާ ޚިލާފަށް އެއްވެސް ކަމެއް ކުރައްވާފައި ނޯންނާނެ ކަމަށާއި ހުރިހާ ޒިންމާއެއް އަދާކުރައްވަނީ މިނިސްޓަރަށް އެނގިވަޑައިގެން ކަމަށެވެ.
މަގާމުގެ ނުފޫޒު ބޭނުންކޮށްގެން، ރާއްޖޭގައި ދުއްވާ ހުރިހާ ވެހިކަލްތަކުގެ ނަމްބަރު ޕްލޭޓް ބަދަލުކުރަން ވަސާޖިއޯ ނަމަކަށް ކިޔާ ކުންފުންޏާ ހަވާލުކުރި މައްސަލައިގައި އެމްއާރުއެމްއިން ވެސް އޭނާގެ މައްސަލަ ބެލި އެވެ. އެކަމަކު ޕާޓީން އޭނާއާ މެދު ފިޔަވަޅެއް ނާޅަން ނިންމީ ޕީޖީން ދައުވާނުކޮށް މައްސަލަ އަނބުރާ އޭސީސީއަށް ފޮނުވާލުމުންނެވެ.
ޝިމާޒް އަކީ ކުރިން ރާއްޖޭގައި ފާހަގަކޮށްލެވޭ ކުޅިވަރު ނޫސްވެރިއެކެވެ. އޭނާ އަށް ޓްރާންސްޕޯޓުގެ ޑެޕިއުޓީ މިނިސްޓަރުކަން ލިބުނީ އެމްއާރްއެމްގެ ސްލޮޓެއްގައި މި ވެރިކަމުގަ އެވެ.