އަންނަ އަހަރުގެ ރިޔާސީ އިންތިހާބުގައި އެމްއެންޕީގެ ޓިކެޓް ދޭނެ ކެންޑިޑޭޓަކު ކަނޑައަޅަން ބާއްވާ ޕްރައިމަރީގައި ވާދަކުރުމުގެ ފުރުސަތު މިއަދު ހުޅުވާލައިފި އެވެ.
ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެމްބަރު މުހައްމަދު ނާޒިމް އިސްވެ އުފެއްދެވި އެމްއެންޕީގެ ރިޔާސީ ޕްރައިމަރީގައި ވާދަކުރަން ބޭނުންވާ މީހުން އެ ކަމަށް އެދި ފޯމު ހުށަހަޅަން ޖެހޭ ސުންގަޑިއަކީ މި މަހުގެ 14 އެވެ.
އެ ފޯމާއެކު ހުށަހަޅަންޖެހޭ ލިޔެކިޔުންތައް އެމްއެންޕީގެ އޮފީހަށާއި އެ ޕާޓީގެ ރަސްމީ މެއިލަށް ވެސް ހުށަހެޅޭނެ ކަމަށް އެމްއެންޕީން ކުރި އިއުލާނުގައި ވެ އެވެ.
ދާދި ފަހުން ފާސްކުރި އެމްއެންޕީގެ އަސާސީ ގަވާއިދުގައި ވާ ގޮތުން އެ ޕާޓީގެ ރިޔާސީ ކެނޑިޑޭޓް ކަނޑައަޅަން ޖެހެނީ ޕްރައިމަރީއަކުންނެވެ.
އަންނަ އަހަރުގެ ރިޔާސީ އިންތިހާބުގައި ވާދަކުރައްވާނެ ކަމަށް އެމްއެންޕީގެ ރައީސް ނާޒިމް ވަނީ އިއުލާނު ކުރައްވައިފަ އެވެ.
ރާއްޖޭގައި އެންމެ ފަހުން އުފެއްދި ސިޔާސީ ޕާޓީ އެމްއެންޕީގެ މެންބަރުންގެ އަދަދު އިތުރުކޮށް، މުޅި ރާއްޖެއަށް އެ ޕާޓީ ފުޅާކުރުމަށް ގިނަ މަސައްކަތްތަކެއް ކުރަމުން އަންނަ ކަމަށް ވަނީ ބުނެފަ އެވެ. އެ ޕާޓީގައި މިހާރު 10،000 މެންބަރުން އެބަތިބި ކަމަށް ވަނީ އިއުލާނުކޮށްފަ އެވެ.