މިދިޔަ ފެބްރުއަރީ މަހު އިކޮނޮމިކް މިނިސްޓްރީން ހުޅުވާލި ފުރުސަތުގައި ބިދޭސީންގެ ޑިޕޮސިޓް ފައިސާ ހޯދަން އެދި 2145 މީހުން ހުށަހަޅާފައިވާ ކަމަށް، އިކޮނޮމިކް މިނިސްޓްރީން ބުނެފި އެވެ.
އެ މިނިސްޓްރީން ބުނީ ޑިޕޮސިޓް ފައިސާ އަނބުރާ ހޯދަން ގިނަ އަދަދެއްގެ ބަޔަކު އެދުނު އިރު އެކަން ކުރަން ހާއްސަ ކޮމިޓީއެއް އެކުލަވާފައިވާ ކަމަށެވެ. އެކަމަކު އެ ފައިސާ ދޫނުކުރެވި ގިނަ ދުވަސްތަކެއް ހޭދަވަނީ، މިނިސްޓްރީން ބުނި ގޮތުގައި އެހާ ބޮޑު ބެކްލޮގެއް ކްލިއާ ކުރުމުގައި ހުރި ދަތިތަކުގެ ސަބަބުންނެވެ.
އެނގިފައިވާ ގޮތުގައި ޑިޕޮސިޓް ފައިސާ ހޯދަން އެދުނު 2000 އަށް ވުރެ ގިނަ މީހުންނަށް އެކަނި ވެސް 100 މިލިއަނަށް ވުރެ ގިނަ ރުފިޔާ ދައުލަތުން ދޭން ޖެހެ އެވެ.
މިދިޔަ ފެބްރުއަރީ މަހުގެ 20 އިން ޖޫން 20 އަށް، ޑިޕޮސިޓް ރީފަންޑަށް އެދި ހުށަހަޅަން އިކޮނޮމިކް މިނިސްޓްރީން ހުޅުވާލި އެވެ. ރިފަންޑު ކޮށްދެނީ ޖުލައި 12، 2019 އިން ފެށިގެން މިހާތަނަށް ޑިޕޮޒިޓް ކޮށްފައިވާ ފައިސާ އެވެ. އެހެން ނަމަވެސް މިހާތަނަށް އެކަމަށް ހުށަހެޅި އެއްވެސް ފަރާތަކަށް ފައިސާ އަނބުރާ ދީފައެއް ނުވެ އެވެ. ޑިޕޮސިޓް ފައިސާއަކީ ބިދޭސީން، ގެންނަ އިރު މިނިސްޓްރީގައި ބަހައްޓަން ޖެހޭ އަދަދެކެވެ. އާންމުކޮށް ޑިޕޮސިޓްގެ ގޮތުގައި ބަހައްޓަނީ އެ ބިދޭސީއެއް ގެންނަ ގައުމަކުން ރާއްޖެ އަށް އައުމަށް ދާ ޓިކެޓް ހަރަދެވެ.
ޑިޕޮސިޓް ރީޕަންޑު ކުރުން ހުއްޓިފައި އޮތް އިރު މި އަހަރު ކުރީކޮޅު އިކޮނޮމިކް މިނިސްޓްރީން ވަނީ ޑިޕޮސިޓް ރީފަންޑުގެ ގޮތުގައި 549 މިލިއަން ރުފިޔާ ދޫކޮށްފަ އެވެ.
ބިދޭސީންގެ ޑިޕޮސިޓް ފައިސާގެ ގޮތުގައި ދޭން އެއް ބިލިއަން ރުފިޔާ ހުރި ކަމަށް މީގެ ކުރިން އިކޮނޮމިކް މިނިސްޓަރު ފައްޔާޒް އިސްމާއީލް ވެސް ވިދާޅުވެފައިވެ އެވެ. އެ ފައިސާގައި އޮޅުންތައް އެބަހުރި ކަމަށާއި އެ ފައިސާ ދޫކޮށްފައި އޮތީ ކޮން ބައެއްކަން އަދި ދޫނުކުރެވި އޮތީ ކޮން ބަޔަކަށް ކަން ވެސް ދެނެގަންނަން އުނދަގޫ ކަމަށް އޭރު އޭނާ ވިދާޅުވި އެވެ.