ބިދޭސީންނަށް ތިލަފުށިން ސިނާއީ ބޭނުމަށް 99 އަހަރަށް ބިން ގަނެވޭ ގޮތަށް ހުޅުވާލުމާ ގިނަ ބަޔަކު ދެކޮޅު ހަދަނިކޮށް، 57 ބިމެއް ކުއްޔަށް ދޭން އެޗްޑީސީން އިއްޔެ ހުޅުވާލައިފި އެވެ.
އެ ކުންފުނިން ކުރި އިއުލާނެއްގައި ވަނީ ހަ ބާވަތެއްގެ ޕްލޮޓް ދޫކުރަން އިއުލާނުކޮށްފަ އެވެ. އޭގެ ތެރޭގައި ހިމެނެނީ 2،500 އަކަފޫޓާއި 35،000 އަކަފޫޓާ ދެމެދުގެ ބިންތަކެވެ. އެންމެ ކުޑަ އަގެއްގެ ގޮތުގައި އަކަފޫޓަކަށް 1،700ރ. ދައްކަން ޖެހޭނެ އެވެ.
ބިދޭސީންނަށް 99 އަހަރަށް ބިން ދޫކުރާ އިރު ތިލަފުށިން ބިން ގަންނަ ދިވެހިންނަށް ބިން މިލްކު ކުރެވޭނެ އެވެ.
- ޓައިޕް 1: 2،500-4،999 އަކަފޫޓް
- ޓައިޕް 2: 5،000- 9،999 އަކަފޫޓް
- ޓައިޕް 3: 10،000- 14،999 އަކަފޫޓް
- ޓައިޕް 4: 15،000- 19،999 އަކަފޫޓް
- ޓައިޕް 5: 20،000-29،999 އަކަފޫޓް
- ޓައިޕް 6: 30،000-35،000 އަކަފޫޓް
އޭގެ ތެރެއިން އެންމެ ގިނަ އަދަދެއްްގެ ޕްލޮޓް ދޫކުރަނީ ޓައިޕް ދެއަކުންނެވެ. އެ ސައިޒުގެ 20 ބިމާއި ޓައިޕް 1 ގެ 14 ބިމާއި ޓައިޕް 3 އަދި 4 ގެ ހަތް ބިމާއި ޓައިޕް 5 އާއި ޓައިޕް 6 ގެ އެއް ބިން ދޫކުރާނެ ކަމަށް އެޗްޑީސީން ބުންޏެވެ.
ޓައިޕް 1 ގެ ބިންތަކަށް ބިޑް ސެކިއުރިޓީގެ ގޮތުގައި 150،000ރ. ހުށަހަޅަން ޖެހެ އެވެ. ޓައިޕް 2 އަށް ތިން ލައްކަ، ޓައިޕް 3 އަކަށް ފަސް ލައްކަ، ޓައިޕް 4 އަކަށް ހަތް ލައްކަ، ޓައިޕް 5 އަކަށް އެއް މިލިއަން އަދި ޓައިޕް 6 އަކަށް 1.3 މިލިއަން ރުފިޔާ ބިޑް ސެކިއުރިޓީގެ ގޮތުގައި ހުށަހަޅަން ޖެހެ އެވެ.
އެޗްޑީސީން ބުނި ގޮތުގައި، ބީލަމުގެ އުސޫލުން ބިން ވިއްކާނީ ދެ މަރުހަލާއަކަށް ބަހާލައިގެންނެވެ. ފުރަތަމަ މަރުހަލާގައި ޖެހޭނީ ޝައުގުވެރިވާ ބިމަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހަޅާށެވެ. ދެވަނަ މަރުހަލާއަކީ އީއޯއައި ހުށަހަޅާފައިވާ ބިމަށް ބީލަން ހުށަހެޅުމެވެ.
ބިމަށް ޝައުގުވެރިވާ ފަރާތްތަކުން ބީލަމުގެ އުސޫލުން ބިން ގަތުމަށް ކުރިމަތިލެވޭނީ އެޗްޑީސީގެ އޮންލައިން ޕޯޓަލްއެއް މެދުވެރިކޮށެވެ. އެ ޕޯޓަލް އާންމުންނަށް ހުޅުވާލާނީ އަންނަ ހަފުތާގެ އަންގާރަ ދުވަހު ކަމަށް އިއުލާނުގައި ބުނެފައިވެ އެވެ.
ތިލަފުށީގެ ދެވަނަ ފިޔަވަހިން ދޫކުރާ މި ބިންތަކަށް ބިޑް ހުށަހަޅަން ޖެހެނީ މިމަހުގެ 13 ވަނަ ދުވަހު އެވެ.
ތިލަފުށިން ބިދޭސީންނަށް 99 އަހަރަށް ބިން ދޫކުރަން ހުޅުވާލުމާ އެކު ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ. އިދިކޮޅު ޕާޓީތަކުން ވެސް އަންނަނީ މި އުސޫލު ބަދަލު ކުރަން ސަރުކަރަށް ގޮވާލަމުންނެވެ. އެކަމަކު، ބިދޭސީންނަށް ކުރިމަތިލެވޭ ގޮތަށް ތިލަފުށިން ބިން ވިއްކަން މި ހުޅުވައިލީ އެ އަޑު އެހުމެއް ނެތި އެވެ.
