ސިނާއީ ބޭނުމަށް ކ. ތިލަފުށިން ދޫކުރާ ބިންތަކުގެ 90 ޕަސެންޓް ހާއްސަކުރާނީ ދިވެހި ވިޔަފާރިތަކަށް ކަމަށް އެޗްޑީސީން މިއަދު ބުނެފި އެވެ.
ބިދޭސީންނަށް ތިލަފުށިން 99 އަހަރަށް ބިން ކުއްޔަށް ދޭތީ ފާޑުކިޔުން ބޮޑުވެފައި ވަނިކޮށް، އެޗްޑީސީން ނެރުނު ނޫސްބަޔާނެއްގައި ބުނީ ސިނާއީ މަސައްކަތްތަކަށް ބިމުގެ ދަތިކަމާއި ބިން މަދުވުމުގެ ސަބަބުން އަދި ކުލި ބޮޑުވެ، ބިމުގެ އަގު އުފުލުމަށް ހައްލެއް ހޯދުމަށް ޖުމްލަ 150 ހެކްޓަރުގެ ބިން ހިއްކަން ހަމަޖެހިފައިވާ ކަމަށެވެ.
އެ މަޝްރޫއާ ގުޅިގެން 57 ބިމެއް ބީލަމުގެ އުސޫލުން ވިއްކަން އިއްޔެ އެޗްޑީސީން ހުޅުވައިލި އެވެ.
އެ ބިންތަކަށް ކުރިމަތިލުމުގެ ފުރުސަތު ހުޅުވާލާފައިވާއިރު، ތިލަފުށިން އަލަން ހިއްކަމުން އަންނަ ބިމުގެ 90 ޕަސެންޓް ބިން ދިވެހި ވިޔަފާރިތަކަށް ހާއްސަކޮށް، ކުލި ކޮންޓްރޯލް ކުރެވޭ އުސޫލުތަކުގެ ތެރެއިން ދިނުމަށް ކަނޑައެޅިފައިވާ ކަމަށް އެޗްޑީސީގެ ބަޔާނުގައި ބުންޏެވެ.
އެ ކުންފުނިން ބުނިގޮތުގައި، ތިލަފުއްޓަކީ ސްޕެޝަލް އިކޮނޮމިކް ޒޯނަކަށް ނުވާތީ ބޭރުގެ ވިޔަފާރިތަކަށް ތިލަފުށީގެ މަދު ބިންތަކަކަށް އެދި ބީލަން ހުށަހެޅުމުގެ ފުރުސަތު ހުޅުވައިލިޔަސް، އެ ވިޔަފާރިތައް ވެސް އަމަލުކުރަން ޖެހޭނީ ރާއްޖޭގެ ގާނޫނާއި ގަވާއިދުތަކާއި ކަމާބެހޭ އިދާރާތަކުން ކަނޑައަޅާފައިވާ އުސޫލުތަކުގެ ތެރެއިންނެވެ.
ދިވެހިންނަށް ހާއްސަ ވިޔަފާރިތައް ކަމަށްވާ މަސްވެރިކަމާއި ދަނޑުވެރިކަން ފަދަ ވިޔަފާރިތަކަށް އެ ބިންތައް ދޫކުރުމުގެ ސަބަބުން އެއްވެސް އަސަރެއް ނުކުރާނެ ކަމުގެ ޔަގީންކަން އެޗްޑީސީން ދިނެވެ.
އެ ބިންތައް ދޫކުރުމުން އެ ތަންތަނުން ދިވެހިން ވަޒީފާގެ ގިނަ ފުރުސަތުތައް ވެސް ލިބޭނެ ކަމަށް އެ ކުންފުނިން ބުންޏެވެ.
ތިލަފުށިން ބިދޭސީންނަށް ބިން ކުއްޔަށް ދޭތީ އެކަމާ ދެކޮޅަށް އިއްޔެ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ވަނީ ބޭރުކޮށްލައިފަ އެވެ. އެކަމާ ގުޅިގެން ސަރުކާރާ އިދިކޮޅު ގިނަ ބަޔަކު ދަނީ އެކަން އެގޮތަށް ނުކުރުމަށް ގޮވާލައި ކަންބޮޑުވުން ފާޅުކުރަމުންނެވެ.
އެޗްޑީސީގެ އިއުލާނެއްގައި ވަނީ ހަ ބާވަތެއްގެ ޕްލޮޓް ދޫކުރަން އިއުލާންކޮށްފަ އެވެ. އޭގެ ތެރޭގައި ހިމެނެނީ 2،500 އަކަފޫޓާއި 35،000 އަކަފޫޓާ ދެމެދުގެ ބިންތަކެވެ. އެންމެ ކުޑަ އަގެއްގެ ގޮތުގައި އަކަފޫޓަކަށް 1،700ރ. ދައްކަން ޖެހޭނެ އެވެ.
ބިދޭސީންނަށް 99 އަހަރަށް ބިން ދޫކުރާއިރު، ތިލަފުށިން ބިން ގަންނަ ދިވެހިންނަށް ބިން މިލްކުކުރެވޭނެ އެވެ.
