ވީނުވީ ތަނެއް ނޭނގި ގެއްލިގެން މިމަހުގެ ހަ ވަނަ ދުވަހުން ފެށިގެން ހޯދަމުން އައި މުހައްމަދު އާސިރު އިސްމާއިލް ރޭ ފެނުނީ ވެލާނާ އިންޓަނޭޝަނަލް އެއާޕޯޓުގެ އިންޓަނޭޝަނަލް ޓާމިނަލުގެ ގޮނޑިއެއްގައި އިށީގެން އިންދާ ކަމަށް "މިހާރު" އަށް އެނގިއްޖެ އެވެ.
އާއިލާ އިން އާސިރު ގެއްލިގެން ރިޕޯޓްކުރީ ހުޅުމާލޭގައި ވަޒީފާ އަދާކުރާ ފިހާރައަށް ދާން ގެއިން ނުކުތް ފަހުން ހަބަރެއް ނުވެގެންނެވެ. އެކަމަކު އެ ރޭ އޭނާ ހުޅުމާލެއަކަށް ނުދެ އެވެ.
އެހެންވެ އޭނާ ހޯދުމަށް ކުރި މަސައްކަތުން އޭނާ އެންމެ ފަހުން ފެނުނީ ބޮޑުތަކުރުފާނު މަގުން، ހުޅުމާލެއަށް ފުރާ ފެރީ ޓާމިނަލް ކައިރިން ހުދު ކުލައިގެ ކާރަކަށް އަރައިގެން ގޮސް ވީއައިއޭގެ ޓާމިނަލަށް ވަދެގެން ދަނިކޮށެވެ.
އޭނާ ހޯދަން މާލޭގެ އެކި ސަރަހައްދުތަކާއި އެއާޕޯޓްގެ ކެމެރާތައް ބެލިއިރު ފުލުހުން ވަނީ އޭނާ ރާއްޖެއިން ބޭރަށް އަދި ރާއްޖެ ތެރެއަށް ވެސް ފުރައިގެން ދިޔަ ކަމުގެ މައުލޫމާތު ނުލިބޭ ކަމަށް ކުރިން ބުނެފަ އެވެ.
ގާތްގަނޑަކަށް ދެ ހަފްތާ ފަހުން އޭނާ ފެނުނީ ކޮން ތަނަކުން ކަމެއް ފުލުހުން ހާމައެއް ނުކުރެ އެވެ.
އާސިރުގެ އާއިލާގެ މީހަކު ކިޔައިދިން ގޮތުގައި އާސިރު ފެނުނީ އިންޓަނޭޝަނަލް ޓާމިނަލުގެ ގޮނޑިއެއްގައި އިށީނދެގެން އިންދަ އެވެ. އޭނާ ފެނުނުއިރު ލައިގެން ހުރީ ގެއްލިގެން ރިޕޯޓްކުރިއިރު ވެސް ލައިގެން ހުރި ހެދުން ކަމަށް ވެސް އޭނާ ބުންޏެވެ.
އާސިރު އެކަމާ ގުޅޭ ގޮތުން ވާހަކަ ނުދައްކާތީ، މި ހުރިހާ ދުވަހަކު އޭނާ އިނީ އެތަނުގައި ކަމެއް ނުވަތަ އެހެން ތަނެއްގައި ކަމެއް އަދި ނޭނގެ އެވެ.
އާސިރު ފެނުމާ އެކު އެންމެ ފުރަތަމަ ގެންދިޔައީ ވެސް ހޮސްޕިޓަލަށް ކަމަށް އެނގިފައިވެ އެވެ.
ރޭ ފުލުހުން ބުނެފައިވާ ގޮތުގައި އާސިރު ފެނުނުއިރު އޭނާގެ ހާލު ރަނގަޅެވެ. އެކަމަކު އިތުރު އެއްވެސް ތަފްސީލެއް ފުލުހުން ނުދެ އެވެ.
އާއިލާ އިން ކުރިން ބުނެފައިވާ ގޮތުގައި އާސިރަކީ ސިކުނޑީގެ އުނިކަމެއް ހުންނާތީ ބޭސް ބޭނުންކުރާ މީހެކެވެ. އެކަމަކު އޭނާ އުޅެނީ ހަމަ "ނޯމަލް" މީހެއްގެ ގޮތުގައި ކަމަށް ވެސް އާއިލާ އިން ބުނެ އެވެ.